今日短短哋行下馬屎洲，由三門仔新村出發行到篤再原路返轉頭。
路線：三門仔小巴站>三門仔新村>鹽田仔>馬屎洲
全長：8 km
時間：4小時33分
路線概覽
Total climbing: 331 m
Total time: 04:33:11
大埔墟火車站出嚟，跟手座 20K 小巴去三門仔
座到總站落車就係村口
已經好耐冇嚟過，記得對上一次係冇地質公園呢個牌嘅
出發入村，得一條路唔會行錯嘅
依？喺海邊發現一隻潛艇
掃多張全景就走人
嚟到真正嘅村口，發現旁邊開咗間好大嘅士多，仲可以座低吔嘢。咁出發前打水或者係行完搵嘢食都方便好多了
繼續向前行，上山嘅樓梯就喺廁所前少少
就係前面呢個樓梯口了
有指示牌
去馬屎洲先要經過一座小山，有一小段樓梯要上
樓梯口有潮汐漲退資料，查實如果只跟官方路線行係唔需要擔心路會因為水漲行唔到嘅。但水退時沿岸行可以睇多好多石頭同海邊生態，所以最好都係等水退行。如果諗住捆邊行一圈就更加要較啱時間嚟，不過應該係出發前已經計劃好，冇理由等嚟到先至睇囉～
今次行發現之前穿過墳區嘅泥路已經全部鋪成靚路了，好行咗好多
經過鹽田仔山墳區之後再落一段樓梯到海邊，前面就係馬屎洲
到了，出發去睇石
睇番之前自己影過啲相，有啲石頭上次影過，有啲搵唔番，亦有啲係新發現。結論係只要花時間慢慢行下尋下寶，每次收穫都可能會唔同。
樹皮石，上次都有影
呢啲好似海藻嘅深色條狀物，其實係”硬掘掘”嘅石頭嚟
呢舊石頭連埋地面的紋理一齊睇起嚟好特別，有啲似倒瀉嘢，又有啲似火箭發射
行下行下去前面呢個小海灘，突然有一群野狗走出嚟吠咗幾聲。即時企定睇睇環境，對峙左一陣見佢地似乎冇乜攻擊性，就試下大聲喝佢凶番佢地轉頭。結果佢地走頭番入海灘，咁我就守住自己海邊呢個地盤放下飛機。後來收嘢諗住走人時佢地又走出嚟攪事，谷氣之下就隨手拎起一塊長木板(好彩咁啱又”立”到嘢)嚟裝腔作勢，結果班衰狗退入草叢，讓番個海灘出嚟。狗就係欺善怕惡，見你驚佢就進，到佢驚就會退。但同野狗對峙始終係有一定危險性，最好都係可免則免。
既然路障已經清除，咁梗係繼續向前行啦。喺海灘上見到有啲人工擺設喎，唔知有冇特別意思嘅呢？
離開野狗海灘繼續睇石之旅，跟住發現呢舊好似樹葉嘅化石，又有啲似史前生物嘅羽毛。好正～
以前喺泥涌同三家村都好容易見到呢啲蟹仔同寄居蟹，近來已經接近絕跡了。希望啲怪獸家長唔會帶啲細路嚟呢到破壞生態平衡就好了。
吹住風嚟睇下海邊靚景，感覺超正
又影下石頭先
吖～今次除咗石頭，仲有啊吉啲親戚喎
沿海邊行到尾有一條樓梯可以上山，入口附近長滿雜草，似係條已經荒廢咗一段時間嘅山徑。唔知係咪因為做咗地質公園之後要減少人為干擾，連山徑都作廢呢？除咗頭一小段有石級欄杆之外，之後嘅路都係泥路小徑，亦有枝路。郊遊地圖又冇標示，如果一心諗住嚟行海邊睇石頭嘅，最好都係唔好試行。
山上有測量柱，地圖上嘅標高係 114M
山上風景一流，八仙嶺同三門仔都望到晒
放完飛機影完相，返落海邊睇⛵。呢到對面係大尾篤水壩，隔離就係水上活動中心，啲人玩船玩風
水退之後成個海邊都係海蔘，有啲大到得人驚，差不多成尺長
第一次見到呢啲粉紅色嘅海綿，睇嚟呢到啲水質應該唔錯
綠色呢啲唔知係乜，睇個樣都應該係靠過濾海水微生物為生嘅軟體生物
呢舊好似珊瑚骨嘅唔知係乜嚟呢
見到好似車呔咁嘅石
回程返到嚟起點見有好多人，其中有一個座喺到嘅女士問我有冇見到狗。佢話行行下見到成班狗衝出嚟欄路，唔敢繼續行唯有返出嚟座。仲話啱啱就有人比狗咬 call 咗白車?，望下前面真係見到正在收隊嘅消防員。估唔到啲狗真係會咬人，佢哋咁唔生性，我估唔洗好耐就會有人做嘢。始終呢個係地質公園，政虎應該唔想見到有遊客因為參觀地質公園而比野狗咬傷。但短期內如果諗住嚟行下，最好就約多幾個人一齊行。狗，有名你叫，真係好狗嘅，佢見你人多就自然唔敢咁惡。如果諗住拎多枝行山杖嚟旁下身，記得要套上膠套，千其唔好用個金屬尖四圍篤。好好愛護呢到啲石頭❤。
吖～真好彩，一出嚟就有小巴。走人～
update@2018-04-02 – 潮汐參考資料改為天文台大埔滘
發表迴響