東京行山睇紅葉－陣馬高原上陣馬

清舊貨系列，時間係2017年年尾。

繼琴日喺鎌倉行山之後，今日再行另一個東京近郊嘅行山地點陣馬山。呢到冇好似藥王院咁嘅寺廟，亦冇滿山紅葉，再加上交通又唔算方便，所以陣馬山對遊客嘅吸引力遠遠不及高尾山，上山嘅十居其九都係當地人。標高855米，佢同高尾山之間一條長約12公里嘅山徑連接，叫做”高尾陣馬縦走”路線。今日原定計劃係由陣馬行山經縦走路線去高尾睇紅葉，可惜因為瞓過龍遲咗出發，再加上轉錯電車(低級錯誤)， 最後因為時間唔夠要放棄計劃改由陣馬落山再座車返去高尾睇紅葉?。

路線：陣馬高原下>陣馬街道>新ハイキングコース>陣馬山>一ノ尾尾根コース>落合>陣馬街道(沢井川)>沢井隧道>藤野駅
全長：10.19 km
時間：3小時20分
日期：2017-11-25

交通方面，去陣馬山同去高尾山一樣，都係座JR中央線去到總站高尾再轉車。不過今次轉座嘅係巴士?，車程亦會長好多。留意高尾站南北兩個出口都有巴士站，記住要由北口出站，出錯咗就會搵到傻都搵唔到。如果唔再入閘，要行番去另一邊都會幾麻煩。所以記住記住要由北口出閘喇(長氣mode) 。

高尾有好多巴士線去唔同嘅地方，第一次嚟搵車座真係會有啲迷惘。每個站頭都有一定數量嘅巴士，而去陣馬高原嘅巴士係靈園32號，行去1號站等車就啱喇。咁1號站喺邊呢？原來喺對面馬路。。。

一個細細嘅站頭有成十條線，應該好容易就會迫爆。加上去陣馬高原嘅靈園32號係班次極疏嘅巴士，為免啲人等車阻住個地球轉，喺1號站後面就開咗一條尊線比佢嘅乘客排隊。打算座巴士嘅朋友嚟到記住唔好排錯隊喇~

排隊時冇嘢做影下相，由另一個角度可以望番高尾站嘅位置。其實好鬼多人，都有少少擔心上唔到車。好彩最後上到車之餘仲有位座，望住啲人企足全程，唔知會唔會未行山先腳軟呢??

架巴士沿途除咗落過一次客之外就冇停過車，唔知係我咁啱座到架急行(燈牌寫住)，定其實架架都係急行呢？ 再望下錶已經係11點，比原先計劃時間晏咗好多。今日應該冇可能照計劃完成行程，如果唔去高尾，時間就即時鬆動好多了。

由於有好多人會由高尾行到過嚟陣馬落山座巴士走人，呢到有個好大個休息室比等車嘅人入去座。休息站旁邊仲有厠所，厠所旁邊仲有單車友，車友後面仲有傻佬(掛住影相，遲晒都仲未出發) 。

好，真係出發行山了?

呢條窄窄嘅車路叫做陣馬街道，睇地圖見佢會圍住陣馬山山腰打個轉再落山去JR藤野站嘅。有得爬坡，路線長又少車，難怪啲車友嚟呢到操車。

依？有得扱印喎，拿拿臨扱番個印仔先。

跟住再行多幾步就喺呢到轉右，路旁有指示牌，跟住行就得喇。

影個近鏡，個指示牌寫住和田峠同陣場山，就係冇陣馬山。其實陣場山就即係陣馬山，而日文”馬”同”場”嘅發音都係一樣嘅。(記得山手線高田馬場點叫嗎？) 咁點解陣場會變成陣馬呢？好似又有段故，不過都係唔好扮勁亂噏一啲自己唔肯定嘅嘢喇。至於和田峠，照地圖顯示佢係陣馬街道接入上陣馬山嘅山徑入口。

