新玩具 – Hoptimist

早前同朋友行家品店時見到一隻圓轆轆嘅擺設好得意。正想衝動地買佢返屋企時，望一望個價錢就即時另我回復理智，都係先要停一停諗一諗。總覺得喺香港買野除咗物件本身價錢之外，其實一大部份係比咗業主。於是抄咗包裝盒上嘅網址查一查有冇網購可以平少少。

不出所料，官方網站果然係有網購服務，仲講明可以 world wide shipping 👍，價錢似乎比起鋪頭平一節😘。好開心咁揀咗幾隻，直到 checkout 時見到個運費又再嚇親。 運費由 32 歐羅起錶，如果只買一隻 bumble，運費仲貴過件貨。買兩隻運費加到 41 歐羅，但買三隻又係 41 歐羅(呢個係騙局嗎?)，結果買下買下就買咗 8 隻

講番呢啲叫 Hoptimist 嘅公仔，其實佢地歷史悠久，話說早喺 1968 年何蘭有一位叫 Hans Gustav Ehrenreich 嘅木匠，佢做咗第一隻叫做 birdies 嘅雀仔擺設之後大受歡迎，後來圓轆轆嘅女仔 bimble 同男仔 bumble 加入，最後仲多咗隻青蛙叫 kavk。

引述官網所講

Hoptimists are all about smiles – and a surplus of energy

事實上我第一眼望就已經覺得好可愛，再見到佢個頭彈下彈下就即時不自覺地笑。絶對認同呢個簡簡單單嘅公仔可以為人帶來歡笑，至少對我嚟講好 work (我冇佣收嘅)。不過價跌的確係貴咗啲💸

一家大細圍埋，好鬼得意。

雖然現實生活當中我只會鐘意女仔，但係對於 Hoptimist，我就比較喜歡男仔 bumble

呢隻大嘅 bumble 係用橡木做嘅，實木材料加上手工工序比較多，所以價錢貴過塑膠版本一大節。留意佢對眼唔係用油漆畫，而係用唔同顏色嘅木材鑲嵌入去嘅

幫佢做咗個頭圏，個感覺即時唔同咗

bumble 公仔分兩個 size，有普通同 baby 兩種。普通版個頭有 10cm 闊，而 baby 版就只有 5cm。細嘅價錢唔會平一半，但係開心指數就真係只得一半。大 bumble 頭同彈弓都比較重，彈起上嚟頻率慢，維持時間長。baby bumble 因為輕，彈頭頻率高而且好快玩完，相比之下大隻好玩啲。