今日終於都試行咗想去好耐嘅雞公嶺,雖然行起嚟比想像之中吃力,但睇到靚風景都算值得嘅。行雞公嶺比較方便嘅方法係由元朗座小巴到逢吉鄉出發,行完之後喺八鄉座車走人。不過對於我呢個鐘意搭鐵去行山嘅人嚟講,就算係要行遠啲都會盡量計劃由狗鐵站出發。
路線:嶺火車站>蝴蝶山徑>北大刀屻>橋頭(粉錦公路)>雞公嶺(雞公山)>逢吉鄉路
全長:13.5 km
時間:5小時33分
路線記錄
Total climbing: 1198 m
Total time: 05:32:38
喺粉嶺火車站 B 出口行人天橋去到尾
落地面之後就會見到對面馬路嘅起點,由左邊嘅行人隧道過去
嚟到蝴蝶山徑入口,沿住斜路上去
頭段嘅蝴蝶山徑似乎係附近街坊晨運散步嘅地方,都有幾多樓梯要上嘅。如果大熱天時行又冇乜風,行起嚟都會幾辛苦
山徑全程係靚路
行到見到呢個門口就繼續直去,雞乸咁大隻字寫住蝴蝶山徑應該好難會行錯
之後係一段又一段嘅樓梯
一直沿路行到呢個路口,轉右。又係有大大個指示牌寫住北大刀屻
繼續沿山徑行嚟到呢條樓梯,要落一大段。可以放心,落幾多之後就上番幾多,仲肯定會嘔凸添~
之後會經過呢個冇嘢睇嘅太極園
仲有啲遠睇幾靚近睇又冇乜特別嘅花
沿山徑行嚟到前面呢個路口,繼續直去。(呢兩張咁好陽光嘅相係幾個月前影嘅)
過咗啲櫈仔之後就離開鋪得靚靚嘅晨運徑,開始行山路去北大刀屻
跟住係咁上係咁上
行多一段路之後嚟到呢個分岔道轉右
其實係有指示牌嘅。去白牛石嘅方向,之後又有一段長長嘅樓梯
嚟到呢個分岔路口,正中間好離奇地出現一個廁所。跟住轉左轉右兩邊都一樣。
再行多一陣就到北大刀屻
雖然唔算好高,但今日行起嚟都覺得有啲吃力,應該係同悶熱天氣有關?
繼續行程,大石頭嘅左邊係去大刀屻嘅路,幾個月前行過了。今次要試下轉右落山去雞公嶺
望下指示牌,去打石湖橋頭嘅方向
開始沿路落山,頭段啲路好易行
呢個位置幾靚,但超勁多蚊。唔想變豬頭都係拿拿臨走人好啲
望下對面嘅目標雞公嶺,好似都好高咁
落山嘅路好明顯易跟,但亦有分岔路。一個唔留意就錯過咗路口,連自己行錯咗第二條路都唔知。好彩嘅係呢條路一樣可以安安全全落到山。嚟到呢個十字路口就轉左繼續落山。
又有分岔路,唔好理條樓梯繼續直去
有少少唔對路喎,仲有狗吠聲?
好彩再行出多少少就見到村路,前面仲有一班山友。咁即係冇行錯路啦~
繼續沿村路行出去粉錦公路,經過見到棵樹下面有上色兩個大字。咁我呢啲低能仔梗係會用想像力去亂畫一下?
前面就係粉錦公路,出去之後轉右沿行人路繼續行。留意村口右邊有條樓梯,地圖顯示一樣可以上返去大刀屻,或者下次逆走時會試下
路口左邊有77K(橋頭)巴士站
右邊前行前少少就係上雞公嶺嘅路
哦~原來呢到係八鄉
由路口行前大約30米,過對面馬路就會見到有路上山。建議由先前個路口出嚟就即刻過馬路先至繼續行,會容易啲見到。
路邊有條樓梯行落去
之後穿過條大水管過橋
過橋之後見到有兩條樓梯,睇地圖分唔到。望落右邊呢條似啲,就上去試一試
好彩,行兩步就見到有人行梗落嚟,再問下確定條路係上雞公嶺嘅,咁就可以放心繼續行了
係咁上係咁上
呢條路有啲古惑,諗住沿石屎路行冇衰,點知行行下由上樓梯變成落樓梯。覺得唔對路再check下地圖先至發現自己錯過咗一個路口,唯有行返轉頭睇睇。原來落樓梯前嘅一小段平路旁邊就係上山入口,亦有絲帶標記,只係冇心留意時見唔到。
繼續行程冇耐就開始落毛毛雨,梗係要即時check下雷達圖先啦(唔對路就落山走人)。其實今日天氣報告話局部地區有驟雨,不過家陣睇落似乎冇乜嘢,一於繼續行
跟住係不停咁上斜
回望八鄉一帶風景唔錯,可惜天氣唔好
認住遠山頂粒大舊石,向住佢行就啱
好似仲有好遠咁
終於行到嚟大石,直行條路好似易好多,不過我揀咗右邊有一條路行上去。
遠處望到係雞公嶺山頂枝測量柱
鏡頭一轉就行到過嚟了 – 標高 572M
呢到風景好鬼靚
行下行下見到一班越野電單車友從後面趕上,佢地玩得高興時我又睇得高興。八八掛掛又企喺到睇咗好耐
當我走人落山時仲有好多人上梗山,唔知佢哋喺咪諗住喺山上睇日落呢?
雞公嶺有兩枝測量柱,第二枝矮好多,只有 374M。又係影相時間了~
雨雲散咗天氣開始轉好,仲有少少陽光。回望啱啱行完嘅雞公嶺幾鬼靚
發現一個疑似係座標嘅物體
上面寫住啲數字,唔知係乜嘢意思呢?
山頂另一邊望到南生圍一帶啲漁塘,好天時加枝長鏡影下日落應該會好靚
影完相落山走人,尾段有啲路都幾斜嘅
依?跟住啲路係咪會好行啲呢?
實情係一啲都唔好行,水土流失得好嚴重。啲木梯級變晒做平衡木
跟住有一小段梯級會經過啲墳墓
最後由一個唔多起眼嘅路口返到落嚟逢吉鄉路,估唔到一落地就有小巴經過。即時跳上車走人~
連影相嘅時間都冇就衝咗上小巴,好快就經過呢個叫逄吉鄉嘅站。鐘多一陣眼瞓就出到去元朗市區了,今日行完,入秋後再戰~
13/07/2020 at 11:40 下午
前日去完! 決戰雞公嶺之巔
https://travelbyod.blogspot.com/2020/07/kaikungleng.html