今日放假，無無聊聊咁落咗去中環。目標係想試吓搵個比較輕鬆嘅方法山頂，行扶手電梯上。由於估計喺市區行，除咗拎張地圖就乜嘢準備都冇了。原來所條登山電梯只係會上到半山，設計上係冇預計你會繼續行上山頂嘅。仲好貼心咁教你行番落去纜車站座纜車。真係7到冇朋友，都仲好意思攞出嚟講😂。不過無論如何，今次都行咗啲特別嘅地方，包括想去睇好耐嘅大館。
路線：中環半山扶手電梯>大館>扶手電梯>干得道>香雪道>舊山頂道>芬梨徑>山頂廣場>柯士甸山道>山頂公園>夏力道建身徑>夏力道>港島徑第1段>西高山炮兵觀察所(龍虎山觀景台)>西高山>夏力道>山頂廣場>芬梨徑>白加道>山頂道>甘道>灣仔峽道>荷蘭徑>馬己仙峽配水庫>荷蘭徑>寶雲道(二十一孔拱劵段)>灣仔峽徑>堅尼地道>藍屋
全長：22.07 km
時間：4小時59分
Total climbing: 2013 m
Total time: 04:59:19
出發地點係士丹利街街尾呢條行人天橋，N年前成日都會嚟嘅呢到睇相機同買菲林。自從啲相機鋪冇晒之後，家陣好少再過嚟了。
呢條天橋以前都紅過一陣，因為曾經有套蝙蝠俠喺到拍過外景。
講咗好耐想去試吓，不過成日都咁多人。應該都係繼續得個講字架喇。
沿住扶手電梯上，行行吓見到可以轉入去大館，咁一定係入去睇吓先啦。
啱啱開放嗰時好L巴閉，要預早登記先入得嚟參觀。家陣熱潮過咗，加上係閒日，可以自出自入都冇人理你。
影吓啲倉嘅情況先。
今日睇完終於知道點解座監叫入冊了。
呢座都似係啲古老建築嚟喎。
吖，呢隻門好特別喎，好似對眼咁👀。
呢個呢，係停屍間嚟嘅🥶。睇介紹資料話以前冇冷凍設施，如果有囚犯死咗，喺法醫嚟之前就放喺到用水淋張石床等佢降溫。聽到都有啲驚。
睇電視成日聽話入水飯房，原來真身係咁嘅。
繼續四維行參觀，呢到係葯房嚟架喎，每次只準一個囚犯行入去紅圈入面。
參觀完由後門離開，我估呢到係後門。
哈，幾攪笑喎，分明剃你眼眉。
好，又行返去座登山電梯先。
嘩，幅墻畫得好靚。
好喺呢到行返上去。
依~呢個好特別喎，係回教清真禮拜總堂。
嚟到登山電梯嘅盡頭干德道，睇吓跟住要點行先。
佢叫你沿路行返落去再座纜車上山，咁我行上嚟做乜L嘢，真係吹漲。不過公平啲咁講，條電梯係主要係整嚟方便附近啲居民上落嘅，只係我當佢係旅遊設施，一廂情願咁意為可以用嚟當山徑咁上山頂。
既然已經上到半山，冇可能會咁戇居行返落去座纜車。一於試吓搵路繼續向山上面行。沿干德道向前行少少，比我見到呢條樓梯。由呢到上去可以去到香雪道。
上到嚟香雪道，跟住又再試吓上呢條樓梯，結果領咗嘢。原來係豪宅啲後樓梯嚟嘅😵。
衰咗行返落嚟，應該係隔離呢條似啲 。
上到嚟一個公園仔，旁邊有路喎。
跟住接入一條不知名嘅小徑。
小徑盡頭又再落返嚟香雪道，之後落去沿行人路繼續直去。
行到尾嚟到舊山頂道。
掂晒~可以行舊山頂道上山頂了。依？做乜呢到又有指示？唔通我又7了？不過睇番地圖，應該冇7到。
