除咗第一次之外，行分流唯一理由就係為咗想加長路程，因為呢段路長得嚟又冇乜特別吸引嘅地方，起點交通唔方便，有得揀我去行下大東鳯凰好得多了。不過今次遇啱有朋友話想行遠少少鍛鍊下，加上我又想去睇下相展，一於昆佢一齊行下分流。其實自從上次見到二澳封村告示之後一直都想知係咪真係冇得行，怕行到去二澳先至行番轉頭就戇居了。結果出乎意料，本來行到嘅路(分流炮台)行唔到，怕行唔到嘅(二澳)反而暢通無阻。簡單講就係沿鳯凰徑經二澳去大澳冇封路，可以放心行。

半年前行嘅山，拖下拖下到今日先至 post 出嚟。其他積埋積埋嘅應該都唔會再攪了。

日期：2016年7月24
路線：石壁>鳯凰徑第8段>鳯凰徑第7段>分流>二澳>大澳>東澳古道>東涌
時間：8小時5分
全長：33.41km
路線概覽(按圖放大)
image

GPX 紀錄可隨便 download

Total distance: 33503 m
Total climbing: 895 m
Total time: 08:05:18
Download file: fanlau_gpx _2016-07-24_1108.gpx

今日行程由出發一刻就開始領嘢，話說我哋見到入去大澳巴士條人龍好長，朋友就問係咪應該座入去石壁嘅車都得。雖然我之前每次都係座去大澳嘅巴士，但諗下條路應該都係一樣，於是就試決定試下。結果兩條友就戇居居座咗入去石壁監獄?。
image

其實行呢條路線最好係座入大澳或者昂坪巴士，一直座到過咗石壁水塘水壩就落車。如果因為其他原因座入石壁嘅巴士，要留意喺過水壩之前落車然後再行過去。當然，如果係第一次嚟又想行下條水壩就另計。記住石壁巴士過水壩之後就冇站，會直接轉落去監獄。既然嚟到，就影番張到此一遊相，應該唔會再嚟呢樹。
image

兩條友戇居居沿住馬路行番上嚟，咁啱仲要有巴士到站，見到真係火都嚟。
image

記住喇，要座入大澳或者係昂坪嘅巴士。如果座石壁車，就要喺過水壩之前落車(好長氣)。
image

巴士站旁邊有樓梯上去，好容易見到。
image

呢樹係鳯凰徑第8段起點，出發前梗要影張相啦～
image

出發?，鳯凰徑第8段係5.5公里長嘅引水道，全部係石屎路。除咗影下啲水閘之外就冇乜特別嘢睇，夠氣夠力嘅話可以跑晒佢。
image

行咗一陣嚟到呢個分岔口，靠右行斜路上。
image

行前多幾步會見到地下寫咗大字，應該好難會行錯。
image

之後一直行都冇乜分岔路，間中會發現右邊有路上山，啲小徑係上去羌山郊遊徑嘅。唔洗理繼續佢直行就得。
image

沿引水道旁邊有唔同大細同形狀嘅水閘，如果第一次嚟未見過影下都過癮嘅
image

當第三次見到右邊路口時就即係呢段接近尾聲了。
image

熱到爆，我記得嗰日行完山返屋企聽新聞話有人行山時中暑。
image

再行冇耐就嚟到狗嶺涌營地，雖然條路冇乜分別，但過咗呢到之後就係鳯凰徑第7段。之後再行多500米左右就會離開引水道，可以真正開始行山。
image

見到前面呢個牌就啱，跟住就轉左落去。
image

路口有地圖睇。
image

雖然第８段入口嘅封路告示牌已經拆走咗，但行到嚟呢到個牌仲係寫住二澳封村行唔到叫人改道。
image

不過改唔改道都係要轉落去繼續行，落晒啲樓梯先再講。
image

一直沿路行多一陣嚟到呢個路口，右邊條樓梯就係改道之後嘅路線，轉上去會經分水坳牙鷹山落大澳，去唔到分流嘅。咁今日梗係繼續直去啦～
image

下面個海灘好似幾靚喎～
image

掃番張全景，左邊嗰個唔知叫乜灣(地圖冇寫)，右邊嗰個就叫分流東灣。
image

再繼續沿路行，嚟到呢個路口有兩條路揀。左邊係行落去分流東灣，之後沿海灘行到尾上山就可以去到東涌炮台。而右邊條路係直接去分流村，我一次都未行過。今次好自然會同之前一樣揀左邊去炮台。
image

下面就係分流東灣。
image

已經冇乜印象之前呢個海灘係點，但應該唔會好似家陣咁多垃圾。估唔到呢到變咗垃圾海灘?。

(update @ 2018-01-01 – 東灣海灘嘅垃圾大部分都已經被”處理”，情況已經改善咗好多了)
image

沿海灘一直行到尾就係上山入口，但係見前到面草叢似乎條路已經好耐冇人行，加上雜草同垃圾已經封咗條路(仲有臭味?) 。朋友話唔想試行了，結果兩條友行返轉頭搵路入分流村。其實呢條路係郊遊徑嚟嘅，只係少人行漁謢處又冇派人打理就變成咁。

(update @ 2018-01-01 – 雜草同垃圾已經清理，郊遊徑入口回復原狀)

image

搵番之前喺2011同2012年影嘅相，驚覺之前呢到係一個好靚嘅地方，變成咁真係好可惜?。
[smartslider3 slider=4]

海灘旁邊有條小路可以行去分流村。
image

村入面有士多，有嘢食同嘢飲。大熱天時出得汗多要整番枝保腳力嚟飲下先～
image

士多老闆好好人，問佢小學喺邊佢好詳細講比我哋知點行。只係我哋兩條友死惷要行幾個圏先至搵到。
image

其實士多後面有條路，只要跟住條路就得。
image

呢樹位置係 L070
image

行到見到呢間爛屋，繼續行前少少。
image

起初諗住叫得做操場應該好大，原來左邊呢個唔起眼嘅空地就係小學操場了。難怪啱啱行過咗都唔知。
image

行入操場就見到呢間破爛嘅屋仔，佢就係汾流小學了。見到屋仔上面寫住＂汾流學校＂先至知原來自己一直都跟人將呢個地方名改成＂分流＂。

(update @ 2018-01-01 – 小學操場已經再次長滿雜草，課室入面嘅相亦已經殘破不堪)
image

image

image

image

今時今日啲小學生如果見到只需要讀四科應該會好開心。
image

呢間屋仔小學名符其實係人去樓空了。(360全景)
[vrview image=”http://blog.3sing.com/wp-content/uploads/2016/10/R0010202_20160724140029-e1477322265813.jpg”]

墻上面掛滿相，其中一個相架係介紹今次展覽(按圖放大)。
image

睇完相展繼續行程，行返去 L070 標距柱附近嘅呢個路口，向煎魚灣營地方向進發。
image

沿路行直到見到呢個垃圾焚化爐，喺佢旁邊條小徑繼續行。
image

由呢到行上去，好快就會到二澳村。
image

以前二澳村呢到比較荒蕪，家陣有村民搬返嚟種田，多番啲人氣了。連啲路都好行咗好多。
image

離開二澳，沿海邊一直行就會去到大澳。
image

七姐果
image

終於到大澳了。
image

image

嚟到大澳點都要影下呢個牌嘅。
image

起程出發返去東涌，呢段東澳古道行過咁多次冇乜特別嘢好講了。
image

鏡頭一轉就已經返到嚟東涌，今日真係好好天，望上去大東鳯凰冇霧又冇雲。
image

天黑前就返到嚟東涌，今日行完了～
image