今日又係諗唔到有乜嘢地方想去,想懶吓行啲輕鬆嘅路線。諗起上次去赤柱古道仲差一少段未行,一於就去赤柱打個轉,之後先至再搭其他路行出市區。結果意外地喺大潭水塘見到個古老屎坑,算係意外收穫。可惜因為時間唔夠行咗一陣就走人,遲啲要搵機會再去一次探索吓仲有冇其他嘢睇先得。
路線:赤柱廣場>馬坑公園>環角道>赤柱古道(來回) >赤柱峽道>南灣道>淺水灣>淺水灣道>紫崗橋>大潭中水塘>大潭上水塘>大風坳>鰂魚涌
全長:17.57km
時間:3小時59分
入赤柱最方便就係喺銅鑼灣座小巴,話咁快就到。
轉個頭嚟到赤柱廣場落車,跟住就沿扶手電梯落去。打個轉先起程行山。
嘩~ 一落到嚟就見到啲好靚嘅菠蘿包,好吸引啊?。
最終都成功忍口冇食包,行咗嚟美利樓旁邊嘅馬坑公園入口準備出發。
入馬坑公園之後見到第一個樓梯口就轉上去。
跟住指示向厠所方向行,最後就會上到嚟山頂。跟住沿厠所旁邊條路繼續去。
再行一段路之後就會嚟到馬坑公園嘅環角道出口,出去之就轉右。
吖~仲諗住入去觀音寺打個轉,點知又摸門釘。
跟住一直沿環角道向赤柱廣場方向行,冇錯,即係行返轉頭。
一直行到見左手邊呢個路口就轉上去,有一大段樓梯要上。
一路上一路留意住右手邊,會有好明顯嘅小徑入口指示。
入古道之後行冇耐就嚟到第一條古橋。
再行多陣就嚟到第二條細啲嘅古橋。
今日再嚟行呢段古道嘅主要目的其實係想行埋上次冇試嘅一少段,去埋赤柱廣場。
沿小徑行吓行吓行到嚟馬坑監獄嘅外圍。一望啲圍墻就估到。
繼續沿墻邊行多陣就見到個出口了,落埋去望吓先。
出到嚟呢條係佳美道,之後再直行就可以去到赤柱廣場。試路目的完成,可以原路行返轉頭去古道入口繼續行程。
回程時望到原來仲有另一條路可以落去,仲有人整咗指示牌喺度。如果下次再行就試吓佢。
走回返到古道入口,再行樓梯上到嚟赤柱峽道。之後就過對面馬路個巴士站(唔係搭車走喎)。
喺巴士站後面嘅樓梯口落去,跟住沿小徑一路行到尾。
吖~ 唔知幾時呢幅豪宅墻油咗黑色,感覺唔多好。
行到小徑盡頭就由樓梯落去南灣道,落去之後過對面行人路去淺水灣。留意樓梯口就喺正馬路邊,唔好一見到樓梯就9衝。
繼續沿南灣道行,一直行到見拯溺總會個牌就轉落去。
一場嚟到梗要影吓相,難得冇乜人。
落海灘行吓,見到有個地方圍住咗。八掛行埋去睇吓,原來係考梗牌喎。
點都要嚟一嚟海邊嘅,不過今次只可以行半個海灘,去到中間就要上返去馬路邊。
行到出嚟海灘道,喺7仔旁邊條樓梯行上去。
行完條樓梯上到嚟就係淺水灣道,之後轉右沿行人路行。一直行到見有得過馬路就過去對面。
過馬路之後沿行人路嚟到迴旋處就轉左,之後一直行到尾。
由樓梯行上去,入口有個牌寫住衛奕信徑嘅。
好快就嚟到第一個分岔路口,左邊同右邊兩條路都一樣可以上去引水道。如果向上行兩邊都可以,如果掉轉由引水道落嚟行左邊(即係近紫崗橋嘅入口)條路會容易好多。近來越嚟越多人行呢段路,如果想避吓人都可以考慮行右邊條路嘅。
呢邊部分路段係會上得幾急,但路況唔差唔算太難行。
掂~上到嚟引水道了。上去之後就轉左沿引水道行去紫崗橋。
咁好陽光又影張相先~今次灣晒腰嚟影夠晒誠意。好有藝術感(藝術嘅嘢你識條鐵咩)。
行多一陣就嚟到紫崗橋,跟住就去下一個目標大潭水塘。
紫崗橋呢度其實係個大交滙點,可以落淺水灣,上孖筋山,上紫蘿蘭山,又或者去大潭水塘都得。雖然個牌寫住去大潭篤水塘,其實條路係會先到大潭中水塘水壩先嘅。起行落去水塘~
鏡頭一轉已經行到嚟大潭中水塘,仲落埋嚟水壩下面影相。
今次都係第一次行落嚟水壩下面,四維行發現原來有小行可以行上去水壩嘅另一邊。
第一次喺壩嘅另一邊影相。
睇完嘢繼續行程,沿水塘路行上去大潭上水塘。
由於呢段水塘路大易行,所以都好鬼多人。為咗避開人流,今次試吓兜右邊上,順便又試吓啲未行過嘅路。
果然九成九嘅人都唔行呢邊,一個人都冇。正啊~
行多一陣見到路邊有啲屋仔,唔知會唔會係以前水塘啲員工宿舍嚟呢? 唔理咁多,一於八吓先。
似乎呢度個建築群都幾大,行吓行吓仲比我搵到個屎坑。夠晒特別喎~
除咗踎厠,仲有個座嘅。不過睇個樣都唔荒座得舒服,踎可能仲好。
作為一個屎坑,梗係要諗吓通風問題。屎坑頂有幾個'煙囪'散氣,做形夠晒特別。可惜家陣時間唔係好夠,有機會要再嚟多一次四維行耐少少。
繼續沿路行,嚟到一個分岔路口,照路邊指示靠右行落去。
再行多一陣就嚟到大潭上水塘,影吓個水壩。
之後嚟到第二個分岔路口,正路去大風坳應該直行,但如果想避吓人又唔介意兜遠啲就可以行右邊條路。
我就梗係會揀條少人啲嘅路嚟行啦,一個人都冇超舒服。
今日咁好天個日落應該會好靚,不過陣間行啲路都唔會有機會睇到。呢度影到少少都算唔錯啦,好過冇。離遠仲可以望到啱行過嘅地方,好似行咗好遠咁。
繼續行最後嚟到引水道,之後就上幾級樓梯轉入去。
好,跟住呢條都係相對靜哋嘅路段。
好喇,終於返到嚟大風坳。
好清靜,大部分人都已經落山了。
我都開始落山。
今日時間掌握得唔好,趕唔切喺入黑之前落完山。好在柏架山道尾段係有街燈嘅。
落到嚟出口,今日啲山行晒了。
行出街口轉左沿英皇道行多陣就係地鐵站。
最後行到嚟鰂魚涌站,今日行完收皮~
路線記錄
Total climbing: 920 m
Total time: 03:59:04
發表迴響