今日跟攝影團去影相，由嘉道理農場起步上去大刀屻前嘅一個小山峰影日落。一向唔鐘意夜晚行山嘅我就梗係趁呢次機會了解一下路線環境，再計劃自己去行啦。原來郊遊地圖上面啲虛線部分實際上好易行好清楚，再請教領隊話條路好安全唔會有狗追。咁下次我就嚟行晒成段喇。
講番今日行程，只要用自己嘅方法嚟到嘉道理農場就得。今日人多夾錢由大埔火車站飛的過嚟大約係 $70，五個人分都唔算太貴。落車之後行過對面馬路就係山路入口。
山路入口就喺嘉道理農場對面個巴士站旁邊，好易見到。過馬路之後一團人跟住領隊行入去，先喺地圖前面停一停了解下陣間要行嘅路線。
之後就正式出發了。
雖然唔可以話係一條直路，但係每個分岔路口都有指示牌，所以就算係第一次嚟都一定唔會行錯。
頭段夾雜斜路同樓梯，沿路都有樹蔭唔算辛苦。
又有一個路口，繼續直行上山。
行多一陣經過一座建築物，上面有鬼咁大個天線，可能係一個中繼站都唔定。
又有分岔路了，都係繼續上。
以行山嚟講我覺得上山係爽嘅，不過團友又攞相機又拎腳就會辛苦啲囉。
上完一段大斜路，先抖抖同等一等其他團友。前面遠處嗰座山就係大刀屻了
擰轉頭望下，原來之前行過個山又幾尖喎。
領隊為咗團友有個靚位影日落，叫團友喺前面山頭起壇。因為如果繼續行去大刀屻方向轉咗反而冇咁靚。呢個團行上嚟係為咗影相，咁安排都好合理。
到達目的地團友就開始 set 腳，但我嚟主要目的其實係探路，冇乜理由連枝標距柱都未見到就走人。於是同團友交帶一聲就繼續向大刀屻進發，等日落時先至再返轉頭 join 佢哋。
轉個頭就嚟到大刀屻，見到枝標距柱了。
喺呢到可以望到林村同大埔。
呢個就係大刀屻山頂了
放隻飛機出去飛咗一輪，又係唔知拍咗啲乜鬼出嚟。淨係識得同隻飛機影相，我似係玩遙控飛機多過玩航拍機?
差唔多時間要歸隊了，起錨行返轉頭。
見到團友企晒喺前面尖尖嘅山上影日落，咁我就用另一個角度嚟影下佢哋啦。
返到去時間啱啱好，大家準備收嘢一齊落山。
路線紀錄
Total climbing: 483 m
Total time: 03:36:04
發表迴響