跟人行昂坪

一直以來都好想試下跟健行之友去行山，可惜佢地每次行嘅路線難度實在係太高。對於我呢個弱雞嚟講，只能得個睇字。今次見佢地攪行大嶼山，走線包括兩段我一直想試嘅路段。再盤算一下自己喺附近都留低過唔少腳毛，體力應該可以應付，於是就水咗一個朋友同我一齊參加。原先打算到大澳之後就離隊，再由東澳古道返去東涌，萬萬估唔到連彌勒山轉向站都未見到就已經比大隊放星了(當中遇上特情況)。今次真係到爆，最後唯有同朋友一齊照原定計劃去完成餘下嘅行程。總結今次雖然係好瘀，但係可以跟佢地行咗前面一段都已經唔錯。因為我自已一個人係一定唔會去試至由䃟頭上山，今次有經驗之後可以考慮入秋之後試多一次?

山徑路線正如領隊簡介時所講，上山嘅路好明顯易跟，只要去啱入口照住條路行就得。不過今日太趕冇影相紀錄路線，只係喺尾段影下風景無聊嘢。

路線：東涌消防局>逸東>東澳古道>䃟頭>彌勒山轉向站>360救援徑>昂坪>東涌道>深屈道>象山>東澳古道>大澳>東澳古道>東涌
全長：31.26 km
時間：10小時03分

Total distance: 31566 m
Total climbing: 1470 m
Total time: 10:02:54

Download file: onpeng_gpx _2016-06-19_0902.gpx

一大班人九點前已經到東涌消防局集合等出發了，其實對我嚟講要咁早起身座車入嚟真係幾辛苦嘅?

領隊同大家簡介行程之後，大隊準時喺９點出發。感覺上佢地一開波就已經行得好快，唯有急急腳跟。開頭諗應該行行下會慢番少少，點知過咗逸東見前面嘅團友就開始慢跑。。。?為免墜後而甩隊只好跟跑

今日好天到爆炸，繼續跟隊。短期目標係唔要做最後嘅一個

我估全團人之中最屎嘅應該就係我同我個 fd 兩個，其他人個個都行得好快，想話停一陣影張相都唔係咁容易。好難得嚟到澗邊塞人先至有機會影番張相。今日上山路線係由彌䃟石澗旁邊嘅一條小徑上轉向站，領隊簡介時話係以前山野之王比賽路線嚟，但係今年政虎唔批冇得玩。

隊頭同隊尾差距越嚟越大，正當行到一個比較荗密嘅矮林時忽然聽到前面傳出尖叫聲。跟住有位前輩就叫我地先停一停，再大聲叫問前面係咪遇到地蜂???。之後聽前面走回頭嘅一位團友講話有好多地蜂針人，要先等一陣(同時傳話去後面叫人唔好上嚟住)。唔知係唔係因為忽然有太多人行驚動咗個地蜂巢，之後嗰位前輩教路話等啲蜂冷靜啲就可以試下靜雞雞行過去。以我咁怕死，梗係死都唔行住。結果企喺到生曬，等咗好耐先夠胆硬住頭皮行入去，沿途只係遇到一隻地蜂，佢冇攻擊我地，平安過路。但係我哋因為停得太耐已經完全甩隊，前面連影到冇埋。好彩係跟住已經冇叢林路，同埋之後上彌勒山轉向站一段路算係我熟識嘅一段。