見到陣馬街道個路牌就知冇行錯路。

由巴士站去登山口係一段長命斜，雖然係行梗馬路，但係唔太需要擔心安全。因為直到和田峠嘅呢段陣馬街道大部分時間都係唔比車入嘅(好似係，除非唔係)。

路邊嘅小溪流水都幾靚

嘩~有瀑布喎，不過係人做嘅。

行咗差不多半粒鐘，嚟到山徑入口了。

入口有指示牌，今次呢個又寫住陣馬山喎。

仲有個登山路線圖，梗係要睇下佢乜料先啦。

今日準備行地圖上用紅色線標示嘅新行山徑(新ハイキングコース)，唔知點解叫新，亦唔知佢有幾新。沿紅色新徑上山行到大半就會接番黃色山徑(ハイキングコース)，最後上到山頂。而啡色就係啱啱行梗嘅陣馬街道。如果想易啲可以繼續沿車路上山，去到和田峠先至接入黃色山徑上山頂。

確定路線無誤就出發，頭段啲路好靚吖。

熱門山徑指示好充足

之後有部分路段又斜又崎嶇，亦有部分泥路比較濕滑。向上行還好，但如果諗住要由呢段山徑落山就要小心啲喇。

感覺良好~

開始有紅葉睇喎

啲紅葉加埋週圍環境真係好正，只係我技術同器材都唔好影唔到出嚟。

仲有400米，越嚟越接近山頂。

嘩～～～見到富士山喎～

終於上到嚟山頂，見到隻馬。睇吓錶如果行得快嘅話，係應該夠時間行去高尾山，不過成段路都未試過，中途有乜阻滯就冇時間走盞。咗諗右諗都係覺得風險太高，搏唔過。今次要敗走高尾了(仲係座飛機嚟敗走)。

忽然有大把時間，可以慢慢影吓相。隻馬比起想像之中細

山頂有一共有3間茶屋，最旺嗰間就係下面嘅清水茶屋。

清水茶屋有烏東同麵食，座喺到望住咁開陽嘅風影吔嘢應該會好享受。不過我帶咗好多麵包上嚟，又唔想拎返去隔夜，唯有等下次再嚟試(唔幫襯就唔好座喺人地啲位到食嘢喇) 。

山頂面積都幾大，有大草坪可以座。四邊都冇嘢阻擋，風景算係唔錯啦。見到四維啲樹葉唔係燶晒就係落晒，如果我再早幾個星期嚟行可能會好靚都唔定。不過就得山上啲紅葉嚟又就唔到山下面嗰啲，所以都係就番一般紅葉時間嚟好啲。行山睇到紅葉就當係 bonus 啦。

