計番時間已經係幾個月之前行嘅山，家陣天氣已經開始轉涼，可以考慮一吓呢條路線。

今次試下行全南丫島最高嘅山地塘，雖然佢只係得353M高，但係行起嚟比起預期困難得多。熱到中暑嘅天氣同茂密嘅草叢(仲有無數咁多嘅?????)，加上又多又唔明顯嘅小徑，實在係唔適合喺夏天行呢條路線。應該等秋冬季節，雜草較少嘅時候行，如果可以搵多一個熟路嘅人帶就更好喇。

路線：索罟灣碼頭>南丫島家樂徑 >菱角山>山地塘>南丫島家樂徑>模達灣
全長：9.54 km
時間：5小時33分
日期：2017-06-11

路線概覽(按圖放大)
image

路線記錄

Total distance: 10937 m
Total climbing: 729 m
Total time: 05:33:46
Download file: lamma_gpx _2017-06-11_1239.gpx image

今日好好天，可惜自己又衰爛瞓攪到晏晒先至出發
image

一落船即刻要掃番張全景先
image

離開碼頭之後就轉左，向模達灣方向行
image

喺地圖上畫咗適合一般行山人仕嘅家樂徑路線，至於山地塘就只係得一個標示。雖然未至於要開山爆林，但亦一定唔會係簡簡單單嘅家樂徑囉。郊遊地圖係有標示上山小徑路線，如果連一分地圖都冇嘅朋友就實在唔應該去試了
image

睇完地圖繼續向前行，見到咁靚嘅藍天白雲成個人都開心晒
image

繼續沿路行，留意右手邊會有一個樓梯口。呢個係捷徑入口，由呢到上去就係菱角山。
image

呢條樓梯可以當為係熱身，如果行完覺得太崎嶇或者太辛苦，之後嘅山地塘就唔好試了
image

起程~頭段比較多樹枝
image

行多一陣就有開陽景觀，可以見到索罟灣碼頭同對出嘅魚排
image

今日熱到嘔茄，呢段上山嘅路行起嚟真係有少少吃力?
image

越行越高，風景就越嚟越好。見到對面岸個湖
image

望到啲天線就知好快到山頂了
image

菱角山發射站
image

山上面風景唔錯
image

影完相又休完息，繼續行程。沿發射站旁邊小徑進發
image

索罟灣同遠處嘅榕樹灣三枝香
image

image

雖然目標在望，但係距離仲有好遠
image

嚟到呢個十字路口，係時候要好好評估一下自己嘅物資體力同理時間，如果發現事旦一樣唔對路最好就轉右落山算了
image

路口有指示牌，有指示山地塘嘅方向。不過佢亦係唯一一枝，之後一路都唔會再有
image

沿路行前少少有一個涼亭，有位老外喺到放梗 mavic pro，見佢著住sport mode玩得好開心
image

經過涼亭之後見到有一條明顯嘅小徑，似係上山嘅路
image

沿路行多一陣見到有絲帶記號，咁就一於繼續去。後來啲草就越嚟越密，方向亦唔對路，九成係行錯路了。唯有拿拿林返轉頭再睇睇。
image

返去涼亭附近，發現原來右邊有另一條路，無論方向同路徑狀況都十分＂似樣＂，今次應該冇衰了。
image

再行一小段之後就開始上山，路都有啲崎嶇，加上天氣太熱就更加辛苦。行咗一陣就頂唔順要搵個地方休息。可惜呢到雖然四維都係草叢，想搵個遮陰嘅地方就冇。唯有曬住嚟抖，原來唔覺唔覺已經離開涼亭一段距離了。
image

休息時梗係順便影下相，掃掃下全景發現有啲嘢喎。。。?
image

好多人行山為咗睇奇石，但今次見呢個真係有啲。。。?
image

繼續上山，目測比較之下，家陣呢個位應該已經比三枝香高出一大節。再查下資料，原來呢幾枝煙囪可能只係得110米高。難怪望落覺得咁矮
image

又見到奇石了，呢個似乜呢？好似某啲動物嘅頭部
image

幾經辛苦終於上到嚟山地塘山頂了，但另人失望嘅係山頂被草包圍住。預期嘅靚景冇出現，完全冇嘢睇。行餐懵上嚟有少少唔值?
image

落山了，路口十分明顯，望落亦唔算崎嶇
image

落山嘅路都算易行，仲有靚位影相。咁梗係要整番張自拍先啦~
image

留意落山嘅路係有得揀，一條係去涌尾天后廟嗰邊，而另一條就落去盧鬚城。為咗減低風險，揀咗熟識嘅涌尾家樂徑出口。點知未到出口就已經撞板了，今次真錯誤示範。如果下次再行，會揀盧鬚城出口試試
image

喺未知會領嘢嘅情況下繼續落山，行行吓開始遇到啲雜草窄路
image

繼續沿小徑嚟到一間荒廢咗嘅屋，前進嘅路似乎完全消失咗?。唔知會唔會係呢條路太少人行，雜草完全遮蓋咗去路。最後唯有搵一條最似嘅雜草窿(半爆林地) 向前行
image

後來見到一條工程搭建嘅鐵梯，即時開心晒。呢類鐵梯一定會通去工地出入口(雖然有少少擔心會有地盤狗)，但係喺冇更好選擇嘅情況之下就擒咗上去沿鐵梯落山
image

沿鐵梯落到工地出口，推閘出嚟想話睇下呢樹到底攪梗乜嘢工程，點知冇寫?
image

真係唔明呢個工地出口同索罟灣診所有乜闗係呢?
image

終於出到嚟熟識嘅地方，跟就可以住沿家樂徑輕輕鬆鬆行去榕樹灣
image

沿家樂徑行可以望到出發時經過嘅發射站同埋菱角山，如果要大約估計上山地嘅高度，大約就係比起菱角再高三分一左右
image

差不多到洪聖爺灣，但距離日落仲有一段時間，唯有影一張冇乜色水嘅相
image

回到繁華， 正當我喺街邊買梗炸蝦片嘅時候望到碼頭有船，即時雞咁腳衝去碼頭。原來有船唔等於會開船嘅?(今日7夠未？) ，anyway，行完收皮了~ 入冬之後先至考慮再戰。
image

後記

從來都冇post行山時嘅溫度記錄出嚟，不過今次實在奇怪，點解唔夠10km嘅路竟然要用5粒半鐘嚟完成呢？唯一解釋(賴) 係因為天氣太熱，完全KO咗我。咁有幾熱呢？
有圖睇~
image

真係自己睇到都嚇一跳，雖然我覺得可能係隻錶”報大數”，但我估35~6度都點都走唔甩?。大熱天時真係唔適合去行山，特別係唔慣喺炎熱天氣做運動嘅朋友。中暑真係可以死人嘅，山又唔會自己走咗去冇必要急住夏天去行(要影藍天白雲另計) 。