行吓東澳影吓相

今個星期行吓東澳古道，試吓穿埋啲未去過嘅地方一次過行。路程好似長咗啲，但查實好多都係平路嚟嘅。

路線：東涌站>東涌小炮台>東涌炮台>東澳古道 — 䃟頭>沙螺灣(千里眼)>䃟石(三山國王廟)>深石>深屈(深屈碼頭)>嶼北界碑>大澳
全長：24.13 km
時間：5小時22分

路線概覽

起點係東涌站，出嚟之後向360車站方向行。

過馬路之後嚟到東涌泳池，先影張相。之後再轉左沿行人路繼續行。到盡頭過馬路，跟住轉右再行前少少就會見到上山嘅入口。

不過我行錯路，跟左單車徑落隧道。行多咗一段既無謂又冇嘢睇嘅路，所以唔好重複我嘅錯誤。

雖然行錯路遠咗，都一樣可以嚟到呢個入口。

有一條好靚嘅樓梯上去有涼亭觀景台，而欄杆外邊就有一條泥路。

呢個時候我又再作出錯誤決定，擒咗出去行泥路。

呢條路好闊好易行，唔係穿林小徑。不過就係乜嘢都冇得睇。

泥路盡頭係馬路，跟住轉右沿行人路上。

行多一陣就見到由涼亭落嚟嘅樓梯，提醒咗自己有幾咁笨實。

再行多陣就到咗今日第一個景點東涌小炮台。

睇完炮台繼續沿馬路行，嚟到碼頭撞啱有兩個女仔係地上面畫梗畫。感覺好似已經到咗大澳咁。

繼續行程，沿路行番出去逸東。

呢到真係幾似大澳

呢條斷橋都應該算係景點之一。

又係共棄單車?

原來除咗碼頭嗰邊嘅”漁獲”之外，呢到仲有一條”木橋”。繼續沿村路行有咖啡室，又有茶餐聽，估唔到呢到會咁精采。下次再嚟要試吓幫襯先得。

出到嚟逸東邨，跟住要行番出去東涌道，參觀第二個炮台。

仲要行一段路

上天橋過去東涌道。

落天橋之後轉右沿東涌道行。

前面黃龍坑道入口，轉入去行一陣就會到天后廟。本來諗住行入去影張相，不過又係唔記得咗，直接行咗去炮台?。

到了，轉左行入去。

查實東涌炮台除咗嗰幾枝爛鬼大炮之外，圍墻入面仲有其他嘢睇嘅，仲幾靚添。

每次都會沿城墻行一個圈。

嘩，粒死人山竹牛肉。試吓擒過去先。

其實東澳古道差不多每年都會行一次，間中會順道嚟炮台行吓。年幾前嚟影咗好多相，年幾之後嘅今日都冇乜轉變。咁就慳番用舊相算了，由得個draft post長埋地底?

炮台城墻入面有嘅東涌小學雖然細，但係設施都算齊全。有操場同更衣室，環境仲唔錯添。

照睇呢個應該係廚房。

厠所日久失修，屋頂都塌咗了。

小學入面嘅課室保存得幾好，我估喺到讀過書嘅朋友返嚟見到會有好多回憶。

參觀完炮台，繼續東澳古道入大澳(查實都未開始行?) 。由前面條行人天橋過番去逸東邨嗰邊。

古道第一個路邊廟，經常都香火鼎盛。

行到嚟康樂中心，竟然唔記得咗行出去侯王宮影相?。

不過我唔會唔記得行出濕地睇嘢嘅。

呢到有紅樹林，可以見到招潮蟹同彈塗魚。感覺近年好似少見咗，唔肯定係季節問題，定係生態系統破壞，希望唔係後者啦。

哎呀，隻蟹仔唔出咗乜嘢事呢，好慘啊。

睇完濕地要原路行返去古道。

其實如果唔係360封路，我今日都應該唔會行東澳古道。

轉個頭嚟到觀景台。

跟住又到大佛頭水池。

由水池落到嚟，平時會直接轉左入沙螺灣，不過今日想試吓去呢個把港古廟睇睇。所以先轉右。

原來廟嘅隔嚟仲有鄉工所。

沿古廟旁邊有條路繼續行出去。

盡頭有個碼頭，唔知喺到著草走佬得唔得呢？

原路行返去古道，見到下一個目標景點。

嘩，好多蕉喎～

網上資料話沙螺灣村有成八百幾年歷史，呢幅石圍墻係以前用嚟防盗嘅，都係歷史悠久架喇。

轉出去田邊，參觀吓呢個特別嘅景點。聽村民婆婆話巨人座住嗰塊田係村長嘅，係佢出錢搵藝術家返嚟整呢個巨人。仲用4舊水一日嘅價錢請村入面啲後生仔幫手去附近攞啲藤返嚟做材料。最勁係婆婆話佢都有舉手話做，不過年紀太大唔比喎?。

佢拎住隻?原來有意思嘅，因為以前沙螺灣係漁港嚟。後來又係因為城市發展而消失，原來被城市剝削鄉郊嘅地方除咗二澳，仲有沙螺灣。喺網上搵到長青網一編轉自明報介紹沙螺灣嘅歷史嘅報道，值得花少少時間去了解一吓。

巨人附近有棵好奇怪嘅樹。

鄉材小徑加個巨人，幾特別。

睇完巨人離開沙螺灣繼續行，冇耐就到䃟石灣嘅三山國王廟。呢到似乎冇乜特別，影張相就走人。

再行多十幾分鐘嚟到深屈碼頭。吖~無啦啦做乜整個欄杆喺到呢？攪到深屈碼頭冇晒特色。

呢到望出去又幾靚咁喎。

離開深屈繼續行程。

都唔明啲人乜嘢心態，呢啲人真係唔應該嚟行山。

天氣唔多好，好彩矇矇哋都仲影到條橋。

古道行程接近尾聲，再行前一少段就到大澳。前面呢條小徑近年多咗人行變得闊咗，不過無助改善塞人嘅情況。今次就行遠啲轉上去避開佢。其實前面呢段路係成條古道唯一有(少少)危險性嘅路段，因為一邊其實係懸崖嚟嘅。

查實我唔覺得個石碑有乜嘢特別，一場嚟到都影番一張相先啦。

轉個頭嚟到新基橋。

又喺頽位影張相先。

跟住行去楊侯古廟，都有啲特別嘢睇吓。

喺路口轉右出古廟

到此一遊，影張相。

跟住去下一個景點，虎山。

之前以為指示牌講嘅觀景亭就係虎山上面嗰個，原來跟住行只會去到一個頽到爆炸又冇嘢睇嘅地方。想上虎山就要喺轉角位呢個唔起眼嘅斜坡維修口行上去。以前閘門係閂住嘅(冇鎖)，近呢兩次嚟已經係常開了。應該係越嚟越多人由呢邊上虎山。

經過一段又斜又多碎石嘅小徑，嚟到呢個招牌影相位。

由虎山落嚟就係少林，太晏閂咗門。

跟住行埋出去文物酒店參觀一吓。

行飽了，回程出去座巴士。經過郵局附近吧貓仔街，好多貓仔。

出到嚟巴士站。。。。原來搬咗喎。。。

路線記錄