今日想試吓實行之前嘅計劃，由華山軍路行去香園圍路，再經禾徑山行上紅花嶺。今次成功過多一關搵啱路上禾徑，之後可以再計劃行遠啲落理去蓮麻坑礦洞。其實今日係有機會一次過落埋去礦洞嘅，不過上到紅花嶺已經係三點，擔心落到去都可能唔夠光影相了(未計可能要摸黑行出去座車走)。為咗控制風險，都係唔好一次過行太多自己未去過嘅路，遲啲再戰啦。
路線：虎地坳>華山軍路>坪輋路>五洲路>香圓圍公路>禾徑山>麻雀嶺發射站>紅花寨>紅花嶺>禾徑山路>長山古寺>香園圍公路>坪洋壁畫村>坪輋路>雲泉仙館
全長：21.73km
時間：6小時26分
起點係上水火車站，出閘之後就經天穚行過去上水廣場。
上水廣場啲聖誕佈置幾得意喎。個樣有啲似布甸狗。
其實入嚟上水廣場嘅目的係諗住經佢落去巴士站，有特別嘢睇就當係bonus啦。
正喎，一落到嚟就有車，仲係上梗客就嚟開車嗰種。
轉個頭就座到嚟虎地坳站落車，今日又係超多人嚟行山。
過馬之後就由呢個路口入去。
今日似乎唔係好夠水，都係買多一枝穩陣啲。吖，個地球公仔又幾得意喎。
繼續行，嚟到呢個分岔路口靠左繼續行上去。
轉個頭就上到嚟杉山，呢度啲樹真係好靚。
繼續沿軍路行，離遠望到華山了。
鏡頭一轉就行到上嚟華山，多人到好似旺角咁。
人迫迫都迫埋嚟影一影佢啦。
繼續行程，離遠望落去靶場見到有人喺度紮營?。好似話係軍事禁區嚟架喎，咁大膽喺度紮營唔同係攞咗permit?
轉個頭又(好L辛苦咁) 行到上嚟犀牛望月，家陣月就望唔到喇，望到今日嘅目標紅花嶺。
再行多一段就嚟到軍徽，行軍路就梗係要影軍徽啦。
軍徽再行前少少就係飛機場，係放搖控機機友嘅場地。
行行吓喺路邊發現啲好奇怪嘅嘢，唔知點解路兩旁大量嘅草都比人用布條紮住。啱啱又係芒草季節，會唔會係”有心人”唔想太多人湧嚟所以同啲芒草”絕育”呢？如果係咁就未免太過自私了。
繼續行程，開始接近今日嘅目標了。陣間打算經禾徑山上紅花嶺。
嚟到軍路出口轉左。
跟住靠右，一直沿馬路行出去坪輋路。
行到出嚟平輋路過對面馬路。
跟住轉入去五洲路。
一路沿馬路邊直去，如果唔夠水沿路有士多可以補給。之後就一路都冇架喇。
行到出嚟街口沿球場邊繼續直去。
經過天后廟，又係冇開。
過咗古廟之後繼續行前少少，留意喺前面呢個路口轉入去。
實際位罝參考
雖然個樣望埋去有啲唔對路，但其實係行到嘅，放心入去。
其實仲幾特別添，一條路一真跟住行。
行到第一個分岔路口就轉右。
之後繼續沿路行到尾。
最後行到嚟渠邊就過去對面。
過橋之後轉右。
跟住再沿渠邊行到尾。
之後出到嚟馬路就行出去路口。
前面就係香園圍公路，行山去過馬路之後就係正場上禾徑山。過馬路之後就會見到有一個斜坡維修道入口。
對上一次嚟探路唔成功，行到上去圍網冇路入。今次試吓由呢條維修道上去睇睇。
掂喎，似有路可以行。
維修道樓梯盡頭隱約見到小徑入口。
穿入嚟之後路徑就開始清晰，向圍網方向行過去。
