等咗咁耐，今日終於都到手了。滿心歡喜拎住兩隻杯返屋企，點知打開發現做工極為粗糙。感覺就好似去淘寶中伏一樣，睇相美好，收貨嚇倒。真係估唔到喺香港買野都會出現咁嘅情況，更估唔到竟然有公司會拎自己商譽嚟較飛。睇咗貨版都可以咁，以後仲有邊個會信你啲訂購？
當然，今次呢件事我自己都有少少責任，因為冇即場驗貨(當時冇諗過會有問題)，只係掛拎隻杯喺門口影相。我亦唔排除我拎到係其他人驗貨之後拒收嘅次貨。
一般粉絲心態，就算係同一種貨都會買兩件。一件拎嚟用，另一件就做收藏。可惜我收到嘅兩隻杯都有唔同程度嘅瑕疵，開始懷疑呢啲油漆嘅安全性。為咗自己健康著想，都係唔會用佢嚟飲水。忽然諗起淘寶格言，“放進口的不要淘，搽上面的不要淘”
第一隻杯杯邊凹凸不平
油漆唔均勻，做工粗疏可見一斑
第二隻杯情況比起第一隻好少少，至少杯邊完整，可惜杯身上嘅油漆一樣出現問題
反轉一望，唉，凹嘅
到底係咪我要求太高？大佬，你賣舊幾水一隻咁嘅杯，擺明定位就係要“鋸”一班叮噹粉絲。正所謂願者上釣，我唔係比完錢又嫌貴，但我比咗錢有”合理預期”都好正常。如果當初喺 popup store 到見到嘅貨版係咁樣甩皮甩骨我就唔會買。😤
喺呢到提醒訂咗貨又未去拎嘅朋友，記住要即場驗貨。人家收咗你錢已經袋袋平安，實在冇必要確保你滿意。至於買完杯杯又諗住再買碟碟嘅朋友，祝你好運
發表迴響