整個 mount 比 crystalsky

諗咗一大餐，終於諗到個mount點整。原先買咗嗰啲大大碌嘅鋁料用唔著了。今次主要材料係一塊薄鋁片，做好之後再裝上去底座就攪掂。成件事最花時間係諗設計，至於鋸鋁片就真係冇難度，一陣間就攪掂。呢塊Y形片頂部兩個窿係穿M5螺絲，中心間距係55mm。下面嗰個窿就攻1/4寸絲牙比腳架螺絲用。有興趣diy嘅朋友可以慳番少少量度嘅時間了?

跟住係另外一個比較花時間嘅工序車螺絲。其實CS底部兩個螺絲窿係標準嘅M5，不過要喺街買到啱長度同款式嘅螺絲唔容易，最好都係自己做啦。同埋喺床(車)到攪吓攪吓係機佬嘅樂趣嚟。

壓花除咗嘥時間仲幾嘥料，因為自己技術唔夠，一頭一尾通常唔靚需要飛走。所以每次都會預長一啲，今次就預得太鬆結果夠車三粒螺絲。咁兩粒攞嚟用留一粒做spare囉。不過我都幾肯定如果真係唔見咗一粒嗰時，我係唔會搵到粒spare放咗喺邊?

攪掂，靚仔晒。可以拎出街玩了。