無聊影吓相 — 老爺機配過期FP100C

自從知道廟船準備上岸就間中嚟避風塘望吓，早排見到新廟已經起好，都係趁早再嚟影吓呢隻就嚟消失嘅廟船。不過唔知點解我呢條友正正常影吓相唔得嘅，硬係要用啲奇奇怪怪嘅相機攪一大餐影啲鬆郁朦嘅相先至安樂(藝術嘅嘢你識條鐵咩)。今日出動咗部柯達 hawkeye 摺機同埋pinhole 2.0, 仲有啲過咗期好耐唔知仲用唔用得嘅 FP-100C。

影完未搣出嚟都知道唔多樂觀，pinhole 機嗰pack 已經乾水，好彩呢張係最後一張嚟。啲菲林開咗慳住慳住唔用，結果放得太耐唔係 fog 咗就乾水，已經唔係第一次了。

呢 雖然冇乾水，但入喺個片盒入面太耐有少少漏光。加埋部機太耐冇用個快門慢咗唔準，簡單啲講即係炒咗粉🙈。

衰咗一張，第二張收多級半就正常番。出嚟啲色水都幾靚。

基本上用部 pinhole 嚟影嘢好少會衰，不過 pack 菲林衰就冇辦法。雖然成張都 fog 晒，但仍然一望就知係 pinhole 相😀。

好，兩 pack貨尾都用完， 睇吓遲啲有乜嘢大時大節特別日子先至開包新嘅嚟用，希望到時仲用到啦。