近排成日都落雨，一早攞咗假期都冇得去行山灰到爆。終於等到一日天氣好啲，即時仆倒咁去搵個山嚟行吓。一心諗住見有藍天實冇死啦，點知一開始行山就落雨。第一次比我體驗到好水時嘅黃龍坑郊遊徑，同享受咗一個人都冇嘅爛頭鳯凰?。
路線：東涌站>黃龍坑道>黃龍坑郊遊徑>爛頭營>伯公坳>鳯凰山>心經簡林>昂坪市集>昂坪棧道>逸東邨>東涌站
全長：22．9 km
時間：7小時11分
出發時見到天氣好好，藍天白雲。
行咗一陣就開始天陰陰好似想落雨咁，不過冇理由未落出就走頭嘅，都係行多陣再睇吓點先。
一路沿住裕東路行，上到行人天穚之後喺中間轉左。
落地之後就係東涌道，跟住轉右沿行人路去。
路口有地圖睇，行前少少就轉入去黃龍坑道，一路行上去。
喺前面嘅黃龍坑道口轉左。
行多陣就經過赤鱲角新邨。
繼續沿黃龍坑道去，開始有少少毛毛雨。
千人台話今日好天，出門口時又真係好天。入到嚟行山就唔好天，吹漲。一場嚟到都係再行多陣睇吓點先啦。
再行多陣啲毛毛雨越落越大，要開☂️。本來行喺前面啲山友見到落雨個個都決定走頭。即時開個雷達圖睇吓，見到四維都冇落雨，淨係得自己頭頂位置有雨雲?。
既然唔係大範圍落雨，一於繼續行程，預計行一陣就可以離開頭頂嗰舊雨雲。
今次真係藍天白雲得嚟嘅烏雲蓋頂，吹9漲。
嚟到郊遊徑入口，開始上山了。啲人走晒得淨得我一個仲好，可以除口罩吸吓新鮮空氣。
起動上山?♂️。
好L辛苦行咗半粒鐘先至見到第一枝標距柱，仲有3枝喺前面等梗。
行多10分鐘到第二枝，跟住啲路冇咁辛苦了。
鏡頭一轉嚟到第三枝標距柱。行咗1.5公里了。
噢～撈～應該又係啲樹比風吹斷咗跟住就比人鋸，其實有冇必要次次都一吹斷就成棵鋸走呢。。。咁多年先長到一棵大樹，吓吓諗都唔諗就鋸晒好可惜。
嘩～乜事？！做乜平時條路變咗條澗？唔想濕腳又唔想返轉頭可以點。。。望吓望吓，見好似有人放咗一碌木喺到喎?
最後都可以力保不失，冇濕腳過到嚟。
第一次行郊遊徑遇到咁好水，下次落完大雨之後都係唔嚟。
依？有?喎。
正啊～我愛???。
終於行到見到第4枝標距柱，再行多一陣就上到去爛頭營。
山上面天陰陰濕淋淋，山下面就好好天。都慣，好多時上嚟都遇到咁嘅情況。
到了。
跟住轉右去爛頭營。
每逢落完雨啲蚯蚓就會爬晒上地面，今次見到呢條好生猛咁喺個水氹到游水，應該都有成尺長。
唉?﹐仲以為避開咗之前個小瀑布就可以唔駛濕腳，原來跟住落嚟啲路全部都已經浸晒。唔需要再左閃右避了(因為濕硬) ，可以當正常咁行。
啲芒草開始生種子出嚟了。
好多水珠。
其實未開嗰時都幾靚吖，遲啲呢到應該又會多人到爆炸。
繼續行程，
嚟到轉角位發現有人整咗啲鐵絲網喺到，諗住行返少少望吓，即時聽到有狗吠?。
我真係太耐冇上嚟，對上一次都仲係好地地。肯定係啲打咭友又玩串咗個場啦，行山係咁，航拍又係咁。硬係要為咗自己威威玩串個party先至安落。
大霧到咁L樣都無謂上大東山山頂，直接沿路落山算了。
落到嚟伯公坳天氣好啲了。
依？又有新嘢喎，我真係太耐冇嚟，唔知幾時整咗個打咭板喺到呢？又幾靚喎衰鬼?
有埋日期任你set
影飽相就要繼續行程，先落去東涌道。
跟住過對面馬路開始上鳯凰山。
起動上山，以今日嘅狀態應該要行番幾粒鐘。
仍然係山上邊大霧，山下邊就好天。
大霧中嘅南天門。
到山頂了，今日一個人都冇。
影完相休息一陣就開始落山。
上山唔易落山更難，行吓行吓嚟到斬柴坳。
離遠見到大佛了，不過仍然都仲有一段路要行。
依？呢個新嘢嚟喎，之前未見過。
出到嚟招牌位置梗係要影張相先啦，好難得一個人都冇。
吹漲，落到嚟之後鳯頂上面啲雲就開始散。
入到昂坪市集，雖然唔可以話一個人都冇，但一隻手數得晒囉。靜到連烏蠅都冇得你拍。
好，起程返落去東涌。
行咗好耐先至嚟到轉向站，之後啲路落多過上。
返到嚟3號塔了，之後就全程落樓梯。
離遠望吓今日行過嘅兩座山。。。吖，其實冇上到去大東山山頂??♂️，真失敗。
望去另一邊見到成個天都黑晒，似乎就嚟又要落狗屎了。好在我都差唔行完落山，夠晒時間返到市區。
行完條360救援徑了，比起平時慢咗十幾分鐘。
再次行到嚟天橋轉灣位，打咗個大圈。
返到嚟東薈城結束今日行程。
路線記錄
Total climbing: 2007 m
Total time: 07:11:05
發表迴響