沙螺洞之旅

由於怕死同怕比狗追，喜歡自己一個人行山嘅我係絕對唔會入深山去搵廢村．早前係 facebook 到見到話有人帶團行山兼入廢村影相，於是諗都唔諗就報左名參加．今次路程需然好短，來回都只係十二公里，但係就有少少意想不到．

一朝早成大班人係大埔火車站集合，沿汀角路行到鳯園入口附近，有個牌寫住沙螺洞路，直行就開始上山．

沿路上山都冇乜野睇，難得有一個位有少少風景睇下 ．拿拿林拎部電話出來掃張全景．
繼續上山，石屎路開始消失，再行冇耐就係一個唔多明顯嘅路口轉左開始’入村’了．
再行冇耐就發現一間石屋，成班人入晒去影相．屋入面乜都冇，墻邊本來係電制位發現大量蛋殼．唔好講話人，連小昆蟲都搬走晒.

領隊Simon 指示繼續前行，跟住開始感覺大獲了．開山刀出動，鞋開始入水同黐滿泥．．．最後去到一條小水澗，即時攪掂～～濕晒．
幾經辛苦，係大雨中開路終於到左一間廢屋，就係李屋了．原來 google map都有標示(驚)． 不過落住大雨，又入左 ISO 100 菲林，部機可以慳唔拎出來．只好用電話影左前面發生嘅刀光劍影．經過一輪斬殺，我地到逹左第一個目的地李屋．

落住大雨，又唔夠光．唯有影下地上嘅古董生力啤

全靠部手機，總算係屋外影左一張屋入面情況，有個暖水壼． 門外邊射入去d光有少少 ’回家’ 嘅感覺．    
落住大雨，成團人都謝晒，冇乜心機影相．於是大隊冇繼續開路就決定回頭了，行番出來時又好似好好天．吹漲．

之後出返去路口直行去到張屋，情況比李屋好，似乎有多d野影．可惜傳說中有餐蛋麵食嘅士多冇開．成班人係附近影多左一段時間就走人了．