今日行程係為咗串燒三高做準備,試行由林錦公路經梧桐寨上大帽山呢段未行過嘅路,了解一下路線同所需時間。試新路梗係要預足夠時間同體力,所以好懶咁座小巴去起點?
路線:林錦公路> 萬德苑>井底瀑>中瀑>主瀑>散髪瀑>麥理浩徑8段>大帽山雷逹站>麥理浩徑8段>鉛礦坳>衛奕信徑7段>達運道>運頭塘邨>大埔墟火車站
全長:17.62 km
時間:4小時43分
嚟到大埔墟火車站,準備座小巴去林錦公路嘅梧桐寨入口。轉個灣行落隧道,喺指示牌搵唔到25K嘅位置。忽然之間醒覺個總站好似喺太和喎?,真係7到冇朋友。未起步就出事,幾時得嚟7到日落呢。。。
既然7了,唯有落番去太和座車。以我性格咁近嘅距離梗係會行過去,於是沿住 A 出口條大直路行到尾,嚟到熟食市場。
繼續行多陣就嚟到火車博物館。雖然今日係嚟行山,但既然個小巴站近住博物館,就加插行程順便行下。一個人行山嘅好處就係夠晒自由,睇完火車除時改返屋企瞓覺都仲得?
好似話N年前呢到先至係大埔墟站嘅位置
好耐冇嚟過呢到,印象之中好似從來都冇入過呢間喺車軌旁邊嘅屋仔。今次嚟有機會入去睇下,入面除咗有啲唔知係乜嘅機器展品之外,仲有啲古董車飛
原來呢間屋仔係以前車站票務處,等我幻想下有兩位靚女座喺到賣車飛先~
柴油火車頭,電器化火車出現之前就係靠佢(好似係)
舊式車廂
吖,呢個模型應該都係新嘢。不過啲比例好似有啲問題咁喎?
離開火車博物館,沿出口一條直路行過幾個街口就係懷仁街嘅25k小巴站。咁啱又有車,連相都趕唔切影就跳咗上去。為免再柒問司機確認一下係咪會經梧桐寨先至座低,之後佢見我⑩下⑩下就提我落車。落車地點正正就係地圖上面嘅小徑入口。
企喺路口諗咗一陣,呢條小徑同前少少嘅車路入口會合埋一齊,為避免村路少人行比狗追嘅風險,決定都係沿林錦公路(嘉道理農場方向) 再行前少少,由”大路”入口上山
講開又講,呢個入口對面係一個叫做白牛石嘅地方,仲有一個小巴站
大約行五分鐘就嚟到另一邊嘅入口,望落”正常”好多,啱晒我呢啲怕死嘅行山小學雞。
好~正式向梧桐寨進發
見到第一個路口,靠右繼續上
四維都有指示
第二個路口靠番左,留意路口指示牌就唔會錯
嚟到第三個路口,靠番右行上斜路
今次連地下都有指示
繼續留意路邊指示牌
跟住呢到就轉右
行多陣就嚟到呢個叫萬德苑嘅地方
行過路過又未嚟過,梗係唔可以錯過。拿拿臨入去睇下先
廟入面都幾大,其中有一座係觀音殿
深山寺廟感覺特別好
喺另一邊嘅行天宮入面有關二哥(好似係,除非唔係)
行下行下有個轉運風車喎,見佢生晒鏽都係唔敢手多多,整爛人哋啲嘢就唔好喇?
吖,呢個亭幾特別喎
跟住呢個可以話係今日最大發現,知道有呢個中途補給站,咁計劃行程就彈性大好多了
行完萬德苑,繼續原先嘅行程。向梧桐寨進發
起點有地圖,可以先了解一下跟住嘅路同瀑布出現嘅次序
由指示牌嘅密集程度嚟睇,呢條應該係好熱門嘅郊遊路段
再行多一陣嚟到一個分岔路口,有地圖同好清晰嘅指示。直行就係經瀑布上大帽山,而轉右上樓梯就唔經瀑布。
唔,先係井底,跟住到中瀑,主瀑最後就係散髮瀑。好清楚知道了,可惜我呢個金魚腦一離開個牌就已經唔記得自己睇過啲乜???
其實今次試路應該係行呢邊嘅,但瀑布似乎吸引好多喎,咁唯有唔試住先啦
指示牌話有仲3公里嘅路要行
轉個頭就到咗第一個瀑布了
呢個井底瀑行落去時都有少少崎嶇
落到嚟睇發現乜料到咋喎,如果加番個濕身版嘅井底之娃情況應該會好好多?
離開井底再行大約十分鐘就嚟到第二個瀑布
今次呢個叫做中瀑,比起頭先嗰個靚好多喎。估計上山時見到嗰啲拎晒腳架嘅拍友係嚟呢到影相
繼續行程時喺路邊見到個大山窿
又見到小澗流水
前面好似又有嘢睇喎,唔知係咪到咗主瀑呢?
行前睇下,原來只係個不知名嘅小瀑布,但係都勁多人圍埋影相。好唔容易先至搵到條隙影張相
鏡頭一轉,終於嚟到主瀑了
主瀑布好高,好有氣勢。
離開主瀑繼續行,路旁開始多雜草,後來又變成一段幾崎嶇嘅石路。起初有少少懷自已行錯咗路,直到見到呢個牌就放心了。終於嚟到最後一個景點散髮瀑布
咁啱光位就晒,可惜部廢note冇M-mode
離閧散髮瀑之後啲路變番明顯易行,大約10分鐘就嚟到前面呢個路口
睇下地圖,直行就可以落去出發時嘅分岔路口。
直行落去就可以去到出發冇耐時經過嘅分岔路口
左手邊呢條路就係上去大帽山嘅,唔洗諗都知點行啦
再行大約半粒鐘就嚟到麥徑旁邊嘅涼亭
跟住就向波波頂進發
進入麥徑之後迎面遇到好多山賽跑手,見佢地好多都謝謝哋,可能係已經跑咗好遠了。何況跑上大帽山攰係正常吧~
一場上到嚟梗要影下呢個地標波波,再行下吹下風先
今日見到有無線電研究會啲人喺到起壇試嘢喎
係時候搵個位座低開餐,今日好好伙食有東海堂嘅變色龍飽?
吔完嘢就起程返去大埔,行回頭路落涼亭,再經麥徑落鉛礦坳
第一次行呢段路有咁多人一齊,間中仲會塞人。不過人哋比賽梗,讓下人都冇乜所謂啦。可能見人跑得快,氣氛帶動之下連自己都行得快咗,話咁快落到嚟鉛礦坳了
涼亭呢到係check point
上網查一查佢哋條路線,原來由大帽山落嚟嘅跑手係喺油塘出發跑過嚟。好堅~
尾段落大埔嘅一段衛徑就更加多人,從來都未試過咁熱鬧
經過好吸引嘅小巴站,不過冇理由差嗰少少路唔行埋出去嘅。估唔到竟然連最尾呢段路都同佢哋撞線
又返到嚟大埔了,今日收皮
路線記錄
Total climbing: 1257 m
Total time: 04:43:40
發表迴響