慳時間先講重點，爛頭營一帶已經開始有芒草睇，要去影相嘅可以自行安排路線上山。如果未去過唔知點上去，冇必要參考我今日行呢條路線，可以考慮座巴士由伯公坳上山，無謂為咗影相攪到自己咁辛苦。如果好似我咁貪心影相之餘兼做運動，但又怕死要行啲大山徑，咁可以繼續花少少時間睇落去參考下
路線：東涌市中心>黃龍坑道>黃龍坑郊遊徑>鳯凰徑２段>二東山>爛頭營>鳯凰徑２段>伯公坳>鳳凰徑第3段(鳳凰山山頂)>昂坪奇趣徑>彌勒山郊遊徑>昂坪360救援徑(昂坪棧道)>東涌古道>逸東>東涌市中心
全長：21.84 km
時間：7小時19分
路線概覽
Total climbing: 1829 m
Total time: 07:18:36
今日天陰陰冇乜陽光，遠望鳯頂比雲霧包住。預計今日上山都一定係搏大霧架喇
由噴水池旁邊向住pizza hut方向行
喺東堤灣畔旁邊行人路繼續直行
沿住單車徑旁邊行人路去
嚟到隧道就轉左
之後繼續沿單車徑旁邊行
行完一段直路之後見右邊呢個窿又轉過去
其實跟住牆上面個大箭嘴行就得
出隧道之後繼續沿路直去
去到呢條行人天橋就上去
行到橋中間就轉左(如果直去就可以去東澳古道)
落橋之後過對面馬路然後轉右
繼續沿路直行
行一陣之後就嚟到黃龍坑道口，跟住轉左沿黃龍坑道行
行一陣就會經過赤蠟角新村
呢到仲有個古蹟天后宫
繼續沿黃龍坑道行到尾
路旁見到指示牌了
繼續沿住馬路行，當見到呢個水務處呢個閘口就即係差唔多到郊遊徑入口了
繼續直行
終於到咗起點了。右邊呢條樓梯就係黃龍坑郊遊徑起點
留意呢個指示牌上面寫住大東山距離2km，其實呢個只係約略數字。由呢到上到去郊遊徑盡頭(鳯凰徑交會處)就已經超過咗2km。出口亦唔係三角測量柱標示為大東山嘅地方，呢到咁寫可能大東山呢個名對大部分人嚟講比較清楚易明。所以唔需要大過執著’正名’，因為講出嚟如果冇人明都係嘥氣
2km除一除即係有四枝標距柱，可以望住啲標距柱嚟鼓勵自己(同自己講好快到，好快到) 。頭500M係最辛苦嘅，無間斷樓梯，悶熱又冇風。直到過咗第一枝標距柱之後上樓梯之餘夾雜平路，會行得輕鬆啲。
好很辛苦咁行完500M，見到第一枝標距柱C1201
有少少平路回一回氣
雖然話過咗第一枝標距柱之後冇咁辛苦，但唔等於唔辛苦嘅。完成頭1000M見到第二枝標距柱C1202，一直係咁行上到嚟其實都會幾攰。好彩之後啲路係慢慢上，堅唔會辛苦
如果真係好攰，呢到有兩張櫈仔可座下
唔座嘅話可以即刻繼續行程，跟住啲路冇行得咁辛苦架喇
行行下遇到前面呢對夫婦，帶住個囡囡嚟行山。雖然我唔知佢哋用咗幾多時間行到嚟呢樹，但肯定嘅係咁細個人仔都可以行到上嚟。所以做大人嘅就唔好搵咁多借口了。佢地見到後面有人就同小朋友講要先讓路比人，呢種行山禮儀喺日本行山時係常見嘅
行下行下就行咗1500M，見到第三枝標距柱了
唔知因乜嘢事，呢到啲樹比人鋸咗
就咁睇好健康吖～為乜要鋸咗佢呢？
行行下又遇到另一班山友，相比先前兩嗰對夫婦，呢班強國朋友就當睇你唔到。結果跟住行咗一大段路之後先至有適合位置超前
今日真係好旺，呢次遇到兩位山系少女。最正係佢哋一路行一路唱歌???(仲有氣)，遇到呢啲山友真係心曠神怡
依，唔覺唔覺就行咗2km，嚟到第四枝標距柱C1204
再行多一陣就到鳯凰徑了
行完黃龍坑郊遊徑，跟住就轉右沿鳯凰徑去爛頭營
趁冇人掃張全景先
沿路行多一陣就開始見到啲屋仔
爛頭營係旅遊熱點，行山季節上嚟成個山都係人。可以放心除便行嚟行去四維睇嘢影相，不過如果好似今日咁大霧而自己又唔熟路嘅話，就盡量唔好離開主路太遠
行去二東山途中經過8號屋
吖～呢間係幾多號呢
雖嚟過多好多次，但因為啲草太多認唔到路，搵咗一輪先至嚟到目的地
開餐時間，今日午餐係10蚊3個嘅迷你吞拿魚包。喺二東山打住霧水嚟食都幾有氣氛嘅
大霧上嚟雖然係影唔到靚相，不過身處其中感覺都幾特別嘅。拍咗一少段由二東山行返去鳯凰徑嘅路，呢段路家陣行會難搵少少。再過多一兩個月就會好好行
繼續沿鳯凰徑走人，主路好明顯一定唔會行錯嘅
行到嚟呢個轉灣位，跟住指示牌方向上斜
下一站係伯公坳
呢到離大東山仲有一段距離，聽到濃霧之中傳嚟好多人聲。似乎大霧無阻佢哋上大東嘅興致，至於我就一於慳番啲腳骨力繼續落山算了
好鬼大霧
由於中途實在冇乜嘢好影，鏡頭一轉已經落到嚟伯公坳了
續 part-2
發表迴響