今日又係藍天白雲嘅日子，好想走上山吹下風同影相。可惜自己衰爛訓晏起身，唯有搵啲半日短線嚟行下。諗起好似好耐冇去港島區行山，決定搵個高高哋嘅西高山嚟行，順便試下行啲自己未去過嘅地方。出發時只係諗咗前半段上山頂嘅路線，終點站伯大尼係行山途中忽然諗起想去嘅。話說伯大尼曾經做過港大校舍，雖然家陣已經轉手，夾硬講都可以話今日路線起點同終點都係港大(前)校舍，聽起嚟特別啲?

路線方面全程係石屎路，指示充足又多人行，最緊要就係風景靚同多嘢睇，唔會淨係得個行字。算係一條好易行嘅路線，如果諗住龜速 hea 行可以預一日時間，朝早出發上山，喺山頂廣場開飯，下晝再散步落山去參觀教堂。

路線：香港大學>龍虎山>松林廢堡>西高山>山頂廣場>薄扶林水塘道>港島徑第2段>置富花園>伯大尼
全長：11.44 km
時間：3小時50分

路線概覽(按圖放大)
image

唔知做乜鬼今次GPS紀錄跳到九彩，anyway, 紀錄只能作為出發前了解路線嘅參考。

Total distance: 11565 m
Total climbing: 680 m
Total time: 03:49:36
Download file: highwest_gpx _2016-06-25_1356.gpx

大學站開咗咁耐今日先至第一次嚟，要扮下遊客影張相先(即時比其他人用奇異嘅目光望下望下)
image

其實我唔太肯定應該由邊個出口出，睇地圖似乎最近係 A2。咁就一於出咗去之後睇下環境先至再作打算
image

嚟到大學本部，一定要影下呢個紀念64事件嘅國殤之柱。佢應該係港大其中一個地標
image

計劃路線時睇地圖，見到大學道尾段近馬會大樓附近有一條路可以行上山，上去之後可以再連接其他山徑去龍虎山一帶。今次亂行亂撞由本部平台繞過教學大樓，去到黃克競樓後面一條樓梯落去大學道。其實我唔肯定目標入口係咪真係可以上山，預備路行唔通時就由大學道另嘅一邊行去旭龢道入口上山。
image

落到嚟大學道就轉右，然後沿路直行
image

留意路嘅左邊，行到呢個樓梯口就轉上去。其實當時都有啲懷疑，不過附近見唔到有更似嘅入口了。一於試試
image

起步，睇條樓梯咁乾淨企理又有啲似係行山徑喎。唔知點解入口乜指示都冇呢
image

上完一段短樓梯，轉左繼續上
image

繼續沿路行
image

行到見到第二個樓梯口唔好理佢，繼續直行
image

吖，有指示牌
image

掂，確定成功進入山徑而且方向正確。繼續行
image

今日天晴曬到爆，但係行呢段路又勁舒服。有樹蔭得嚟仲好好風，完全唔熱
image

繼續直行上樓梯
image

其實行前少少就會見到指示牌，唔會行錯嘅
image

上完樓梯之後轉右繼續
image

行多兩步見到左邊呢條樓梯就行上去，留意路邊有指示牌寫住松林廢堡
image

之後都係上斜路段，會經過一個涼亭。但係上面冇乜嘢睇嘅，可以唔理佢繼續直去
image

繼續沿路上山
image

行行下忽然見到路旁有個彿像，仲有好多人放咗啲花喺到。真係奇怪，唔知係乜人為乜事整個彿像喺到呢?
image

離開彿像再行前幾步，又有另一啲做到好似係化石咁嘅嘢
image

行到嚟呢到，繼續沿路直行。左邊就有個樓梯口可以上去龍虎山
image

第一次嚟，梗係要上去八下有乜嘢睇啦
image

龍虎山個名好似好勁咁，但係行到上嚟就會發現其實一啲都唔勁。講高度佢只有253M，講風景亦只係一般，四維都比樹包住冇乜嘢睇
image

為咗想知樹叢後面有乜，擒高影咗一張360。可能 N 年前周圍啲樹未長高呢到好靚都唔定

WP Photo Sphere (R0010182_20160625143717.jpg)

上完龍虎山繼續行程，行多一陣就會見到呢個路口，跟住就轉右，照指示牌去山頂方向行
image

其實呢段路啲指示牌好足夠，跟住行就得。再唔係沿路都有大把人可以問路
image

跟住再行多幾步就會見到前面打橫呢條路，叫做克頓道。喺路口轉右
image

行入克頓道之後即時會見到前少少右邊有個樓梯口，由呢條樓梯上去
image

先有一段樓梯，上呀上
image

話咁快行完段樓梯，到咗松林廢堡了
image

廢堡軍事遺跡建築羣面積都幾大，呢個圓形嘅一睇就知係炮台地基啦
image

附近有其他建築物，除咗彈藥庫仲包括一啲比士兵住嘅営房。
image

喺廢堡週維有資料介紹呢到嘅歷史，行下睇下先至知原來呢到係全香港最高嘅海防炮台。又原來英軍為咗＂慳皮＂曾經關閉炮台，後來又重開將呢到變身做空防炮台。行山都有機會可以學到一啲香港歷史。漁護處有個網頁介紹廢堡歷史同附近建築物，出發前先睇下到現場時就更有趣
image