唔理咁多，沿住舊山頂道一直行上去，會經過豪宅區。
最後嚟到呢到。
跟指示牌，繼續靠右邊呢條路上。
景點，維多利亞城界碑。
隻爪又噴得幾靚喎。
呢個都好有特色喎，係煤氣公司嘅。
行完了，前面熟口熟面，係白加道嚟嘅。
掂晒，轉多兩個灣就上到去山頂廣場。
好，又影張到此一遊相先。
今次先行上去山頂公園。
鏡頭一轉就上到嚟了，估唔到閒日上嚟會一個人都冇。
O shit~ 連小食亭都冇開，冇得買嘢飲。
影吓呢個老翻富士，🗻西高山先。跟住就要行過去。
轉個頭就落到嚟盧吉道，跟住再行多兩步過去夏力道。
過到夏力道就可以接住行去港島徑第一段。
地下有啲粉紅粒粒。
啲粒粒其實係吊鐘花嚟嘅。
行到嚟龍虎山觀景台，可以望到下面矮矮哋嘅摩星嶺。
身後面有一個叫西高山茶園嘅地方，行入去就可以搵到上西高山小徑嘅入口。
入口有少少嚇人，好斜。要手腳並用先可以上得到去。
不過上去之後啲路情況又唔係太差。
臨近山頂有一小段比較斜。
之後就上到嚟山頂。呢段路上還可以，但行落去就可免則免喇。
跟住行正常嘅山徑落山。
又再返到嚟公園仔。
跟住就沿夏力道行出去山頂廣場。
到了，跟住經芬梨徑落去白加道。
嚟到白加道又入去車站影吓纜車先。
好，睇完纜車就繼續行程，沿住白加道行出去。
白加道嘅豪宅靚 view
平時會由呢到轉落去漆咸徑，不過今日直去。
一直行晒成條白加道去到尾，出到嚟見到前面打橫呢條就係山頂道。之後行過對面馬路再轉左沿行人路直去。
沿行人路直去。
行到見到第一個路口就係甘道，轉右行落去。
甘道係冇行人路嘅，不過車唔算多。而且啲車同人都好似已經習慣咗一齊行呢條路咁。
甘道盡頭就係灣仔峽了。
過馬路落去灣仔峽。
沿灣仔峽道落，好快就嚟到荷蘭徑入口。
跟住就行埋呢條荷蘭徑。
荷蘭徑唔係全段石屎路嚟，中後段係正常嘅山徑泥路。
嚟到尾段會見到有樓梯可以行落去寶雲道，不過今日唔落去住。繼續行埋出去睇吓出口係點情況先。
呢棵樹仲未清理，又要擒過去。
好，又嚟到配水庫了。
第一次嚟嗰時影得唔清楚，今次再影過。
之前行完配水庫就返轉頭落寶雲道，冇行埋出嚟睇吓出口情況。今日尊心行埋出嚟睇睇，確定一吓下次就可以串連埋一齊行了。
好，又返到嚟荷蘭徑，準備落去寶雲道。
全程係樓梯靚路。
到了，落去就係寶雲道。
落到嚟寶雲道條路就即時變得好闊好易行，同時感覺已經返到市區。
不過今日仲有一個景點要去，嚟到呢個分岔路繼續沿寶雲道行。
到了，個景點唔係合和中心下化🤔？當然唔係啦，要睇嘅就係前面呢條路。咁條路又有乜特別呢🧐？就咁睇又確係冇，其實特別在呢條路下面係好有建築特色嘅拱門。同行懸空棧道差唔多，唔講都唔知原來自己下面係咁特別(唔好諗咗去第二度🤣)。
跟據介紹資料，呢條其實係輸水道嚟。依家已經係法定古蹟嚟架喇。
再向前行多一段，終於搵到一個轉灣位可以影到少少。
繼續沿路行，嚟到同灣仔峽徑嘅交界處。
之後轉去灣仔峽道落山。
跑咗一大段好鬼斜嘅斜路之後嚟到堅尼地道。
今日嘅終點站，藍屋。
發表迴響