(update @ 2017-05-02 – 補上航拍片段)
假期好天就梗係要去行下山做運動，但假日訓到晏先至起身亦應該係常識吧，唯有揀啲短啲嘅路線嚟行下。結果漏漏氣氣，入到屯門都差唔多１點鐘了。
離開車站行一陣，好快就見到目標，就係青山山頂上面個發射站。
行完一大段斜路嚟到青雲觀門口，仲有排行喎。
轉頭又嚟到呢條古惑嘅樓梯口，開始上山了。
鏡頭一轉就已經到咗山頂涼亭，準備再上發射站。今日上山好熱鬧，有塞人情況。
上到嚟梗係要先掃張全景先啦，呢個景真係睇極都唔會厭。座喺到吹下風睇下嘢，一流呀～
又係時候開飯了。嘩～今日好好餸，有鮑魚飽食！其實每次行山由背囊挖個夾到變晒形嘅飽出嚟時都總會有驚喜，係我太好想像力定係對啲麵包有無謂嘅幻想呢？?
食完嘢又挖件新玩具出嚟，不過只係同佢影相，唔係放。查實我唔肯定發射站上面啲微波天線會唔會影響隻航拍機，但為咗安全，點都唔應該喺呢啲地方放嘅。加埋下面有咁多樓，萬一有乜嘢事趺落嚟掉到人就大鑊了。
難怪隻 Mavic 咁多人買攪到斷晒貨，摺埋咗真係好細隻好方便嘅。無論計重量定係大細同拎一枝750ml水差唔多，之不過計埋個遙控再加多兩粒電就好似抬住枝1.5L咁上下。以行山計，又唔係重多好多。
影完相繼續行程，向大峽谷進發。
今日除咗青山好旺之後，連返去良田坳嘅路都好多人
行下行下遇到一班越野電單車友，勁呀～好多行山友(包括我)都企定定喺到睇，見佢地衝上嚟之後一齊拍手，好似睇表演咁。
轉個頭又行到嚟良田坳，雖然有足夠時間行去下白泥睇日落同放飛機，不過假期一定會人山人海，都係喺附近山頭行下睇完日落再返去良景走人好啲。
其實拍片嘅時間唔多，因為有唔少時間係用咗嚟影架飛機。?
至於航拍影咗啲乜，應該要再花一段時間先可以處理到。遲啲先再 update 番個 post 啦。
拖咗好耐終於都剪好，發現自己影來影去都係得嗰幾個shot，真係九流技術。都係希望影多啲慢慢技術會有少少進步啦
發表迴響