一直都好想行一次真正嘅大嶼山三高，目標係要掃完晒三個山之後再行返去東涌打個圏。可惜今次因為預計唔到嘅＂意外＂衰收尾，唯有遲啲再搵機會完成呢個目標，不過可能都係出年秋天嘅事了。三高係指大嶼山三個最高嘅山(以郊遊地圖標高計)，分別有鳯凰山(934M)，大東山(869M)同埋蓮花山(766M)。而二東山只係排行第五，因為順路經開就行埋囉。路線方面其實冇乜特別，只係頭段由奧運徑上山自己比較少行，所以紀錄得詳細一啲。双東坳之後嘅路係成日行嘅鳯凰徑，冇乜特別嘢好講了。

日期：2016-11-14
路線：東涌市中心>香港奧運徑>蓮花山>双東坳>二東山>爛頭營>大東山>鳯凰徑２段>伯公坳>鳳凰徑３段(鳳凰山山頂)>昂坪
全長：15.71 km
時間：7小時8分

路線概覽
image

GPX 紀錄，隨便 download

Total distance: 17169 m
Total climbing: 1803 m
Total time: 07:08:14
Download file: linfa_gpx _2016-11-14_0232.gpx

今次由 D 出口出去達東路。
image

跟住過去對面馬路就係富東街。
image

跟住沿富東街直行。
image

行多陣會見到奧運徑嘅地圖指示牌。
image

image

再行前啲就會見到左邊有單車徑，過去沿單車徑旁邊繼續直行。
image

行到見到呢個橋底，繼續直去，好快就會到入口。
image

再行前少少見到右邊呢條樓梯就轉上去。
image

條樓梯好短嘅，行完第一段之後就要停，唔好繼續上。
image

之後就轉左繼續沿路行。
image

再行多幾步見到右邊又有另一條樓梯，今次轉上去。
image

之後一段跟住行就得。
image

以行山季節嚟計呢條路算係比較少人。
image

image

image

繼續沿路行，去到尾見到前呢個渠口就轉左行出去車路。
image

落到嚟就過去對面上幾級樓梯跟再住沿路行。
image

image

行行下經過一個設計特別嘅渠道。
image

image

沿路會又上又落，冇分岔只要沿住石屎路行就得。
image

一直行到嚟呢個樓梯口，跟住就轉右上樓梯，離開奧運徑。如果繼續直行係可以去到白芒嘅。
image

其實如果有留意，欄杆上面有山友留低嘅指示。跟住就一直係咁上，都幾長嘅。
image

當行到再冇樓梯上就即係行完了，跟住可以轉左。
image

行前少少，路嘅盡頭就係山路入口。
image

起動上山~
image

跟住大致上只係得一條路，主路亦好明顯易跟。行錯路嘅機會唔大。
image

行左一陣開始有風景睇了，不過高度仲係唔多夠。
image

繼續上，以上山嚟計呢段路唔算難行。
image

再影多張相，今次高咗啲個景就好好多了。
image

繼續沿路上山。
image

一直行到見到前面呢條打橫嘅路就轉右繼續。
image

其實喺呢個 T 字位轉左可以去到白芒或梅窩，轉右就去蓮花双東。而直剷就可以上去婆髻山，呢座山唔係嘢少嘅。上去難時落更難，如冇必要就最好唔好上去了。留意我影呢張相係接近 180 度嘅全景(極度變形) ，唔可以反映實際環境嘅。行到嚟只要簡單揀行左邊定係右邊就得了。
image

今日要上蓮花山，當然係行右邊呢條啦。
image

行咗一陣回頭望就可以見到婆髻山，上次由佢個圓頂落嚟時真係攞晒命。可能係我大水皮，呢啲高難度嘢試一次就夠了。
image

跟住落嚟啲路越嚟越易行了。
image

行行下又回頭望下，好L靚囉。
image

睇嚟呢段路好快就會正式成為郊遊徑，話唔定家陣已經係了。
image

有好奇嘅山友急不及待拆開咗標距柱啲膠袋，不過人哋連個牌都未裝上去喎。但見到隔離枝木棍就知號碼已經編好了。
image

繼續向蓮花山進發。
image

只要一直沿住條明顯嘅主路一直行就可以去到双東坳，上蓮花山就要留意左邊呢條路仔。掛住行真係好易行過咗都唔為意，我今次就戇居居要行返轉頭了。請記住呢個座標，行到附近就多加留意。(按圖有GPS位置，不過電話gps可能唔太準)
image

蓮花山上面風景唔錯嘅，可以望到梅窩。
image

至於山頂上嘅三角測量柱情況就有少少似大東山，大部分時間都有人企咗喺到。
image

由蓮花山行返落嚟，繼續向双東坳進發。
image

嚟到双東坳，轉左可以沿鳯凰徑落去南山同梅窩，轉右就可以去爛頭營。要以最慳時間去二東山就直剷上山，路會比較難行，如果唔趕時間可先沿鳯凰徑去爛頭營再行過去，或者直頭 skip 唔去二東。
image

認遠處住天線方向就係二東山。
image

唉~把鬼，上到嚟又係打霧水。乜都睇唔到，走人過大東。
image

大東呢邊情況似乎好啲喎~
image

好天唔到一陣又比啲霧包圍，冇相影唯有開飯先啦。今日有蛇飽食?，果然係秋風起，三蛇肥。?
image

離開大東返落嚟鳯凰徑，開始落山去伯公坳。
image

鏡頭一轉就到咗涼亭。
image

大鑊了，今日天氣比估計熱飲多咗水，得番少少。估計上鳯頂條路應該會幾好風冇咁熱，一於行埋落昂平先至補水。
image

出發了~
image

結果係再一次估計錯誤，第一次行鳯凰徑上山頂沿路一滴風都冇。水又要慳住飲，辛苦死?
image

上到嚟鳯頂又係冇嘢睇，座一陣休息吓就走人。
image

落山了，出奇地今日幾乎係冇人。第一次落山唔洗塞人。
image

唔喺山頂都一樣睇到日落?
image

到了，拿拿林出市集買水飲。
image

呢到竟然一個人都冇，咁難得梗係要掃張全景先啦。
image

水呀~水~ 就快有水飲了。
image

大彿都閂咗閘了，唔怪知冇乜人啦。
image

難得冇人，掃多一張先啦。
image

我頂~呢間乜 q 嘢 7 仔嚟架，6點都未夠就閂門！！！呢個moment，我真係要爆了?。其實爆粗都好難發洩到心入面嘅怒火。冇法啦，冇水飲就冇可能完成尾段返去東了。要減少消耗，座車走人。
image

我頂佢個肺，咁鬼多人。但今日唔知佢哋做乜嘢死都唔開加班車，結果排咗成日鐘頭先至上到車，仲要企位。真係估唔到原來全日最辛苦係最後等巴士同企出東涌呢個幾鐘。
image