話說早前聽朋友講話炮台山嘅MS有個牌子嘅行山鞋好著同唔跣，今日就尊程去炮台山諗住睇吓。嚟到先知原來MS星期日係唔開嘅?，又7咗一鑊。既然嚟到炮台山，又好似好耐冇行過北角，於是就沿英皇道一直行落北角。結果行吓行吓又行咗上山頂，真係完全估自己唔到?。
路線：炮台山>北角>百福道>寶聯徑＞金督馳馬徑＞小馬坑＞小馬山＞渣甸山＞陽明山莊＞黃泥涌水塘＞布力徑＞灣仔峽＞甘道＞白加道＞山頂廣場
全長：14.61km
時間：3小時24分
沿英皇道行，第一個景點係皇都戲院。佢屋頂呢個咁特別嘅設計係全港獨有，好彩佢已經評定咗係一級歷史建築，如果唔係見到咁樣圍住真係擔心佢會比人拆咗嚟起豪宅。返屋企查吓資料原來佢已經比新世界買咗，家陣攪梗復修。
繼續沿英皇道行，嚟到北角見到第二日景點。就係呢條冇乜人會行嘅行人天穚，之前聽講話好似會拆，睇嚟應該係拆梗了。
跟住過馬路嚟到北角電車總站，見到個好舊式嘅指示燈箱。
跟住轉入嚟春秧街行吓，呢度電車會喺街市中間穿過，如果座喺電車上面(車頭) 望落嚟會好特鬼別。
都唔記得幾多年冇行過春街，呢度都有好大變化，包括呢座唔知幾時出現嘅酒店。依？係檢疫酒店嚟喎?。
有新嘅亦有舊嘅，呢度仲有樓梯底鋪。
話說自己細個嘅時候有親戚住北角，所以經常都會嚟春秧街。啊媽間唔中就會喺呢度買啲蝦子麵返屋企煮比我食。冇諗過可以食得返童年嘅味道，但難得間麵廠咁多年都仲喺度(如果係揸流攤早就摺咗)，冇理由唔買包返去食。
點解會有咁多勞工手套吊咗喺度嘅呢？又幾特別喎。
最後影吓啲舊式士多，影完就走人了。
為咗唔想比人用嚟放嘢，政虎整埋整埋啲奇奇怪怪嘅無謂嘢。可能「吸收咗經驗」，呢兩個唔會再整到好似個墳墓咁。
行吓行吓行咗去北角碼頭，自從呢度起晒豪宅之後都冇再嚟過。今日有?就嚟打個轉，比個見到個老翻嵐山小火車。。。又扮得幾似喎。冇得返鄉下嚟望吓啲假嘢都好過冇。
入去商場行吓，見到有個愛犬美術館。
自己唔係特別鐘意狗狗，不過一場嚟到入嚟睇吓都無妨。感覺冇乜特別，應該係自己唔識欣賞。
離開北角碼頭，有諗過一直行埋落去鰂魚涌再由柏架山自然徑上山。諗起百褔道可以上賽西湖，之後有路可以再上馳馬徑。不如就試吓由百福道上山啦，順便可以去多一個有童年回憶嘅地方。
細個嘅時候生活圈子經常喺港島區，以前每逢聖誕啊媽就會帶我嚟呢座禮拜堂。外形好特別好易認，印像深刻。
繼續沿百富道上，嚟到盡頭見到天后廟道。原來條天后廟道咁鬼長嘅。
本來係打算去賽西湖公園之後再上山，不過自已唔係好識路，結果繼續沿天后廟道行人路行。其實係應該過對面馬路之後入寶馬山道再行上去嘅。
依？掘頭路嚟喎，懶醒唔睇地圖啦，行錯路喇。不過咁都未算最戇居，返到屋企睇地圖先知原來係有小徑打通百福道嘅。之前沿行人路上確係笨實。
死死地氣行返轉頭，將錯就錯試吓由寶聯徑行上山。
行到街尾就見到條樓梯，似樣了。
掂晒，有埋個石屎地圖板喺度仲唔係晨運徑啲friend 。
今日冇諗住行山冇帶地圖，有佢幫補吓都ok。大致上都知道點行嘅。影一影佢備用。
靠左邊繼續直去，右邊條路係通去賽西湖公園嘅。本來應該係由呢條路行過嚟先啱，不過今次錯有錯著，原來經寶聯徑過嚟路程短啲嘅。
行到呢個路口繼續直去。
好似有個地圖板喎。
掂，係你喇馳馬徑。繼續上去。
行一段路之後嚟到呢個路口轉左。
前面接返主徑了，跟住轉右。
上到嚟馳馬徑之後啲路就易攪。
再行一段路之後就嚟到小馬坑，呢度有條石橋可以影吓相。
影完相四維望咗一陣，之後就沿坑邊嘅郊遊徑上去。
行多一陣之後見到晨運園地個牌就喺前少少個小徑入口轉右。
開頭諗住沿坑上唔會多人，點知個算盤打錯晒。
嘩~仲塞人添。
塞人塞咗一段路之後成功離開人堆，上到嚟上游了。跟住轉左，先去發射塔影張相。
睇地圖呢座發射站位置就係小馬山山頂，不過呢度冇測量柱啲人冇得kill標了。影完相就要經小馬山橋過返去港島徑。
順路經過呢度又影一影。
出到嚟衛徑了。
過埋小馬山橋，跟住係一大段好Ｌ索氣嘅樓梯。
鐘頭一轉就嚟到衛徑同港島徑滙合嘅路口，跟住同一時間行可以晒兩條徑，呢段路好抵行。
好Ｌ辛苦係咁上係咁上，終於上到嚟渣甸山見到枝標。
好喇，又離遠望一望陣間個目標先～成日都講，望埋去好遠，行過去又唔覺係好遠。
依？喺地下發現一個小石碑，唔知小狗生前會唔會係成日培佢主人嚟呢度行山呢?？
轉個頭就落到嚟出口大潭水塘道，之後就沿行人路落去黃泥涌水塘。
停辦咗一段時間嘅艇仔又有得玩了，有艇仔嘅黄泥涌水塘先至順眼。
跟住又係用最頽嘅路線經布力徑接甘道上山頂。
又嚟到布力徑盡頭嘅灣仔峽，跟住就過馬路入甘道。
轉個頭又行到上嚟山頂道，攪乜鬼封晒條行人路呢？
原來成個斜剷光晒喎，唔知佢攪乜鬼。
跟住沿山頂道行，嚟到白加道就轉入去。
又係行晒成條白加道，嚟到盡頭嘅白加道纜車站。跟住轉上去入芬梨徑行多陣就係山頂廣場了。
趕唔切睇日落，都仲可以影到magic，算唔錯啦。
喺西高山睇日落好處係冇乜嘢阻，其實用佢嚟做吓前景都可以架喎。
由於已經日落，唔會考慮行路落山了。喺行程完結之前忍唔住要倒咗背囊入面啲嘢出嚟影張相，其實除咗一斤蝦子麵之外，喺買麵之前其實仲去咗買木嘅。今日應該係拎得最多無厘頭嘢去行山嘅一次。
路線記錄
Total climbing: 1677 m
Total time: 03:24:45
發表迴響