短行花瓶頂

對上一次行花瓶頂係年幾前嘅事，嗰次老友話想影青馬夜景，我就水佢同我一齊試行花瓶頂。喺山頂四維行嘅時候發現好似有路可以行去迪欣湖，講好話下次要一齊試下(之後下就不了了之) 。最近老友忽然舊事重提，馬上就成團了。

最衰自已今朝唔知醒，起身時老友己經準備出發座巴士去青馬。本來諗住水佢話座地鐵由欣澳過去會方便啲，可惜今次佢唔受昆話自已座巴士去。唯有約佢喺花瓶頂等埋我再一齊行過去。查實點會有人咁傻約人行山會係山上邊等，結果因為時間相差太遠，佢等得到發毛自己走咗。兩條友前後腳各自一個人行山，而我最終都冇去到迪士尼。

講番行山，雖然呢條係短距離路線，但呢條唔係一般正式郊遊徑，所以唔會有任可指示牌。如果平時少喺郊遊徑以外地方行山嘅朋友未必會習慣。路程長短同難度係冇必然關係嘅，行山最怕係失預算，更加唔好零準備就去衝。

路線：欣澳站>翔東路>欣澳道>大陰頂>花瓶頂>青馬巴士站
全長：4.76 km
時間：2小時

路線概覽

話說我言之鑿鑿咁同朋友講話可以由欣澳上山去花瓶頂，其實自己從來都未試過咁行。之前係睇地圖見花瓶頂附近一帶山頭都有小徑連接，而喺大陰頂就有小徑落去欣澳道附近，於是就推斷可以由路旁行上山。今日行發現實際情況同預期有少少出入，好彩最後都可以成功由欣澳道上山。路線紀錄包括咗我戇居居搵入口時來回上落欣澳道(行錯路)嘅路線，可以參考一下

終於入正題，起點係欣澳站。呢個站只有一個出口，一定唔會＂出錯＂

出站之後轉右，向厠所方向行

過咗厠所之後再行前少少，右邊會見到另一條路。轉入去沿小徑行

行到尾會見到一條行人隧道

落隧道之後就可以穿過路軌嘅另一邊

隧道一出嚟就會見到前面呢條樓梯，行上去繼續

上到嚟馬路邊，轉右再行一陣就係翔東路。之後轉左沿翔東路上斜

因為踩單車嚟過好多次，翔東路同欣澳道對我嚟講一啲都唔陌生。翔東呢到係冇行人路嘅，雖然車唔算多，但為安全計最好係靠右邊(逆線)欄杆入面行

由翔東路轉右接入欣澳道，繼續沿右邊(逆線)欄杆向迪欣湖方向行。可以見到間中有凶狠嘅大泥頭車經過，要留意呢段路啲車嘅車速一般會比較快，唔好心急過路。先繼續沿路邊向前行

咁幾時先至過馬路呢？睇圖會清楚啲。當你沿右邊行到盡頭無路可行時，你就會見到對面有另一條路可行。當然你先要有勇氣踏出一步(即係擒過馬路中間石壆)。

過馬路之後發現原來花槽後面係一條都幾闊嘅路。到底呢條係日久失修嘅行人路，定係路邊花槽一部分？攪唔清楚，anyway，行咗入嚟感覺安全得多了

繼續沿路邊行

行到見到渠口旁呢條斜樓梯就轉上去，呢到就係行上山嘅入口。好明顯呢啲路唔係整嚟比人行山，而係比工程人員用嚟做斜坡檢查同維修嘅。

呢到啲石屎路仲靚過啱啱喺下面行完嗰啲疑似行人路，沿水渠行，見到第一個樓梯口唔駛理佢繼續直去

第二條樓梯都唔駛理，繼續直行

行過左邊條路繼續去

繼續行，當見到第三條樓梯要轉左上去了

似乎有好長嘅樓梯要上喎，個人覺得上呢啲咁均稱嘅樓梯唔會太辛苦。沿樓梯上去，行到盡頭時轉右再繼續上

吖，原來下面都好似可以上到嚟

再行多一陣又有分岔路口，今次靠左，仍然係繼續上樓梯

上完樓梯之後繼續沿住維修道行，去到呢個轉彎位就係山徑入口，轉左就正式開始行山。唔知係行山前輩喺護土牆起好之後開出一條山徑，定係因為開闢公路同做護土牆而打斷咗原來嘅山徑呢？照睇郊遊地圖上面嘅山徑走勢，有可能係後者。

唔覺唔覺行護土墻都好似行到好高咁喎，遠處見到迪欣湖

堅起步了

初時諗住呢條小徑應該冇乜人行會生滿草，行咗一陣發現條路好闊好明顯。似係一條多人行嘅小徑

嘩～呢到個景好靚喎，如果再好天啲就好了。之後喺山上嘅路好開陽，枝路亦唔多。只要拎住地圖又分到方向就好易行

繼續向大陰頂進發

上到大陰頂諗住影番張靚相啦，點知企咗好鬼耐舊黑雲都唔肯走。四維都曬爆，淨係迪欣湖同迪士尼烏雲蓋頂，真係吹漲。決定起行去下一站花瓶頂

去花瓶途中不忘 check下天氣，發現出發時喺雷達圖左邊嘅雨雲右移速度比相像之中快。為安全計決定唔試新路，縮短路線改為由花瓶頂行樓梯落山。

花瓶頂在望

到了

花瓶頂嘅三角測量柱

花瓶頂呢個青馬 view 都算唔錯啦，好天時連香港島都望到

落山了，似乎西北方向天氣開以轉差，藍天唔見了

見到馬路，就快到了

繼續沿樓梯落去，跟住再轉左

落完樓梯到行人路轉右直行就係巴士站

行完了，座巴士入東涌開飯