查實每次行完山仲要寫咁多嘢對我嚟講真係幾費心力，所以自從沉迷打機之後都冇出過行山post。最近連朋友都問我係咪已經冇去行山，實情係山有照行，相有照影，只係懶唔想攪。有機會嘅話或者會將部分行山記錄寫番出嚟都唔定。
廢話講完(跟住講啲更廢嘅)，今次行呢條係輕鬆市區路線(個人意見)，有風景得嚟又有史蹟睇，最正係交通夠方便同埋多走佬位。路線可以分為上山同落山兩part，兩段路冇直接關連，就算分開兩次行都得嘅。如果怕辛苦可以考慮淨係行 part2，齋落山睇下纜車影下相都唔錯嘅
路線：香港大學>龍虎山>龍虎山健身徑>克頓道>夏力道>西高山>夏力道>山頂公園>柯士甸山道>山頂廣場>芬梨徑>白加道>漆咸徑(中區自然徑)>梅道>高化利徑>蒲魯賢徑>纜車徑>麥當勞道(纜車徑)>堅尼地道(纜車徑)>中環纜車總站
全長：9.39 km
時間：3小時41分
路線概覽
Total climbing: 659 m
Total time: 03:39:41
行山起點係港大後面山坡嘅一條樓梯，家陣去大學應該冇嘢方便得過座地鐵。之前行過兩次都係由A2去本部大樓，今次試下由C1出口經百周年校園去大學道睇下有著數。結果証實行C1出口係會快啲嘅
座電梯上到地面薄扶林道出口，行過去另一邊就會見到扶手電梯上去
跟住直行
入去大會堂，再繼續直行
行到尾就會見到有扶手電梯上
正，一出嚟就已經係大學道。跟住轉左再行前少少就係山徑入口
由呢條樓梯上去，開始今日登高之旅
上一陣之後見到左邊呢條樓梯就轉上去繼續行
繼續沿路行
行到呢樹左邊又有一條樓梯，今次唔好上，繼續係直去。
呢段路幾好行，不過只係一少段。之後就全部係上山嘅斜路
呢到繼續直去。右邊條路係落番去薄扶林道嘅
繼續上一段路之後嚟到呢個路口，喺前面條樓梯上
樓梯邊有指示牌，向松林廢堡進發
跟住又係樓梯。。。
之後嚟到一條車路，繼續沿路行就得
有一個外籍家庭對呢個路邊彿像好有興趣
繼續沿路行，左邊有一條樓梯可以上去龍虎山。雖然冇乜嘢睇，但係如果未去過可以上去打個轉
頽到爆嘅龍虎山
落番嚟頭先行梗嗰條路，再行前少少見到左邊呢個路口就轉
沿路行多幾步又轉番右
轉灣之後見到呢條路叫做克頓道，如果唔想行樓梯嘅話可以沿斜路上。想消下脂就由右邊樓梯上，兩條都可以去松林廢堡，兩條路行到咁上下就會合二為一
正所謂肥仔要消脂，樓梯行多啲。咁我梗係揀由樓梯上啦
轉個頭就到咗廢堡
呢到有炮台遺跡，彈藥庫同其他戰時建築。附近亦有資料標板介紹
由於上次行過，今次慳番直接沿健身徑走人。但如果第一次嚟，係值得花少少時間四維行下嘅
史蹟徑定健身徑都冇乜所謂，都係一條路咁行
廢堡除咗炮台同其他建築之外，我覺得比較特別嘅就係呢一排叫做屏蔽體嘅屋，因為。。。
喺佢上面就已經係燒烤場，隔兩個爐仲有人燒梗雞翼
跟住由燒烤場旁邊條樓梯上去繼續行程
一段樓梯之後有平路比你回一回氣
跟住再上，其實都唔會太過辛苦嘅
上完樓梯見到前面呢條又係克頓道，所以先前無論係行斜路定係行樓梯結果都係一樣嘅
呢段路好多人行好熱鬧
繼續沿克頓道上山，行到尾又見到打撗呢條路，繼續向前行上幾級樓梯入去公園仔。如果行到嚟呢樹已經謝謝哋，咁西高山可能唔適合你。可以考慮沿夏力道行番去山頂廣場(平路)，之後可以座車走人或者照 part2 路線落山睇纜車
繼續向西高山進發，沿公園仔小徑一直行到尾
見到呢條樓梯就落去
跟住沿路行(終於有番少少行山嘅感覺)
行到見到前面間屋仔繼續直去
小徑盡頭嚟到大沙地，喺左邊條樓梯上去。由呢到上去西高山係一段長樓梯，我自已覺得行上去好”爽”，但每個人運動習慣唔同，可能有人會覺得好辛苦都唔定。
鏡頭一轉就上到嚟山頂，今日遇啱有義工帶住一班視障朋友行山，所以好熱鬧企滿晒人
今日天氣唔多好，灰矇矇。查實入秋之行山都冇乜可能會見到藍天白雲架喇
擒出觀景台再行前少少，望番轉頭發現原來西高山都幾鬼斜架喎
影多張360就走人了
轉個頭又返到嚟公園仔，今次行去另一邊上山公園。如果行完西高已經謝咗，一樣係可以沿夏力道行出山頂廣場走佬
落番去夏力道，再行過對面盧吉道就會見到有條樓梯上山
由呢到上去，之後都係離唔開樓梯同斜路嗰啲嘢。冇爛路泥路嘅
除咗呢到，成段路都冇分岔。喺呢到靠左繼續上
再行多陣就轉左
到山頂公園了。呢到有士多有魚蛋同燒賣食
死肥仔都唔係成日掛住食嘅，今次上到嚟第一時間就行過去觀景台
做乜呢？唔係睇風景，係睇下個道場搭到幾高
嘩，5條啓暴龍，條條過3000cp。不過唔算最勁，上次行見係9層。睇完就可以走人了，冇得打
獅子亭前面有馬路，沿住行就可以落到去山頂廣場
沿路會經過白色更亭，法定古跡嚟嘅
繼續行，嚟到呢樹繼續沿馬路落。如果相睇下維港景可以轉左沿路落去盧吉道，跟住沿路由另一邊行返去山頂廣場
落到嚟山頂廣場了，拿拿林去開飯
山頂麥記員工似乎工作壓力太大，唔多友善。決定就咁食個包就算數
食完飽，出發落山了
續 part-2
發表迴響