東涌梅窩大澳返東涌

今次出呢個唔係記錄行山路線嘅 post，想參考路線嘅話可以慳番啲時間走人。但如果係有興趣好似我咁樣去行大嶼山，呢個 post 可以提供一個時間參考，再制定一個啱你自己嘅 plan

繼之前敗走同再敗走之後，開始重新估算自己嘅想法係咪可行。雖然體力上可以應付遠行，但未夠班可以長跑。自己又唔鐘意入黑之後行山，超過40公里嘅路似乎冇乜可能喺日照時間短嘅秋冬季節完成。但如果喺12粒鐘日照嘅夏天行，體力消耗大增又攪唔掂。唯有考慮呢段春夏交替嘅時間試下。

今次好好彩。其實本來係打算星期日去行山，但喺星期五睇天文台預測話星期六天陰多雲，溫度又比較低。決定提早一日出發，結果舒服嘅天氣幫我保留咗唔少體力。如果遲一日去，有可能會變成第三次敗走都唔定。

路線：東涌市中心>東涌碼頭>白芒>奧運徑>梅窩>鳳凰徑第1段>南山>鳳凰徑第2段(爛頭營)>伯公坳>鳳凰徑第3段(鳳凰山山頂)>昂坪奇趣徑>昂坪廣場>昂坪道(鳳凰徑第4段)>鳯凰徑第5段(羗山)>羗山郊遊徑(龍仔悟園)>鳯凰徑第6段>大澳>東澳古道>逸東>東涌市中心
全長：47.77 km
時間：11小時10分

路線概覽(按圖放大)

今日路線GPS紀錄可除便download參考

今日準備長征，出發之前一定要食個充滿力量嘅餐蛋麵。吔完就座車入東涌

08:31AM – 到東涌站之後第一件事又係食，去聖安娜買飽～本來諗住食得晒。結果全日只係食咗兩個。

買完飽，影下個死城

再望下遠處嘅鳯頂就知今日都唔慌會有風景睇。

08:35AM – 正式出發～

08:38AM – 好快就嚟到360車站隔離呢個逹東路花園

08:40AM – 公園行到尾就上行人天橋

08:47AM – 轉個頭就已經過咗東涌碼頭嚟到之後呢條行人天橋，又再過返去對面。

09:00AM – 行多一段路就到咗油站

09:01AM – 穿出去先～

09:01AM – 前面遇上行山友，唔知佢哋目的地係邊樹呢？應該唔會係東涌掛？

09:13AM – 嚟到海邊，今日咁早呢條路冇乜人

09:16AM – 行咗幾個字終於到白芒。過埋條隧道就開始係澳運徑

09:37AM – 由東涌出發行咗成粒鐘嚟到呢樹，正式開始有山了

09:53AM – 到逹老虎頭郊遊徑交滙處

10:24AM – 行多半粒鐘落到嚟銀鑛灣海灘

10:28AM – 嚟到今日第一個補給站，過咗呢到之後上大東過鳯凰沿路都唔會有補給。一定要帶夠水先好。

10:31AM – 查實以行山嚟計今日天氣好好，多雲又唔算太熱。一枝1.5L應該夠飲了。

10:53AM – 行咗好耐終於上到嚟入口，開始上大東

11:51AM – 再行多一粒鐘就上到嚟双東坳。為咗慳時間，唔上二東繼續沿鳯徑行

12:03PM – 到黃龍坑郊遊徑交接路口

12:05PM – 欄頭營大霧到乜都睇唔到

12:08PM – 喺濃霧入面行爛頭營，其實感覺唔錯。當然咁大霧就唔好唔生性咁離開主路去行小徑喇。

12:12PM – 18 號屋，今日呢到終於都唔迫人了

12:52PM – 咁鬼大霧上大東都冇嘢睇，一於又 skip 咗佢慳多啲時間嚟完成之後嘅路。由爛頭再行大約 40 分鐘就落到嚟伯公坳涼亭

12:55PM – 今次1點前就行到嚟伯公坳，比之前兩次都早。有希望完成目標，馬不停蹄出發上鳯凰山

1:12PM – 離開凰頂大約仲有三分二嘅(橫向) 距離

1:42PM – 大霧之中嘅南天門，下面傳嚟好多人聲，應該係有行山團上梗嚟

1:43PM – 感覺良好，繼續上山

2:05PM – 終於上到嚟鳯頂了，要休息一陣

2:23PM – 休息咗10分鐘就繼續上路，轉個頭落到嚟暫柴坳。

2:45PM – 雖然今日完全唔塞人，但都好咗用好多時間先至落到嚟昂平

3:00PM – 先前喺梅窩買嘅1.5L水啱啱好飲晒，離開下一個補給點大澳唔係太遠，買一枝750ml就夠了

3:01PM – 計落時間似乎有啲趕，唔諗咁多行埋落大澳先至再算。

3:23PM – 其實由昂平行到入口路程都唔短，加上今次冇乜點跑用咗差唔多半粒鐘時間先至落到嚟

3:24PM – 又要上，快啲上～

4:05PM – 行咗40分鐘，嚟到羗山山頂了

4:16PM – 離開羗山沿鳯徑行冇耐就嚟到呢個同羗山郊遊徑交接路口，以順路同慳時間計一定係直行。離開鳯徑轉行羗山郊遊徑落去龍仔

4:27PM – 行咗個 shortcut，前面又接番鳯徑了。

4:35PM – 好嘢～悟園條石橋整番好了～

4:56PM – 予計出由大澳出東涌時間要用兩粒鐘，只要5點前落到大澳就有機會完成目標。最後急急腳行成功趕到check point, 可以繼續趕了

5:04PM – 行到嚟巴士站，有一刻諗過座車走人。好彩見到咁多人排隊，即時又決心行埋最後呢少少路出東涌

5:06PM – 入到嚟大澳梗係要整番枝紫貝天葵啦～不過今次大鑊了，市集勁塞人

5:18PM – 出發返去東涌，時間係晏咗少少。但預計天黑前一定可以離開山區，一於去馬

5:57PM – 大約行咗 40 分鐘，終於嚟到深屈。唔可以放慢，仲有大半嘅路要行

6:28PM – 再行半粒鐘嚟到深石村，目標係天黑前要離開沙螺灣村

6:39PM – 掂晒，六點八就已經到彿頭水池

6:50PM – 轉個頭又到咗觀景台

6:51PM – 已經到達自己定嘅”安全區域”﹐可以影張相先再慢慢行都未遲

7:13PM – 繼續沿古道行，經過封閉咗嘅棧道入口

7:14PM – 天全黑了，同時亦已經離開山區

7:20PM – 行多一陣就係逸東邨，可以放鬆地行返東涌了

7:44PM – 行咗11粒鐘返到嚟起點，兜咗一個大圈。失敗兩次之後，終於能完成到目標真係好開心～ 可以開始諗下為自己定一個新目標了

其實每個人行山都有佢自己嘅目的，有人為打咭，有人為征服，有人為鍛練，有人為影相。我攪唔清楚自己為咗乜，影相？鍛練？接近大自然？定係為行山而行山呢？可能每樣都有少少。但我肯定自己唔會係為征服而不斷挑戰難度險峰嘅人，我會安於自己熟悉安全嘅賽道，好似龜兔賽跑入面嘅龜一樣不停步慢慢走向自己目標(因為跑唔快) 。