繼續沿史蹟徑行
image

廢堡営地另一邊有一排好似係屋嘅建築物，參考資料話呢啲係掩蔽體。查實唔係好明乜嘢係掩蔽體，係咪即是＂假狗＂呢?
image

參觀完廢堡就繼續行程向山頂進發，附近有清晰指示牌，照住行就得
image

由前面條樓梯上去
image

繼續上
image

image

上完一段樓梯之後出到嚟又見番克頓道，轉右繼續
image

又係一味沿路行
image

行到尾見到呢個牌，再行前少少就連接入夏力道
image

一踏入夏力道就會見到前面有個公園仔，上幾級樓梯行入去
image

今日嘅目標係西高山，地圖上見有三條路可以上去。而其中兩條就喺呢個公園仔入面，搵咗一陣就喺草叢入面隱約見到一條路。以我咁怕死(常用字彙)梗係唔會試，繼續搵埋第三條路再算。
image

行來行去，最後發現上山嘅路係要由公園仔盡頭呢條樓梯落去
image

落完幾級樓梯之後轉右，得一條路跟住行就得
image

繼續沿路直去，左邊行出去係冇嘢睇嘅
image

行到見到沙泥地，留意左邊遠少少嘅地方有個樓梯口
image

跟住係一段長樓梯，一直係咁上，都幾爽嘅?
image

嘩，成個南吖島見晒
image

見到碌柱即係到山頂了
image

西高山山頂360度(494M)，呢到風景唔錯喎

WP Photo Sphere (R0010187_20160625161040.jpg)

由山頂擒過欄杆有山路可以再行以前少少，回望番西高山。當然，唔一定要擒出嚟嘅
image

繼續沿山路行到尾又另一個景觀，下面係瑪麗醫
image

喺西高山影完相就原路落山返去夏力道，再沿路行大約1公里就出到嚟山頂廣場
image

雖然冇乜特別，不過地標景點一定要影下嘅
image

山頂廣場旁邊有一條樓梯可以行番落去山頂道，落去之後就會見到去薄扶林水塘嘅入口
image

由山頂廣場好爽皮咁跑咗大約十分鐘嚟到呢個分岔路口，靠左沿港島徑直去。查實如果諗住去伯大尼可以試下行右邊條路經薄扶林水塘落去薄扶林道，條路會短好多。不過當時我冇睇清楚地圖，揀咗左邊呢條之前行過嘅
image

路旁有指示牌
image

跟住喺前面呢個樓梯口轉左上去
image

仍然係行梗港島徑第二段，上呀~
image

image

認住港島徑個公仔(兩條戍李)，繼續沿港島徑去置富
image

今日呢段路冇乜人行
image

繼續直行
image

行到嚟呢到，前面轉右去置富花園。轉左係港島徑第二段路線，去貝路道嘅。
image

離開港島徑，繼續向置富進發。image

繼續沿路落山，見到左邊有條路，仲有個馬牌。睇地圖呢條路可以落到薄扶林道，出口仲喺正伯大尼對面。諗咗一陣就決定試下行，結果係衰咗嘅。所以嚟到要繼續直行
image

當時仲未知自已領咗嘢，只係呢條路感覺上好似比較少人行咁。再行多陣就見地上面有好多???
image

呢條係特制馬路嚟喎，地下啲粒粒地磚係軟嘅
image

o shit~ 行咗一段先見到有閘，要行番轉頭
image

繼續沿住條路直行
image

到置富花園了，穿過屋苑去到置富道之後轉右沿路直行就去到薄扶林道，之後過馬路再行前啲就到。睇 google map 好易搵到
image

行到去薄扶林道巴士站附近就會見到指示牌，照住方向轉左入去
image

遠處見到一個唔太起眼嘅指示牌
image

伯大尼係香港法定古蹟，1875年由法國佬興建。好多人(包括我自己)對佢認識唔多意為佢係座教堂，其實教堂只係建築物其中一部份，佢真正身分係一座為傳教士而設嘅療養院嚟嘅。之前做過港大校舍，家陣就係演藝學院嘅電影學系校舍。我唔敢扮尊家，想對佢嘅歷史了解多啲可以去演藝個網站睇下，或者自己上網搵下資料
image

可能成日去歐遊嘅人會覺得冇乜特別，但對我呢啲見識少嘅井底蛙嚟講呢間教堂係香港少見。好值得嚟行下。教堂外邊可以影相，如果想入去教堂入面參觀要參加導賞團
image

參加導賞團可以去入口旁邊呢間牛棚屋仔登記，由朝早11點開始每隔一個鐘一團。可以嚟到先至買飛或者係預先去 hkticketing 到訂飛。建議係就算係諗住到時 walk-in 都先去 check 下佢個時間表。因為如果撞啱佢開英文團聽唔明就把鬼，又或者遇啱佢租咗比人攪婚禮又會運吉。定好時間再向後 plan 行山路線以置富為終點，咁行完山再去睇教堂就 perfect 喇～
image

其實若干年前我跟過朋友嚟參加導賞團，今次再嚟都冇打算入去(想入都唔得)。如果未嚟過參觀嘅不妨試下，我覺得個教堂真係好特別。記住要先 check schedule

行完伯大尼可以原路行番出去薄扶林道座巴士或者小巴走人