今日試吓行段未去過嘅路,屬於探路性質,目標係想確定由花瓶頂落山橫過高速公路再上大山嘅一段路線。其實當要搵一個自己唔清楚情況同位置嘅入口嘅時候,最好方法就係由另一邊已知嘅路段行過去,將唔確定嘅入口變成出口。奈何呢段路另一邊入口係老虎頭效遊徑,而我又習慣由東涌起步,咁唯有行遠少少,先由東涌行去白芒,再上起點老虎頭郊遊徑。
路線:東涌>東涌碼頭>白芒>奧運徑>亞婆塱>老虎頭郊遊徑>老虎頭>榴花峒>大輋峒>犁壁山>大山>大陰頂>花瓶頂>青馬收費廣場
全長:20.65 km
時間:6小時18分
座狗鐵入到嚟東涌,一出站就見到得意嘢。咁梗係要影吓相八吓先啦。
哦~原來佢係今年山賽嘅吉祥物,睇吓啲人用嘅時間。。。真係好L快囉~ 其實講跑山絕對係冇資格同人哋比較,就算淨係講早啲起身去行山呢樣嘢,我都係輸咗九條街。人哋跑完返嚟我都仲未出發,真係晏咗啲囉?
八掛完畢,出發。
先係行去達東路花園,再經天橋出海旁。
公園盡頭就係行人天橋。
睇圖,不解釋。
跟住就沿海邊行去東涌碼頭。
行到街尾就過去對面,繼續沿行人路直去。
跟住行到見到天橋就上,過對面繼續向前行。
跟住喺前面再轉番左。
之後就會去到油站。
過埋油站之後就冇補給站架喇,帶唔夠水就好加喇。
跟住喺油站另一邊嘅窄路行出去。之後一直沿海旁行去白芒。
影相時間~~正所謂買完唔用等於冇,所以今日就拎咗一包過期嘢出嚟用吓。100c啲藥水放得太耐真係會乾水架。
呢段路一邊係海,另一邊係雞鐵路軌。間中就會有車喺你身邊高速經過。全條線得呢到可以咁距離睇到,算係景點之一。咁一定要用個針孔嚟影一張,可惜under咗?。
拎住張炒粉相死死地氣行到嚟白芒。
過隧道之後就係跟奧運徑行。
左穿右插一輪,終於嚟到上山嘅入口。跟住沿斜路上去。
嚟到涼亭,轉左正式開始今日老虎頭之旅。
起步前望吓張地圖,以呢個比例,係冇可能睇到目的地嘅。
開波冇耐就經過一個球場。
呢段郊遊徑嘅都算係熱門路線,啲路好易行。
行行吓見到特別嘢喎。呢個叫做仙桃石,就啱角睇又係幾似嘅。
再向前行又見到佢,我第一眼睇到就覺得佢似隻龜,不過官方叫法好似唔係咁。
吖,估唔到呢段路有咁多奇石,呢舊好似比人一嘢擗開咗咁。
今日個天好清望到好遠,遠到連 ICC 同 IFC 都睇到。
咁重拎埋個針孔出嚟梗係要影吓相嘅,就同隻龜影一張先。
再行多一大餐,終於嚟到老虎頭。
行落去睇吓,個 view 好靚喎。成個愉景灣睇晒。又係影相時間了~
頂~衰手震。不過相紙珍貴,衰咗就算數,唔會再影過。
同部機一齊影番張相先~
正當我擺梗位同部 pinhole 影相時,又比我見到奇石!今次係個日式屎坑,真係幾似架?~
影完相,執埋啲嘢就繼續行程。
啲山脈望埋去好靚,不過仲要行埋過去心情就會唔多靚?
呢到落去之後有轉右就可以去愉景灣,繼續再直去就係去欣澳嘅方向。
仍然仲有好多山要上。
呢到有個天線站喎,唔知係做乜架呢?
前面有三角測量柱,睇番地圖,呢到叫做犁壁山(263M)。
欣澳在望了。
嘩頂~乜咁高架。
好L辛苦,終於行到上嚟大山。
寫住咗幾高,唔洗我講。
大山上面風景一流,可惜開始日落迪欣湖已經入咗山影。
跟住由呢條小路落去,都幾斜。
出口位置有絲帶標記,當然唔會係比我呢個落山嘅人睇啦。係提醒要上大山嘅人入口位置。咁我要上大陰頂又點呢?轉右囉實頭。
好在啲草都唔算太密,條路好清楚。
小徑盡頭有建築物喎。
原來係電訊機樓。
出嚟之後繼續轉右沿石屎樓梯落去。
嘩乜咁鬼長嘅,落幾多又要上番幾多,仲肯定會上到突。
最後嚟到公路邊,穿橋底過去。
上番嚟之後轉右。
草叢後面一條路。
行入去之後就會見到墻邊有維修道入口。
見到第一條樓梯就上。
之後轉左繼續行。
好L多草。。。
行多陣條好番好多。
繼續上。
之後就嚟番呢個熟悉嘅入口了,今日探路成功。不過都仲係要行埋去花瓶頂先至算數。
好,起程上花瓶頂。
回頭望一望,迪欣湖黑晒了。
遠處見到花瓶頂枝測量柱。
嚟到花瓶頂了,影吓條青馬橋先。
有位影友喺到喎。
正~啱啱好可以睇埋個日落。
出咗一身汗,停喺到睇日落cool down咗,跟住比啲風吹埋嚟即時凍到抽筋。此地不宜久留,拿臨落山。
到巴士站,座車走人~
路線記錄
Total climbing: 1294 m
Total time: 06:17:56
發表迴響