早前元旦行大運因為時間唔夠而挑戰失敗，嚟到農暦新年又有行大運嘅機會。今日要再試一次行晒環湖八仙嶺同九龍坑山，好開心終於能夠順利完成。最有趣係行完發現路程記錄竟然同上次敗走只係相差唔夠一公里，時間亦用多唔夠半粒鐘。但分別一個係上九龍坑山落太和，一個係汀角路出太埔，就咁聽都知分別有幾大。咁到底係今次自己行得特別快，定係上次行得特別hea呢？好明顯係後者?。今次完成咗呢個目標，下次應該都冇乜能力可以再加碼升級挑戰了?。
路線：大美督＞船灣郊遊徑＞新娘潭路＞八仙嶺自然教育徑＞八仙嶺＞鶴藪＞平山仔＞沙羅洞＞九龖坑山>太和站
全長：37.55km
時間：10小時21分
今日想試吓盡量早啲入到嚟大埔，結果只係比上次提早咗10分鐘?。
長征例牌菜，出發前一定係要食個餐蛋麵?嚟提升一吓心理同身理質素??。
鏡頭一轉已經座小巴入到嚟大美督，拿拿臨行入去水壩起步。
經過燒烤場附近圍晒水碼，特別在佢張警告出埋?﹐到底你整乜嘢咁危險，駛唔駛☠️咁嚴重先?。
繼續行去水壩，今次喺海邊見到好cute嘅兔兔艇仔。如果有莎利就仲正?。
終於嚟到起步點，時間係8:23分。比起上一次只係早咗大約10分鐘?，不過有信心今日應該可以完成目標。。出發~
上到嚟水壩見到有一大班人喺到影梗大合照，唔知佢地係咪同我一樣諗住嚟環湖呢？
行咗大約2公里嚟到水壩尾，好清楚望到之後要行嘅八仙嶺同黃嶺。由呢個位望埋去都真係幾靚。
跟住就穿過道閘行入去水塘另一邊嘅副水壩。
再行大約1公里多啲就嚟到水塘另一邊，見到條副水壩。
出水壩之前又行出嚟碼頭望吓，今日天氣好好望過對面馬鞍山好楚。
雖然嚟過好多次副水壩，但每次嚟到都一定會影吓相。
今日啲雲真係靚到不得了，係咁影係咁影。。。
對上一次嚟係元旦日，相隔個幾月之後再嚟啲芒草已經疏落咗好多了。應該話係差唔多冇晒。
好喇，嚟到郊遊徑入口。時間係9點16分，正式出發~
指示牌話距離鹿湖峒有6.25公里要行3粒鐘，呢個應該係用超級hea行速度嚟計算，實際唔需要用3粒鐘咁多。
行咗一段路之後嚟到長牌墩，見到枝測量柱了。
行咗1公里，仲有5公里要行。其實去到鹿湖峒大約只係完成咗環湖一半路程，之後仲有一大段路要行。
例牌菜，每次經過一定會影一影佢，跟住仲要行過去”對面岸”呢。
頭段過後去到鹿湖峒之間嘅路段其實冇乜嘢好影，最值得留意就係呢啲標示咗淨餘距離嘅指示牌。差唔多仲有4公里。
擰轉頭望吓已經離開水壩一距離了，一左一右有馬鞍山同八仙嶺。
又有一個牌，今次寫住話仲有唔夠一公里。
依～個牌仲未整番好喎。
最後一段石級，上埋佢就到鹿湖峒。
到了～
又喺招牌位置影張招牌相先，一定要朝早嚟影相先至靚。晏咗就變逆光啲山會黑鬼晒。
影完風景同自己打個咭係常識吧？影埋就可以繼續上路了。
今日啲湖水比太陽照到好似識發光咁，好特別。
嚟到觀音峒，指示牌變咗標示去烏蛟滕嘅距離。仲有5.25公里。
一路行一路行，行到嚟呢個叫大峒嘅分岔口。
直行經下苗田4公里，後面條路經馬頭峰就4.5公里。
其實仲望乜鬼，環湖經馬頭峰係必然嘅事。
下苗田嗰邊係咪靚路會好行啲就唔知，因為一次都未行過。但呢邊就可以肯定係爛路。
繼續行多一段之後嚟到橫嶺坳，又有一個分岔路口。情況同啱啱過咗嘅觀音峒一樣，兩條路都可以去烏蛟滕，一條影行(估計)，一條難行。
指示牌話兩條路用嘅時間同距離都一樣。
一定係繼續揀馬頭峰呢邊嚟行。
行到見到枝測量柱，係時候休息一陣。
趁休息時間拎個飽出嚟吔先，食定嘢陣間先有力上八仙。(點解個飽會咁正常，乜都幻想唔到)
已經飲咗一枝750。其實今日都一樣係抬咗3L水出嚟，因為買唔到1.5裝就買4枝750囉。啲環保L見到應該會詛咒我。。。?
