今日想試吓行兩段比較少人會一齊行嘅山徑 — 由大尾督起步，經船灣郊遊徑去新娘潭，然後再經衛徑上八仙嶺去鶴藪。原先打算會再經衛徑上九龍坑山落太和，可惜體力同時間都唔夠，要寄望下次再早啲起身同天氣再涼少少先再挑戰了。講番今日段路，其實以橫向距離計唔算係超長，總爬升亦唔夠2k﹐不過船灣呢段路就係咁神奇，明明上落唔多路又唔長，但每次行都會覺得好L辛苦。可以稱得上係最伏郊遊徑，其實除咗行得辛苦，呢段郊遊徑之前發生過死人同失蹤搵唔番嘅意外，所以一定要準確充足先好嚟環湖啊。至於八仙嶺嘅衛徑其實冇乜難度，以前仲可以見到好靚嘅芒海，不過今次行見唔到，唔肯定係自己記錯位置，定係已經消失咗。
路線：大尾督>水壩>船灣淡水湖郊遊徑(長牌墩>鹿湖峒>觀音峒>大峒>馬頭峰>照鏡潭）>新娘潭>八仙嶺自然徑>衛奕信徑10>衛奕信徑9(八仙嶺>黃嶺>鶴藪水塘)>鶴藪道>鶴藪村
全長：32.25 km
時間：9小時32分
路線概覽(可按圖放大)
長征例牌菜，出發前一定要食一碗有神奇力量嘅餐蛋麵?。
跟住就要買埋今日嘅午餐，呢3個比起平時食開嘅提子飽吸引好多?。
買完晒嘢就起程，去小巴站座20C入大尾督。
一早唔塞車，大約20分鐘就入到嚟。平時人頭湧湧嘅燒烤場，家陣”水靜河飛”。
點算吓今日嘅裝備先，抬咗3L水，再加3個飽。水一定係預多好過預少嘅，特別係要行環湖嘅時候。加上我仲要預埋之後上八仙，咁計落又唔算拎得多嘅。
今日真係好早，8點半都未夠就出發了。
水壩大約有2公里長，長到望唔到尾。如想量化一下，大約係等於由中環座船過維多利亞河去尖咀來回嘅距離。所以淨條壩都有排行。
行完條水壩再回頭望吓，見到今日個目標八仙嶺。由於角度問題，呢邊望過去黃嶺係矮過八仙嶺。依？又話行八仙，咁做乜會嚟咗水壩尾嘅呢？?
穿過呢個閘繼續沿路行去副水壩。
記得N年前自己做jojo嘅時候會踩單車入嚟呢個碼頭座吓吹吓風，家陣只可以行路入嚟了。
行多一陣就上到副水壩，每次嚟到都一定會影吓呢啲咁特別嘅排水口。
呢到係船灣淡水湖嘅副水壩，因為有排水功能，所以船灣呢到係冇好似城門同石壁嗰啲排水窿嘅。
繼續沿水壩行到尾就係郊遊徑入口了，咁啱有一位練跑嘅山友跑梗出嚟。講完句早晨轉個頭就已經跑到老遠。喺呢段路練跑山，到底係佢太勁定係我太屎呢？真心覺得佢好勁。
好，我都起步了。
行咗咁耐拎轉頭望一望，唔覺唔覺己經行過咗一連串嘅山脈。再望遠啲，左邊見到馬鞍山，右邊見到八仙嶺。仲有隻手指頭㖭，查實我部爛電話喺咁猛陽光下影相係完全睇唔到個screen影梗乜嘢，所以好多時會影埋自己隻手指都唔知。?
記得第一次嚟環湖嘅時候有一段又斜又爛嘅路係要爬上去嘅，不過之後再嚟嗰時條路已經封咗，開咗另一條安全好多嘅新路出嚟。
見到呢啲石級，應該係接近到鹿湖峒了。
行餐懵終於都上到嚟。
嚟到鹿湖峒，環湖嘅路程差唔多完成咗一半。通常會座一陣休息同影吓相，呢到個view真係幾鬼靚，可惜因為大逆光影出嚟灰晒。喺老遠仲可以見到八仙嶺。
再行多半粒鐘就嚟到觀音峒，呢到冇乜嘢特別好影，所以淨係影個指示牌。
嚟到呢個叫做大峒嘅路口，有左邊同直去兩條路㨂。兩條路都可以去到烏蛟騰嘅，不過我每次都係揀左邊條路嚟行。
除咗普通嘅木指示牌之外，呢邊仲多一個提示牌。好明顯呢邊係會行得金啲喇～?
