去京都行個短山–京都一週徑–清滝川

話說我2017年年尾去咗日本旅行，8日行程入面有4日去咗行山，諗起都開心。事隔接近一年，就清理一吓呢啲積壓咗咁耐嘅舊 post，順便比自己回味一吓。不過出埋呢個，其餘嘅隔咗咁耐都唔知仲會唔會再有心機去寫。

今日去京都西面嘅嵐山區行山，起步點係JR山陰本線保津峽站。由京都站出發只需要20分鐘車程，十分方便。電車會途經嵯峨嵐山站，如果想行山之前先參觀一下旅遊景點，可以早一個站落車。去完嵐山同渡月橋影相，之後再返嚟座車去行山。JR嵯峨嵐山站隔離係遊客必座嘅觀光小火車車站，呢架觀光火車都會途經今日行山嘅路，不過應該唔會有人咁傻座兩個站就落車去行山囉。

路線：保津峽>清滝川>高雄>高山寺
全長：10.08 km
時間：3小時14分
日期：2017-11-27

由JR站行大約十分鐘就嚟到天龍寺，見門口寫住紅葉見頃，為免中伏都係唔入去參觀。

喺天龍寺外面個停車場行下，都有啲紅葉影下嘅。

離開天龍寺行出去桂川途中見到宝厳院入面啲紅葉好似好靚，決定入去行下影下相。

宝厳院果然有料到，加上時間早人流少，可以狂影相。影到飽晒，就算陣間行山冇料到都唔會太失望?。走人～

一場嚟到，唔理頽唔頽都要去渡月橋影張相嘅。呢個招牌位置只有一早嚟座山先至會食到光，晏啲嚟就由則光變成背光，冇得影架喇。影完呢張相就可以走人座車去保津峽。

鏡頭一轉就嚟到保津峽站。

呢個車站好特別，月台係喺一條橋上面。一落車就可以望到橋下面嘅桂川，仲有座滿人嘅遊覽船

呢個站叫做保津峽，咁我估眼前呢個咁靚嘅峽谷應該就係保津峽了。

車站出口喺月台(橋)嘅盡頭

好明顯呢個唔係多人嚟嘅站，除咗冇站務員，連出閘機個閘都冇。

離開車站第一樣見到嘅嘢就係呢個巴士站，目的地係嵯峨水尾。咁呢個肯定唔係我要去嘅地方，可以續繼向前行了。

一條馬路沿住行就得了。

行咗一陣嚟到一個分岔路口，旁邊見到有指示牌。

好，轉右。目標係トロッコ保津峽站，即係觀光小火車離開嵐山之後嘅第二個中途站。

跟住落嚟一直都冇行人路嘅，要沿住馬路邊行。間中會有私家車經過，不過日本人揸車唔會好似香港人咁樣，所以唔洗擔心行馬路有危險嘅。

有風景睇了，呢條橋就係啱啱嘅保津峽站喇，個景幾鬼靚～

再行多陣就要入隧道

可能叫過山窿會啱啲，超短嘅隧道

見到落斜，呢段就跑一跑啦～

跑跑下聽到火車聽，再加快腳步去車站。可惜仲差一段距離，望到站嘅時候架火車已經過咗一半了。冇機會影個火車頭了

不過一場嚟到，點都落去睇下先啦。

要過多半粒鐘先至再有第二班車經過，當然係唔會等啦。

車站由吊橋連接，夠晒特別。

雖然今日好好天，但係喺峽谷影相想有靚光係要靠運氣同時間嘅，作為遊客實在冇可能企喺到慢慢等。唯有影幾張就走人，繼續行程。

臨走影多次個保津峽站。

路邊嘅導遊地圖(按圖放大)

繼續沿馬路行。

冇耐又見到另一個山窿，路邊仲有幾個本地拍友唔知喺到影梗啲乜。

原來係影梗桂川，個景係幾靚嘅，可惜光位唔啱。

山窿旁邊有條路，唔知通去邊樹。

行一週徑最正之處就係指示充足，加埋手上拎住地圖好快就知道自己位置同跟住要點行。旁邊條小徑係掘頭路嚟嘅，行兩行就要返轉頭。既然係咁，即係去八吓應該都唔好好嘥好多時間啦。

都有啲景睇吓喎，頭先嗰幾位拍友應該行嚟呢樹影。

原來條小徑可以通落去川邊，別有洞天喎。呢到係清滝川盡頭同桂川交滙嘅地方，呢個景就算係比錢座船都睇唔到架喎。

沿清滝川行出去桂川邊，咁啱有遊覽船經過。上面啲人似乎有啲奇怪點解川邊會有條戍李企喺到影相。

呢到有一間好似荒廢咗嘅茶屋，加埋啲紅葉幾靚。

離開川邊上返小徑，盡頭比樹阻住。可能繼續去會去到嗰間茶屋都唔定，不過算啦，都係返一週徑繼續行程好啲。

繼續過山窿，呢個比起先前嗰個長咗少少。

山窿後面係一條紅色嘅橋，橋頭寫住清滝川。

過橋之後行多陣有分岔路，路邊有指示牌。今日係要行清滝川，終點站係高雄。

地上面有好多紅葉，加埋四維嘅環景超正。

如果係擺拍呢張相就冇乜特別，不過啲紅葉唔係我放上去嘅。影得唔好只係我技術問題。

仍然係指示充足。

沿路行見有啲塌樹，原來連地標柱都冇運行。睇嚟係之前打風吹爛晒啲嘢都未整番好。

沿住川邊行感覺超正，可惜冇陽光影唔到靚相。川水清到不得了，不過啲風吹埋嚟好鬼凍，流住鼻涕咁嚟睇有啲剎風景囉。

行行吓有條橋。

啲指示真係好L清晰。

呢個位夠晒暗，可以影到流水了。

仲有0.7公里。

行咗咁耐終於見到人，仲要係一大班人。呢班係啲本地啊叔啊嬸團(我想要yama girl啊)，佢哋成幾十人，除咗慢慢跟喺佢地後面真係冇咩可以做。點知跟咗一陣後面一個大叔就同我講嘢(佢應該係負責殿後嘅)，我當然唔知佢問乜。雞同鴨講咗一陣佢知我係一個人嚟行山，跟住佢就大聲ge lee goo lu咁同前面啲人講，之後佢地一個傳一個咁企埋一邊讓條路比我過先。攪到我勁唔好意思，唯有一邊過一邊人肉mp3咁講輸me媽聲(すみません)

