呢盒封晒塵嘅係乜野嚟呢？就咁睇好難估到佢同玩皮革有關，查實佢係我改做嘅第一代稜斬鉗。相信初學皮藝嘅人都會試過因為未掌握垂直打窿技巧，做出來嘅成品只有正面可以見人(背面就行晒雷)。想話多加練習又被家人投訴嘈音過大。要趁夜晚空閒時間打窿就更加諗都唔洗諗。所以當年初學皮時就整咗呢件工具出嚟用，工作原理同近年出現嘅座枱式打窿機差唔多
真身係咁樣嘅，呢把鉗落鴨記好容易就可以買到
到底我改咗啲乜呢？其實只係將原來個螺絲位鋸開一條坑，再喺兩邊加裝螺絲。原來嘅M10螺絲牙冇完全鋸走，所以仍然可以裝上螺絲柱做壓印工作。要打窿時就鬆走螺絲換上稜斬，不過由於鑿身幼固定得唔好，用咗冇耐就放埋一二邊封塵了
入戲肉，查實今次所講嘅改做唔係要走去攪把鉗，而係做一個鑿套將稜斬變粗。加粗之後嘅鑿可以好穏陣咁固定喺鉗坑入面，包冇走位。用得安心又放心，得咗✌
差唔多攪掂，加咗呢個套枝斬就可以好fit咁裝喺個夾上面。不過個套仲有少少虛位，所以仲要再加裝螺絲
今次試下拍片嚟示範下操作情況，但係要拍到個鑿係要扭住隻手嚟拎鉗，結果係拍得唔好之餘啲窿又打得唔好。實際用起上嚟時係好好多嘅?
其實如果再改良一下將成個鉗頭鋸走換成一個夾就乜野大細嘅斬都用到，唔知會唔會有朝一日市場上會出現類似嘅產品呢下？
發表迴響