今次去日本一心諗住睇紅葉，但幾個月前買機票時點都估到今年會咁早落雪同轉冷。唯有日頭睇完樹枝，夜晚去睇燈飾啦。上網搵到東京站附近有個丸の内仲通り好似好出名，去到發現又冇乜嘢咁特別。似乎無論係燈飾，紅葉或者係櫻花，只要揀啱時間，日本除街都係。唔同地方分別只係在於數量多少，隔一段時間睇翻啲相隨時分唔到打邊到。正當我頽晒諗住走人時見到遠處好光好似係有大形燈飾，行到埋去先至知原來係地盤用嚟照明嘅燈?
唔知啲地盤佬喺咪唔想太過影響睇燈飾啲人嘅心情，所以整啲咁 cute 嘅燈出嚟呢？真係見到都開心晒。
為咗滿足自己嘅好奇心，搵個位置影下成枝燈嘅結構。原來枝燈係固定喺一架特制嘅車仔上面，車上有一個發電機，仲好似有電池。邊到要照明就推去邊，好鬼方便咁喎。不過個大餅上面到底佢想講乜呢？我讀得書少睇唔明?。
繼續研究下枝燈，白色呢塊好似鬼佬芝士嘅物體，似係用薄尼龍布裁製出嚟。有充氣裝置(但搵唔到喺邊)令佢保持形狀，入面就有個超光嘅燈。做出嚟嘅效果就好似係一個全方位 softbox 咁。為乜要攪到咁煩呢？我諗到至少有兩個好處；
- 雖然佢地唔係喺到影人像， 但 softbox 嘅散射光可以有效去除硬影，咁有利佢地喺多雜物阻礙嘅環境之下睇得清楚。對佢地嚟講，啲光越 flat 越好。
- 比起射燈，呢塊芝士燈就算唔覺意直接望到都唔會因為強光而產生眼花或者短暫失明情況，咁對工人就做嘢就更加安全了。
地盤佬燈飾有好多款式，連泥頭車都有?
遠處見到一塊冇加料嘅芝士餅，估計應該係正常時用嘅款式。唔知到過新年嗰時會唔會有其他新奇嘢呢？
個雪人咁得意，真係想搬咗佢返屋企
發表迴響