繼續清舊嘢，舊年聖誕前夕去咗摩星嶺行山。事隔差唔多一年，家陣實際路線情況變成點我都唔知。同理今次行嘅路線部分並唔係正常山徑，如果甚少或者係未試過係郊遊徑以外行山嘅朋友最好就唔好試了。
經過早前探路之後今日諗住再進一步，試下搵路由摩星嶺行過西高山。結果成功由摩星嶺落到堅尼地城配水庫，再輾轉上到西高山。完成咗一次行晒摩星同山頂嘅目標。
日期：2017年12月24
路線：堅尼地城>域多利道>西環泳棚>摩星嶺徑>摩星嶺炮台>堅尾地城配水庫>士美菲路>薄扶林道>龍虎山中草藥園>龍虎山健身徑>盧吉道>西高山>盧吉道>山頂公園>淩霄閣>芬梨徑>白加道>中區自然徑>纜車徑>纜車總站>香港公園>金鐘
全長：15.19 km
時間：5小時17分
Total climbing: 1317 m
Total time: 05:17:02
出發地點係狗鐵嘅堅尼地城站。
跟住喺由A出口上地面。
出站之後轉左沿行人路直去。
行人路旁邊係好特別嘅石墻樹。
邊行邊影相，行到街尾轉右。
再喺呢間轉角位惠康轉左，跟住沿域多利道一直行就得。之後一段路都冇補給，呢到唔買就要到山頂先有架喇(係太平山頂喎) 。
右邊馬路就係域多利道，仲要行一段距離先會到入口。沿路兩旁都有行人路，好安全嘅。
行多陣就開始上斜路。
終於到咗入口，同上一次行事隔半年，原來已經”落閘” 。不過閘口其實冇上鎖，閘門亦有開窿可以由入面伸手出嚟開閘。似乎留有一手方便”有心人” 繼續用呢條小徑上山。
(update @ 2020-02-29 – 入口己經重開)
礙於唔知另一邊嘅出口上鎖情況，決定唔搏行遠少少兜路上。但係行咗一陣又見到有樓梯，再睇吓地圖見到似乎可以連接上山嘅小徑，於是改變主意想行上去望下。
條路望落好靚好正常。
原來上到嚟係一個已經清拆咗嘅寮屋區。四維仲出奇地咁企理，有乜雜物同垃圾。
繼續嘗試搵路上，搵咗上去斜坡。
越行越唔對路，都係放棄算了。
走頭返落去域多利道，繼續沿行人路前進。
經過西環泳棚，一於落去影吓相先。
好似冇乜人，查實鏡頭外有萬七咁多人排梗隊等行出去影相。
沿海邊行可以比較近距離見到清洲。
影完相又上返去域多利道繼續行，行多大約15分鐘就嚟到摩星嶺徑入口。
開始上山。
睇到第一個路口就轉左。
行到上嚟小徑嘅出口，原來呢到冇圍封架喎。
頂，原來又係嗰啲好做唔做嘅議員。
為咗慳時間，今次行樓梯上。
轉頭就上到嚟青年旅舍。
山頂有塊大草坪，呢到可以望到香港版富士山。
上一次嚟因為怕變豬頭冇行呢到啲荒廢營房，家陣天氣涼冇蚊可以慢慢睇了。
其實頭先見到嗰個A貨富士山係西高山嚟嘅。就咁望埋去好似好遠好高咁，今日嘅目標就要行過去。
繼續睇吓啲營房。
呢個唔知會唔會係屎塔嚟呢？? 不過冇乜可能會痾屎出自己門口架喎? ? ?
