新玩具 — DJI FPV 航拍機

難得 dji 第一次出 fpv 機，更難得今次新機開賣有香港分，於是就趁食晏時間仆咗落嚟跌錢。不過以價錢講就真係有啲貴，希望物有所值啦。

開箱~ 個盒咁大主要原因都係隻機摺唔埋。第時攞出街玩都要諗吓點拎先會方便啲。

個樣都幾有形架喎。

個磨沙透明殼幾靚，如果再透明啲仲正。

有咁多防撞 sensor 係咪真係會安全啲呢？定只係由起機即炒變成起機飛咗一陣就炒呢？🤣

感覺上成隻機都好靚，唯一望落做得最 cheap嘅部分反而係個鏡頭。大佬你就算預咗炒爛咗可以換都做靚少少吖嘛，你啲 parts 都唔係收得平架喎🙄。

個眼罩做功都好靚，感覺良好。個 LCD screen 係好清，不過睇一陣對眼已經超攰，可能仲需要啲時間嚟習慣。

用部舊 iPhone 嚟開 sim 玩，發現個眼罩畫面會因為部電話唔了快而閃吓閃吓。但就咁睇個i窿畫面又好順冇乜問題，咁唯有睇住個電話嚟玩住先。啱啱買完玩具暫時都係冇錢換機🤣🤣🤣。

其實就算個眼罩畫面唔係狂閃我都睇得唔清楚，帶住👓再笠個眼罩基本上都係搵自己笨，一定要配近視鏡先得。但 dji 新機賣街時又冇貨，到有貨又轉個頭賣晒。等咗一排先至買到。

呢兩塊嘢用係膠做，乜 coating 都冇感覺好膠。不過 work 到就算啦，好過睇唔到。