今日想試吓一段未行過嘅路，由伯公坳經南大嶼郊遊徑去石壁。路程同難度都唔高，不過要座巴士去起點伯公坳實在係太麻煩，所以先上一上爛頭營再落去就順路喇。頭段由東涌上雙東坳會比較辛苦，爛頭之後直到引水道唔係落山就係平路，可以輕鬆好多。最後一段由石壁上昂坪一段係緩慢上升，亦唔會太辛苦。到昂坪之後查實應該繼續經救援徑返東涌，不過時間唔夠最後決定座巴士走人。

路線：東涌>雙東坳(鳯2)>伯公坳>南大嶼郊遊徑>塘福引水道(鳯10)>石壁郊遊徑>昂坪
全長：24.5 km
時間：6小時13分

路線概覽(按圖放大)

交通方面照舊座狗鐵去東涌站，喺D出口行過對面馬路富東街，再沿澳運徑行一少段就cut上去。
image

見到個爛鬼澳運徑牌，繼續直行。
image

一路沿單車徑行去到橋底，再行前少少就係入口。
image

嚟到入口，不斷聽到工人鋸樹嘅聲。
image

似乎附近嘅塌樹都清理咗了。
image

轉頭就嚟到上山嘅樓梯口，跟住沿護土墻旁邊嘅樓梯一直上到尾。
image

扯一段好爽皮嘅樓梯之後嚟到最頂，之後就係上山嘅小徑入口，開始上山。
image

朋友話行山時唔鐘意見到樓景，我就冇乜所謂。只要夠高夠開陽就係靚景。
image

嚟到呢個路口，今日崎嶇嘅山路都行完了。之後都係一般郊遊徑嘅靚路。
image

今次再留意，仲係搵唔到之前見過嘅標距柱。到底係我發雞盲，定真係比人拆走咗呢？(影相位置並唔係先前標距柱所在地)
image

舊相：2016年尾行呢段路時見加裝梗標距柱，家陣好似不翼而飛。陰謀論咁諗，有標距柱即係郊野公園範圍，如果要發展附近地方，當然唔會比佢進一步擴大。咁呢到附近可能會變成緩衝區都唔定，可能係我諗多咗，又可能係我一知半解。不過我估就算係起樓都唔會起到上嚟，應該唔洗擔心住。再講，可能真係我發雞肓，唔好吓吓諗住個福街政虎唔聲唔聲喺背後做嘢。

呢段路風景真係唔錯嘅，而且相對上比較少人行，係旺季避人潮一個另類選擇。
image

行吓行吓見到路邊有野生蘭花，好靚喎。
image

終於嚟到雙東坳，連接鳯徑嘅路口。
image

行多陣就嚟到黃龍坑郊遊徑入口，想走頭返東涌可以由呢樹落去。
image

行咗咁耐連今日嘅起點都未到，所以唔去二東又唔上大東，沿鳯徑行用最短路程落去伯公坳。不過一場上到嚟，喺落山之前影多一張貝澳風景先啦。
image

今日落山冇塞人，但係我落山嘅速度似乎冇快到?。
image

嚟到伯公坳喇，開始今日試新路之旅。
image

同一個入口，可以上到鳯頂，又可以落去水口。
image

上幾級樓梯之後就轉左，跟指示牌向塘福引水道行。
image

呢段路似乎冇乜人行。
image

行行吓要穿過啲石陣，幾特別喎。
image

嚟到呢個路口轉左，轉右就上番鳯凰山。
image

一段平路之後係長長嘅落山樓梯，落山途中可以遠望到水口灣。
image

行完了，下面就係塘福引水道，亦係鳯凰徑第10段。
image

由伯公坳行到落嚟一共有3公里左右。
image

行出去就係塘福引水道，跟住轉右一路係咁行就得。
image

行又長又悶嘅引水道，最啱就係邊行邊開餐。今日個提子飽似乜呢？竟然係似一個提子飽，實在係少有?。
image

第一次由呢個角度望鳯凰。
image

呢段路除咗係鳯凰徑第10段之外仲係單車徑嚟架喎。
image

路口指示仲有三公里到水口，鳯凰徑走線會離開引水道落山去水口。不過我目的只係去石壁，所以會續沿引水道行到尾。
image

行咗差不多成粒鐘終於都行完條引水道，見到前面石壁郊遊徑嘅入口。
image

image

第二次行呢段路，上一次係由昂坪落嚟，今次就掉轉行上。
image

有警告喎，睇嚟呢段路啲塌樹都未清晒。其實都預咗會係咁，拿拿臨上。
image

開波有耐就有塌樹，好彩呢個好容易就可以過到。
image

景點，狗牙嶺入口。
image

石壁水塘
image

終於上到嚟昂坪，行落一粒鐘，行上粒幾鐘。
image

睇太陽嘅位置就知今日晏咗，唔夠時間行返東涌了。
image

既然冇得行落山，咁就盡快座巴士返東涌。今日試路完成～
image

路線記錄

Total distance: 25302 m
Total climbing: 2079 m
Total time: 06:12:51
Download file: tungchung_gpx_2018-10-06_1127.gpx