行到近隊頭，似乎已經冇人發現我呢個外來人。唔通成功混入佢哋？未住先，我唔係咁大叔下化？

跟住要照指示過兩次橋

呢到好靚，本來想企多一陣影吓相，不過後面嚟梗幾十人，都係繼續行快兩步好過。

要過呢條橋，不過穿過橋底繼續向前之後先至過亦得。

行上去過前呢條條橋。

跟住過對面。

路邊有指示牌，目的地係高雄。

先前班大叔冇過橋走晒，我估佢地該係返去嵐山。成條路又得番我一個人行(正~)。

好，出發。

跟住喺前面個路口落去。

指示牌方向係有少少奇怪嘅，唔太清楚。都係要睇下地圖先。。。

指示牌有附近山路地圖(按圖放大)

其實只要行前多兩步就會見到指示柱，睇佢就一定唔會行錯路。

北山93，即時清楚晒。

開始見到又高又直嘅牙籤樹，翻查資料，原來呢啲叫做北山杉，係北山特產嚟架喎。咁北山又即係邊樹？應該係指京都北面一帶嘅山區，手上拎住嗰分地圖都係寫住北山嘅。

又有塌樹。。。

見番少少陽光，行呢段路感覺好舒服。

終於嚟到全程主要景點，亦係我行呢段路嘅目的。

叫呢到做北山杉並木又好，叫北山杉隧道亦好。總之就係好靚好有氣勢。之前見過一張呢到嘅相，之後一直好想知呢到係乜嘢地方。後來搵到知道呢到係東海自然步道，就再搵相關嘅行山資料。今日終於比我自己行到嚟呢到，真係好開心。

兩排又高又密嘅樹將陽光都阻擋晒，隧道入面比較暗。地面因為冇陽光濕氣散唔到，變成濕淋淋嘅泥路。

影飽相離開導道，繼續向高雄進發。沿路仍然有唔少北山杉，不過就唔會再有隧道。越嚟越接近高雄，開始見到有人了。

繼續跟指示牌向高雄方向前進。

路邊見到有枝路入口，仲有個臨時指示牌。查吓原來係當地山會大形行山活動嚟嘅。

唔知行上去會係乜嘢地方，末有準備都係唔好亂嚟。如果將來有機會再嚟，可能會行上去睇下。

臨近高雄，指示牌轉咗做中川。係過咗高雄之後嘅地方嚟。

有車，咁即係到了。

嘩，原來呢到有酒店

前面呢條叫做高雄橋，另一邊就係上去神護寺嘅路。

一場嚟到，有諗過去神護寺參觀吓。不過見前面好似仲有兩間寺，就去最遠嗰間。家陣諗番轉頭真係有少少後悔。

高雄觀光地圖，呢到附近好似都幾多嘢睇咁喎。(按圖放大)

其實除咗行山，應該大部分人都係會座巴士嚟高雄。呢條樓梯行上去就係巴士站。

我當然係唔會咁快座巴士走，繼續行。

經過第二間寺，又係過門而不入。一於去最遠嗰間高山寺(世界文化遺產喎)。

依？行行吓上咗嚟馬路。。。。

噢，好在路口又有指示柱。

繼續沿路邊行。

到高山寺了，門口都有少少紅葉睇吓喎。

又係比錢時間，入去行個圏。其實好多時經過啲寺都會過門而不入，一來係為咗慳時間，二來係怕比錢入場之後發現中伏冇嘢睇。吓吓幾百円，夠食好多雪榚嘛。

好多時啲寺地方好大好多殿，但入到去大部份都唔開放。本來已經冇乜嘢睇，仲要呢樹唔開嗰樹關閉。文化遺產未必係風景靚嘅，嗰啲乜嘢日本最古化茶園，對我呢個敷淺嘅遊客嚟講真係一啲可觀性都冇。今次高山寺係繼龍安寺之後又一中伏代表作。

走人。由高山寺出口行落嚟過對面就已經係栂ノ尾巴士站，可以座車返去京都。

呢架巴士會途經其他旅遊景點，如果時間尚早，可以中途落車睇睇。如果想返去嵐山，可以座到去御室仁和寺站落車，再轉番嵐電。

後來我冇乖乖企喺到等巴士，反而戇居居沿住條路行咗去下一個站。跟住見到槙ノ尾站企滿由高雄上嚟嘅人，即時知錯死死地氣行返去栂ノ尾等車(嗰邊一個人都冇)。結束今日行山之旅。

行程記錄

行程準備

今次呢條算係易行路線，由於冇乜上落，體力需求唔會好大。主要準備係買一份京都一周徑嘅地圖(北山)，再事先睇一吓就ok。路程大約有10公里，要預定合理嘅時間去行，越早出發越好。交通方面由京東站出發，座JR山陰本線大約21分鐘就可以到逹起點保津峽站。買地圖資料可以參考呢個 post 尾段介紹。