好L辛苦啲山好似上極都有咁，上埋最後呢個應該就(暫時)有好日子過了。
終於都上到嚟馬頭峰嘅測量柱。
個牌寫住呢個高295M，距離烏蛟滕仲有大約2公里。
鏡頭一轉就嚟到郊遊徑嘅出口，完成咗今日第一段路了。
又影吓個地圖牌先，行完影吓佢都有啲滿足感。
之後就起程行去新娘潭路。
跟路旁指示牌轉落去。
落到嚟沿石橋繼續直去。
上到嚟新娘潭路了，已經望到對面馬路嘅八仙嶺自然教育徑入口。
上山之前又望吓個地圖板，陣間要沿自然徑行到一半再轉上去八仙嶺。
好～又再起步了，時間係1點15分。
行咗一陣有個分岔路口，上八仙繼續直行就得喇。
鏡頭一轉又嚟到郊遊徑同衛徑交滙，跟住轉左行上去。
好L辛苦咁上咗一段路嚟到八仙嶺樓梯口，跟住就轉右上去。如果要敗走返大美督直行就可以。
好鬼長喎條樓梯。。。好彩冇乜人，可以除咗個口罩嚟行。
轉個頭又上到嚟仙姑峰，見到啲”柱女”喺到影梗相。
最爽皮嘅時刻，吹住風嚟睇靚風景。今朝由大美督閘口出發用5粒幾鐘行到上嚟，快就唔算喇，不過應該都唔係太慢啦。咁樣望吓啱啱行完嘅環湖路都幾有滿足感。
好喇，又係時候座低食個飽休息一吓。今日買啲飽真係錯L晒，個個都咁正常咁唔掂架喎。第時都係要買番提子飽好啲。
休息完就繼續行程，向鶴藪進發。
好靚～
好L攰，好L攰。。。
其實八仙嶺只係得一少段，前面仲有個犁壁同屏風山要行。距離鶴藪仲有超過7公里路，起碼都要行多2粒鐘。
轉個頭又行到嚟黃嶺，上埋去影張相先。
黃嶺山頂測量柱，咁啱有啲耶穌光射落嚟幾鬼靚喎。
呢度望到成條水壩，馬屎洲，三門仔同慈山寺。風景一流～
其實再望遠少少仲可以見到陣間嘅目標九龍坑山，好似好L遠咁。
離開黃嶺再行一段，見到另一個指示牌。距離鶴藪仲有大約4公里路，都仲有一段距離。。。
終於嚟到尾段落鶴藪嘅樓梯，其實行咗咁遠對腳攰攰哋仲要落呢啲樓梯都有啲辛苦。。。
落完條長命樓梯嚟到鶴藪，轉右可以行出水塘座車走(唔知要排幾耐)。轉左就經平山仔出沙羅洞，咁梗係照原定計劃轉左啦。
其實呢段路好短又唔難行，好快就可以出到去沙羅洞。
最正係相對少人會行呢邊。
呢條木做嘅小徑好靚，每次行過都會影一影佢。
好喇～到逹沙羅洞。見到下一個目標，山上面嘅發射站。
有葉嗰時見唔到，啲樹葉落晒就見到啲巢，係好L多巢。
出到嚟路口轉右。
沙羅洞地標，又影一影佢先。
好喇，終於嚟到今日行程最後一段，出發上九龍坑山。時間係5點20分，預計可以喺天黑之前落山。
上～
山頂在望。
雖然話在望，但都其實仲有一段接一段嘅樓梯要上。
臨到尾段啲樓梯就整齊好多。
終於上到嚟山頂發射站了。
上到嚟山頂，正常都會影吓枝測量柱嘅。
山頂有影友喺到等梗拍日落，不過自己唔係太想摸黑落山，睇咗一陣就閃人了。
望到沿山脊起嘅山徑路線，陣間就會沿住佢嚟落山。
離遠望埋去穿過一個個山頭嘅路都幾靚。
落天梯～
再行一段就上到嚟玉秀峰嘅測量柱。
就算唔係為咗打咭，為咗記錄行程都要影一影枝標嘅。
今日雲層厚，日落鹹蛋黃比雲遮晒冇嘢睇。先前喺山頂等日落嗰位拍友應該會失望了。不過景得風景嘅都應會該習慣間唔中食吓白果?。
呢舊石本身唔係新嘢，但上面啲白色就係肯定新油上去嘅。對上一次行都未有。
過咗玉透峰之後嚟到涼亭，淨低最後一段差唔多行完了。
呢度啲樓梯係今日最好行嘅樓梯，可以話係落得好舒服?。
經過枝廢標又影一影佢。
落到嚟出口，今日啲山行晒了✌?。
到逹大埔頭，跟住就係行出去太和座車走人。
經過敬羅家塾，之前都好似唔覺有兩個?大燈籠?掛喺到，可能過時過節先會掛出嚟。點著咗又幾靚喎。
行到出嚟太和路就行前去斑馬線過馬路返去太和站。
返到嚟太和了，今日行大運之旅順利完成?～
路線記錄
Total climbing: 2287 m
Total time: 10:20:33
發表迴響