今次去日本旅行時收到舊同事喺 whatsapp 吹水 group 傳來嘅資料，話有一間北海道好出名嘅甜品店將會進軍香港，摩拳擦掌咁話一開就要衝去試。估唔到事隔唔夠一日就比我喺成田 T3 fasola 入面嘅雪櫃見到呢盒嘢。以佢呢個外其貎不揚嘅外觀加上 1800Yen 嘅價錢，唔識嘅實在冇乜可能會買。今次真係要多謝呢位舊同事，如果唔係佢我一定會走寶了(可借我分到比佢嘅就只係得葡萄XDD)
買嘅時候店員拎住張紙走埋嚟，奇奇怪怪地用英文問我講要用乜語言，跟住就貼張紙上個盒到。原來佢地係要肯定你知道件餅怕熱，如果離開個雪櫃太耐就唔可放得耐要盡快食，再放番入雪櫃都唔得嘅。大至上係唔可以超過５粒鐘，咁我座飛得慢又成日delay嘅廉航，返到香港都用咗６粒鐘，再加埋座遊勻全機場嘅N車返到屋企都７粒鐘了，死梗啦。雖然有少少擔心但係都決定搏一搏，返到屋企唔理三七廿一照放入冰格，再訓多幾粒鐘就拎佢返公司。
一返到公司就放咗佢入雪櫃，等到下午茶時間拎出嚟嘆。急不及待拆開包裝紙皮，見到發泡膠盒上面印住 FORMAGE DOUBLE，好似好有誠意咁喎。跟住就諗，頂！啲錢咪用咗喺呢啲無謂嘅包裝上面囉。跟手諗住打開佢，奇怪地開唔到。。。點解個盒蓋咁實嘅？又見唔到有膠紙黐住。。。為咗唔想整爛個盒，結果要同同事＂合力＂打開佢。之後發現原來呢個發泡膠盒蓋邊做咗一個凹凸坑位，冚埋時就會鎖到實一實，咁個盒密封保冷能力就更好。啲日本仔諗嘢真係好細心喎，頂佢個肺。。。
打開個盒蓋之後即時見到鬼咁大包冷凍啫喱，依 ？掂喎，咁照計我拎嚟拎去又凍又熱都應該唔會出事掛？
嘩，個包裝好靚仔。個盒用真木做架喎，成個蒸籠咁款。但係點解頂同底又就咁用印咗木紋嘅紙嚟做咁cheap？再諗深一層就明白佢咁做未必係為咗慳皮，而係因為薄紙皮喺傳熱(冷)性能上比木好得多(我都知紙都係用木做嘅)，咁放喺上面嘅冷凍包就可以更加有效地凍住個餅。有時日本仔啲嘢就係佢細心做咗你都會唔覺唔覺冇為意，再次頂佢個肺
繼續驗屍咁驗，封條上面有日期。原來雪住佢可以放到幾個月架喎，不過解凍過就唔可以再雪番，要即食囉。再講，邊到有可能會忍到放咁耐唔食吖～
攪咗咁耐終於都打開個盒，見到件餅了。原來入面仲有個密封膠袋嘅，等我之前仲鬼咁驚佢溶咗會漏汁。諗住買嘅朋友可以好放心，就算買完拎住佢曬太陽佢都只係會喺個袋入面變成屎餅，唔需要擔心佢漏汁流到一地都係嘅
最後包裝紙上面再次提醒件餅解凍之後就唔可以再雪，同時介紹半解凍同全解凍係有唔同食味。寫晒日文我識條鐵咩，拿林開埋佢食仲實際
打開個餅，聞唔到預期之中嘅濃烈芝士味。再哄埋少少就索到淡淡嘅香味(好香)，之不過個外觀同佢影相出嚟差咗一大節。唔肯定係咪因為舟車勞動熱完又凍，凍完又再熱所以攪成咁。唔理咁多，食咗先講
應該係我太心急解凍時間唔夠，切嘅時發現件餅仲係好硬。切開之後見到明顯嘅兩層芝士蛋榚，上面嗰層係未焗過嘅。食落去口感就正如佢描述好似食雪榚咁，味道唔算濃。隨之而嚟嘅就係爆粗。。。好戀好味呀～DKLM
之後就扮晒嘢咁唔叫啲同事過嚟，再同自己講既然冇人食我就食多一件啦～食下一件，食下又一件。。。。
食下食下就越食越濃味，似乎一個蛋榚真係有兩種食法。家陣諗番轉頭應該一早開半時就拎半個去熱一熱佢，咁就半邊濃香，半邊清淡。咁攪法買一個真係唔多夠食。總結今經驗係唔需要太過擔心件餅會因為座五六粒鐘飛機就變壞，去開旅行見到又想試就不妨買一盒嚟試下。佢個包裝做得好好，運送對件餅嘅問題唔大嘅，至少我食完咁耐都未見肚痛～
發表迴響