東龍洲打圈行

上次去唔成，今日再去東龍洲，由地鐵站慢慢行去三家村碼頭大約要 15 分鐘

穿過商場直行出高超道

向前行到尾就係碼頭

吸取左上次經驗，今日提早少少去到油塘以免再送船尾，原來碼頭已經有好多人喺到等船

船費 $38 已經包左來回兩程，買飛時要決定回程時間，如果想提早或者遲走就要睇下有冇位淨先得

想去東龍真係一定要 check 船期，淨係得星期六日同假期會開，平日係冇船嘅

出發了

好鬼好天，好少九月幾都仲有咁靚嘅藍天白雲

第一次由呢個角度去望三家材天后廟

天有不測之風雲，原本鬼咁好天，去到東龍洲又忽然落大雨

睇下個雷逹圖淨係自已頭頂有雨雲，真係比佢玩死

半邊好天半邊落雨

雨過天青了，呢場雨就攪到啲路濕晒

出發行山

沿碼頭小徑行第一個見到嘅地方係合全士多，好似有好多野吔咁喎，不過今日目的係行山唔係吔野

諗住環島行一圈，睇地圖大約已經知道路線，加埋有咁清晰指示一定冇錯

行左冇耐就開始有風景睇

原來呢條靚靚石屎路係喺 1984 年由政府出錢起嘅

向前行係營地，轉右條路係上配水庫(個牌係咁寫)

行多兩步又見到有個牌指住去海灘，梗係要行去八下

呢道門幾特別喎

行左一陣就到海灘，仲有一個碼頭

海灘超靚，真正係水清沙幼，冇垃圾好乾淨

海灘另一邊有個石灘，一樣係好乾淨，仲比我見到海膽殼

離開海灘向營地進發，有個牌寫住特別地區，有幾特別先？

特別地區可能係話風景特別好 XD

營地呢到風景真係好靚，難怪咁多人入嚟露營兼影相

喺營地行左一陣，見有個牌指住話去炮台

行前少少有間屋仔，入面有介紹炮台嘅歷史資料

原來呢條路只係去炮台遺址，冇野睇嘅

去完炮台運吉，喺營地另一邊搵到呢條唔係好明顯嘅上山路

左定右？係轉左嘅

沿路一直上山，路開始崎嶇唔太好行。行行下仲要行入去啲高過頭嘅草叢，如果唔係今日超級好天有個太喺頭頂陽曬住，以我咁怕死見到呢啲路一定唔會繼續行

行左好鬼耐都仲係草叢，地又因為之前場雨濕晒跣到 PK，好彩係地面嘅路都好明顯

終於有一個位可以離開草叢睇到靚風景，仲幾涼爽

繼續行，沿路又係密密麻麻嘅草叢，去到尾段見到啲草有少少唔同，再行前少少就到山頂了

山頂係個發射站，上到去只得一條窄窄嘅路，轉右沿鐵絲網直行

冇耐就行到出來發射站入口，呢種圓形列陣式嘅天線喺長洲都有一個

由發射站望向前面個山頭見到有個直升機坪

沿路行落山，前面好似突出來嘅地方叫南堂尾

繼續落山

依，前面有個指示牌喎。直去出碼頭，轉左去八掛

360m 都唔係好遠，一於去八下

路雖然短，不過都係斜路落山，即係八完之後要上斜。不過呢到都有風景睇，值得

行到南堂尾燈塔，見個閘打開左仲生晒草，應該都係荒廢左好耐，一於入去睇下

呢個圍晒鐵絲網嘅地方似乎係天線發射站，再加上地下呢個圓形築遺跡就更加肯定．估計可能係山頂上面個天線站做好之後呢到就停用荒廢

天線站呢到查實冇乜野睇，而向海嘅一邊係冇鐵絲網，嘩～呢到有種跳崖嘅感覺

向南面望可以見到好濶海平線

熱到傻左，水又差唔到飲晒，要用龜速上山行出碼頭。回望啱啱八街完嘅南堂尾，真係幾靚

似乎就快到碼頭了，不過前面好似有個觀景台喎，又去睇下先

觀景台 view

觀景台嘅另一邊有一條樓梯，可以落去睇古石刻。不過如果唔想為左望一望個冇乜特別嘅石刻而行咁多樓梯，最好諗清楚

到了，真係想問下點解啲古人唔去高啲嘅地方刻

呢個法定古跡查實冇乜野好睇

石刻位置

睇完石刻繼續行程，終於都返到原先嘅出發點嘅合全士多

去到士多第一件事係先隊一支水

走人了，呢到咁靚一定會再嚟