指示牌話經馬頭峰去烏蚊騰仲要行多4.5公里。
行咗15分鐘，嚟到另一個叫横嶺坳嘅分岔路口。同頭先大峒一樣，沿路直去烏蛟騰會易啲，轉左行就去馬頭峰。
八仙嶺越嚟越近了，可惜要落咗山先可以再上。。。
依？有測量柱，呢到係赤馬頭，睇地圖標高只係得290M。唔知點解行上嚟唔知點解會咁L辛苦。
頂唔順要休息一陣，就用食一個飽嘅時間嚟休息啦。
跟住係一個又一個嘅山。
好L辛苦咁上到嚟馬頭峰，之後就係落山路段唔會咁攰。
落山嘅路都有啲崎嶇嘅，不過相比啱啱行完嘅郊遊徑又唔算係難行。
終於行完條郊遊徑了，到咗出口。落去之後就轉左就可以去新娘潭。
睇吓地圖先。
其實之前每次環湖都係喺出口轉右出烏蛟騰路，今次係第一次行呢一段落新娘潭。
落咗一大段石級之後嚟到一條石橋。
又睇吓地圖先?，跟住紅色波波上去新娘潭路。
呢條石橋好似幾特別咁。
繼續直去。。。其實一場嚟到係應該行一行去新娘潭睇吓瀑布嘅，不過仲有個八仙嶺等梗我，都係先繼續行程，下次再嚟睇過啦。
跟住喺前面轉左再行上去。
回頭影一影個出口先，啱啱行完呢段係新娘潭自然教育徑。
又睇吓地圖先。
出到嚟新娘潭路，行過對面馬路就已經係上山入口。不過行落少少個巴士站有汽水機，都係落去買啲凍嘢飲吓先啦。
依？有新嘢喎，可以買水飲，一定要試吓先。
頂佢個肺，呃錢。比咗6蚊買500ml，出咗一陣水就停。呢到100ml都唔知有冇，太過份，早知係咁買包維他奶飲好過。以後都唔會再幫襯呢啲搵笨實水機。????????
入完一肚氣又行番上嚟，一定要影一影呢個入口。記得三年幾前環湖之後經過呢到，心諗到底有冇人可以咁勁環完湖再上去行埋八仙呢？估唔到三年後嘅今日自己會嚟實行呢個諗法。其實四徑全走嘅都大有人在，我呢啲小學雞又算得係乜吖。不過對於自己可以完成之前認為不可能嘅路線始終係值得開心嘅。冇必要吓吓同人比較☺。
起步冇耐就見到一個牌，寫住橫山腳。
嚟到衛徑交界，見到一位由八仙嶺落嚟嘅女山友，佢接埋第10段去鹿頸。
而我就逆走第9段上去仙姑峰。
依，前面好多人喎。
呢班山友似乎係喺繼續上山之前喺呢到休息。
好，你地慢慢抖，我上去先喇。
鏡頭一轉，又好L辛苦咁上到嚟仙姑峰。
其實我都好耐冇上過嚟，原來呢個牌換左之餘仲己經開始殘同甩油。
上次上嚟個牌係咁架
好，大休時間。座低食埋另外嗰兩個飽先。?
由仙姑峰望落去啱啱行完嘅船灣，即時覺得好矮。
影完相又繼續行程，仲有個好高嘅黃嶺等梗我。?
上上落落，嚟到八仙嶺最後一個峰。
遠處望到高高嘅黃嶺同好靚嘅山脈，不過要行埋過去就唔多靚喇。
沿途都有芒草，不過唔算密集。
嘩，距離鶴藪仲有差唔多6公里。
嚟到黃嶺，其實只係行多幾步路就可以上埋去枝測量柱，不過真係開始攰了，想拿拿臨繼續行程落山。
記得黃嶺呢到有好靚嘅芒海，不過今次行唔知點解見唔到。掘張舊相出嚟睇吓，原來已經係5年前嘅事了。
個牌話仲要行多兩粒鐘，不過事實佢預鬆咗好多嘅。
當環完湖又行埋八仙之後，嚟到尾呢段落山大石級感覺係幾吃力嘅。其實落都一樣要用力嘅。
個牌話仲要行多半粒鐘。
終於都落到嚟鶴藪。
睇地點時間～去到W12就冇得上要走人了。
嚟到鶴藪水塘嘅水壩，難得一個人都冇，影張相先啦。
本來不自量力地諗住可以沿前面條樓梯上衛徑去九龍坑山，不過時間已經係5點半，過多半粒鐘就天黑，冇得行了。不過就算有時間我都未必夠體力完成埋最後呢段，今日就行住咁多先啦。
由水塘沿鶴藪道一直行出去，經過鶴藪營地。咁又影張相先啦。
N年前嚟過鶴藪，印像之中有個小巴站，起初意為個亭係小巴站，原來小巴站係喺左邊路口行入去嘅鶴藪村。
行到嚟小巴站發現原來有超多人排梗隊，照睇等三架車都未必上得到。正當愁晒嘅時候，最前面傳嚟”一個有冇”嘅呼喚，原來架車上淨一個位。等咗一兩秒前面似乎冇乜反應，到再聽到前面問時我即時大叫，拿臨跑上去隊頭上車。結果我就由排最後變成係最前面上車嘅人，有排梗隊嘅都忍唔住話我好彩由最尾變咗最前。呢個都算係一個人行山嘅好處嚟。?
路線記錄
Total climbing: 1975 m
Total time: 09:32:12
發表迴響