行完晒啲營房，又出返嚟草坪。
開始探路，由涼亭旁邊嘅路落山。
頭段似乎幾好行。
幾特別喎，估唔到呢到都有木棧道。
嘩，越嚟越特別。
路越嚟越崎嶇，不過只要小心啲慢慢行應該唔難應付。
見到出口了。下面係摩星嶺徑。
地上面有記號指示右轉喎，望吓左邊又冇路。咁唔洗諗跟佢轉右啦。
沿摩星嶺徑行咗一陣發現唔對路，唯有行返轉頭再睇睇。其實先前出口嘅左邊係有一個入口。
之後又係半爆林咁行，路徑唔明顯要花時間搵。水管方向似係有路但其實行唔到嘅，唔需要花時間向呢邊試。
沿路間中會有絲帶，不過唔好諗住靠絲帶路。因為呢到似乎有多條小徑，絲帶提示嘅未必就係你想行嗰條路嚟(更加唔好亂咁怨人亂綁絲帶累你行錯路)。留意去到呢個分岔位地上有個記號，唔好跟絲帶直去，要轉右落。
之後都係雜草比較多嘅路，尚算明顯
似係行完爆林段了。
行到再次見到石屎路，即係到咗配水庫後面嘅護土墻，跟住沿樓梯落去就得。
(update @ 2020-02-29 – 配水庫護土墻有維修工程出口己封，短期內唔可以由配水庫運動場落山或上山)
掂晒～見到配水庫，好快到出口。
吖，呢啲圓碌碌嘅係乜嘢嚟架呢？
配水庫公園仔，成功由摩星嶺東邊落山。
影一影個山口位置，如果唔係行落嚟，就咁睇點會估到配水庫遊樂場入面，呢個唔起眼嘅位就係上山嘅入口。
角度唔同咗，西高唔再似富士了。
離開配水庫沿馬路行落去。
（update@20190123 – 啱啱發現以下描述錯誤地貼咗喺上一張相，咁啱又係樓梯口。希望冇人因為咁而比我老點咗。）
行到呢個樓梯口就轉左落去。
樓梯落到嚟士美菲路，跟住再沿行人路向上行。公路兩旁都有行人路，可以一直行到上去薄扶林道先至過馬路都未遲嘅。
不過我見對面好似多啲嘢睇，好鬼危險咁擒咗過馬路。真係盡量唔好咁做。
沿行人路上，進入一段橋底隧道，幾特別喎。
離開隧道繼續沿士美非路行到盡頭，跟住就嚟個180度U-turn。
轉灣之後沿行人路前進。
留意住右邊，行一陣就會見到一個樓梯口。
沿樓梯上，一直行到盡頭。
上完樓梯之後就見到山徑，跟住轉左。
龍虎山中草藥園，未嚟過喎，順便睇吓先。
行到見到右邊條樓梯就轉上去。其實入咗郊遊徑範圍啲指示已經好充足，睇牌就唔會行錯。
呢到有好多山草藥，唔識分好正常。所以每個花槽都有詳細說明。仲有好有禮貌嘅管理員巡邏，確保唔會有賤人或者害蟲傷害啲植物。
繼續沿住草藥園樓梯向上行到尾。
行過對面繼續上。
行多陣見左邊呢條樓梯就轉上去。
繼續上。
又嚟到熟悉嘅松林廢堡燒烤場，有機會真係好想試一次喺呢到燒吓嘢食。
跟手就繼續沿健身徑上山。
嚟到健身徑盡頭，接上克頓道。
向西高山進發
好，又一段好爽嘅上山樓梯。
終於上到嚟西高山，高高在上咁望吓下面嘅薄扶林水塘。
西高山風景真係唔錯。
唔覺唔覺就行咗上嚟，望番落去摩星嶺好似行咗好遠咁。
離開西高山返到嚟夏力道，跟住就要上山頂公園。
轉個頭又到咗山頂公園。
嚟到山頂公園，梗係要幫襯吓小食亭。
飲番枝補吓啲奶力先。
一場嚟到，頽都要影一張嘅。
對我嚟講，行得上嚟山頂實在係冇乜理由唔行埋落山嘅。
落山之前都影番張頽相。
影完埋站，跟住行落嚟等一陣又可以再影多一次架纜車。
堅落山，沿白加道行。
行到見到漆咸徑行就轉落去。
一路落一路轉。。。
行完漆咸徑落到嚟梅道。
嚟到第二個有特色嘅梅道站。
等一陣又有纜車上嚟，咁啱有啲金黃色嘅陽光照住，好靚。
睇完車繼續落山，跟住過馬路入去高化利徑。
跟住又再轉入蒲魯賢徑。
行完晒出去就係馬己仙峽道，跟住喺路口過斑馬線。
過馬路之後就係纜車徑。
跟住呢個係麥當勞道站，冇乜特別。
落到嚟麥當勞道就行去右邊呢個樓梯口。
繼續沿纜車徑落山。
再過馬路直去。
到纜車總站了。
去中環站又唔近，咁唯有去金鐘站啦。至少有公園行下。
好少嚟香港公園，查實呢到都幾靚嘅。
紀念坑日戰爭嘅銅像。
呢個瀑布涼亭夠晒特別。
離開香港公園，過馬落地鐵站。
嚟到金鐘，今日行完收皮。
發表迴響