早前喺 youtube 見到一位外國航拍友好有創意咁將 mavic 個原裝保護罩改裝成遮光罩。深受側光影響嘅我見到即時開心晒，拿拿臨走去 dji shop 買一個罩嚟自己試下。
方法好簡單，有做開手作嘢嘅應該唔需要教學，知道個 idea 就可以用自己嘅方法完成。步驟係要先搵出鏡頭視角，將拍攝唔到嘅地方遮住，定好位之後將入鏡部分鋸走再噴油就完成。由於個鏡頭係會左右上下攞動，所以要開住部機望住個圖傳嚟搖機睇下劃出嚟嘅地方會唔會產生黑邊。
跟住係開窿，再出動我最拿手嘅線鋸鋸個四方窿出嚟。
再用銼修靚啲邊位。
裝上隻機到試下位，留意個鏡頭同機身唔對中嘅，甚至連佢個保護罩波波都唔對中。所以鋸出嚟嘅切口會左右唔對稱，出現大細邊嘅情況。
大細邊除咗係個外觀有啲奇怪之外，最大問題係貼近鏡頭一邊大部分都需要鋸走，基本上做唔到遮光效果。
跟住就噴油試試，入面梗係要用黑色啦~
外面就要用灰色嚟夾番機身顏色，去模型鋪搵嚟搵去都搵唔啱。最後買咗枝雙星嘅AS-4嚟用，驟眼望都有啲似原裝嘢?。
攪咁多嘢又唔知有冇實際效果，好似有少少無謂。不過如果當番佢係一個保護罩，咁佢應該可以喺輕微碰撞情況之下保護到個鏡頭雲台，又廢唔晒嘅。如果有興趣自己都整一個嘅朋友，可以就住自己嘅駕駛習慣嚟決定開口闊度。開口越窄遮光效果越好，但同時機身擺動時出現黑邊情況亦會越多。就自己需要攞個平衡，唔怕煩嘅話可以拎埋圏 masking tape 出街一邊試飛一邊調較，試到啱心水先至返屋企開窿。
可惜整好之後日日都陰天，試唔到效果。單以外觀嚟計係唔錯嘅?。其實最有效嘅遮光罩應該係好似 ND filter 咁直接套喺鏡頭上面，不過咁做就會變成”風兜”影響鏡頭穩定。唔知係咪因為咁所以 dji 冇出原廠遮光罩呢？
發表迴響