唔覺唔覺就hea咗大約半粒鐘，係時候走人。時間實在太多，可試吓由另一條備路線經一ノ尾尾根落山。

落山嘅樓梯口就喺清水茶屋旁邊好容易就會搵到。

沿路落山會經過幾個路口，大致上都係靠左行就得了。

當然最好梗係睇下指示牌，記住下一個要去嘅地點啦。目的地係落合。

行呢段山徑感覺好正，清清靜靜。泥路面有輕微彈性，行同跑都好舒服。

行行下好似見到一個帳幕

整得個牌喺到，可能有啲特別嘢都唔定。

睇嚟似乎係一個避雨嘅地方。

右邊又有一個路口，唔洗理繼續直去就得喇。

落去有巴士站喎，不過呢啲位置嘅巴士站都唔荒會多車，可況喺呢啲郊區地方等巴士會變化石係常識吧？

繼續靠左直去。

行到最尾一個路口，我估應該左右都一樣嘅，不過我揀咗右邊。

行完了。入口旁有一棵好大吧櫻花樹，不過呢個時間嚟就只係得樹枝。

跟據個牌，由山頂行落嚟有4公里路程。行得好舒服，唔覺唔覺就行完了。

跟沿住宅區嘅車路一直向落行就可以去到登山口，見番陣馬山道。

查實上陣馬山又點止一條路，不過我估呢啲路應該都係本地人先會有興趣去行。

前面呢條就係陣馬街道，又再見番佢。睇地圖行出去路口轉左，再行多2公里就到車站。

出到嚟梗係影番張相，陣馬山登山口。跟住仲要行多２公里去藤嘢站。

沿陣馬街道行出藤野，途中經過呢個陣馬登山口站。巴士班次極疏，無謂嘥時間等。

嘩～呢條井沢川又幾靚喎。如果早啲嚟到有太陽照到仲正。

繼續沿馬路邊行，跟住指示牌就冇錯

藤野站，仲有１公里。

嘩～冇行人路咁刺激？有少少懷疑到底係咪可以行出去架呢？

行多陣見到有另外兩個人，我估都係同我一樣喺陣馬山落嚟諗住行出去藤沢座車。咁都安落啲?

嘩～又有刺激？入隧道會比車車死架喎。。。

好彩，再行近啲睇下見到個牌話人行人路都安心啲。

幾持別喎

離開隧道就見到火車軌了，繼續直去。

橫過火車軌之後再轉右，再行前少少就係藤沢站。

今次行山之旅完成。衰咗行唔到去高尾山，要等下一次機會再試。趁仲有時間，快啲入站座車返去高尾先。

大約半粒鐘之後返到嚟高尾山口站

今次嚟高尾山發現多咗一樣新設施，就係比山友洗鞋嘅水喉。其實除咗1號路係全程石屎路之外，其他路線都係正常山路(泥路)嚟嘅。試過行完4號路之後對鞋黐滿泥，真係要讚下啲日本仔做嘢幾鬼貼心。

難怪咁多人嚟睇紅葉，行兩步就有靚景。可惜己經冇光。

其實時間好尷尬，仲有粒幾鐘先至天黑。但太陽已經收晒唔玩得太耐，一場嚟到唔上去睇下又好唔抵。咗諗又諗，都係決定上去打個轉。

買張來回飛，返嚟時就唔洗排隊買飛啦～

叫得做紅葉名所就梗係有料到，四維都有靚紅葉。

轉個頭就上到嚟。嘩～勁多人喎，想座吊椅返落山仲要等一粒鐘！咁攪法真係等到天黑都未落到山，不過唔理得咁多，既然上咗嚟就行埋先至再算。

差唔多４點，都無謂妄想可以上埋山頂。喺附近hea行影下相仲好。

由觀景台望出去加埋啲紅葉真係勁靚。

４點過後開始天黑冇嘢睇了，係時候落山。返去車站見人潮有增無減，唔想等唯有行路落山(頂～蝕咗一程車錢)。見指示牌話要用４０分鐘，咁計落到一半就要摸黑落山，不過有咁多人一齊行冇有怕啦。一於去馬。

估唔到連行落山嘅路都塞人，好彩最後大約２０分鐘就落完山了。比想像之中快，嚟到出口個天都未黑齊。

最後用一杯肥仔雪榚嚟為今日嘅行程畫一上個完美嘅句號?。

行程記錄

行程準備

去日本行山言語不通又人新路不熟，一定要做好準備。除咗交通資料，路線圖就係最基本嘅嘢，有詳細地圖就更好。秋冬季節日本嘅日照時間好短，計劃行程時最好將完成時間定喺16:00，再用扣數嘅方法嚟安排走線。後備路線最好就定為原路折返起點，因為時間同路面情況都比較有把握，必要時可以確保自己喺入黑之前安全離開山區。不過我今次就好好彩有多一個選擇，有另一條比較短嘅路落山。將原路折返變成plan c。當然邊行邊留意時間係係重要嘅，有乜唔對路要預時間行返轉頭吖嘛。

路線圖參考資料：

藤野<>陣馬山登山路線 (藤野観光協会官方網站)
http://info-fujino.com/hiking/224.html#more-224

西東京巴士 (靈園32號)
http://www.nisitokyobus.co.jp/rosen/noriba/takao.html