一路行一路留意住左手邊，會有一個好明顯嘅山徑入口。不過喺上山之前繼續直去視察一吓環境先。
原來盡頭有另一仲維修道樓梯可以落去，下次或者可以由呢邊上嚟都唔定。視察完畢，返轉頭起程上禾徑山。
只要搵到個入口，之後一味跟住行就得了。
山徑都上得幾急，轉頭就上到好似好高。望到長山隧道入口。
呢段路都幾斜，向上行問題不大，如果向下就真係要小心。沿路都有人拉咗繩方便比山友借力。不過照觀察部分綁繩位置啲矮樹其實唔受得力，有啲繩又開始爛，所以唔好真係用佢嚟借力，當有嘢”傍住”心理上好啲就算了。當然，向上行係完全冇需要用繩嘅。
又係影相時間，睇到成條香園圍公路，一直通到去邊境。
繼續上山，行行吓見到啲鐵絲網枝架。可能係N年前啲禁區界線都唔定。
行行吓開始嗦到啲奇怪嘅氣味，再行多陣見到個堆填區先知原來係垃圾味嚟嘅?。
見到紅花嶺了，好似都仲有好遠嘅路要行咁喎。
原本打算一直沿山徑行到盡頭先至落車路繼續上，不過行到落嚟又懶鬼，提早轉落嚟車路行。
之後一直沿車路行上去，都好鬼長架喎。
行到上嚟接近紅花嶺山頂嘅一個發射站，冇乜特別嘢影。
繼續沿車路行到盡頭，有兩條路可以行，一條上紅花嶺山頂，一條經山腰過紅花寨。
好似經山腰行呢條容易啲，先行呢邊睇睇。
冇耐就嚟到另一個發射站，呢個好似叫做麻雀嶺發射站。
原來呢度風景一流喎，可以望到成個鹿頸。另外下面個平頭山好過癮喎，個山脊線平得咁緊要嘅。遲啲研究吓有冇得去行山先。
路住行埋過去紅花寨先。
行到過嚟紅花寨，山頂冇乜特別，唔覺有個寨喺度。四維啲風景唔錯，見到有兩個都幾凶狠嘅山峰，睇地圖話呢邊可以行落去伯公坳，仲有個麥景陶添。不過呢啲路線都係留番比啲高手去行算了。
望過另一邊可以見到深圳嘅梧桐山，今次算係第一次咁近距離望到佢。
影飽相就離開紅花寨，轉個頭就行咗過嚟紅花嶺。
慌死人唔知嚟咗紅花嶺，要影吓枝標上個個牌先。
係時候落山了，呢邊落好似好鬼斜咁喎。都係兜遠少少行另一邊落好啲。
呢邊好好多。。。
又返到嚟車路了，今日就行住咁多先，係時候落山。
一直沿車路行落嚟，行到臨近出口見到有個捷徑可以落禾徑山路。出去之後就右轉。
落到嚟禾徑山路，跟住就一直行返過去禾徑山村，順路可以去埋長山古寺參觀一吓。
轉個頭就行到過嚟長山古寺了。
間寺唔係好大，不過都幾靚。最緊要係呢啲咁吊腳嘅位冇乜人嚟，夠晒清靜。
離開古寺繼續沿禾徑山路行，之後出到香園圍路。繼續行經過先前視察嘅另一個維條道入口，睇情況都唔係好適合由呢邊上。即係前面個維修道係唯一一個上禾徑山嘅入口。
繼續沿香園圍路行，一直行到見左邊呢個路口就過馬路。
跟住入村，村口個牌寫住坪洋三鄉村。但睇地圖又話呢度係禾徑山村，咁信邊個好呢?。
入到嚟村口之後轉左沿路行，如果想睇古樟樹就直行，不過小心可能會有狗。
對上一次嚟呢條路有工程封咗，今日要試吓行山去望吓有乜嘢睇。原來上面只係得個涼亭冇乜嘢特別，上去一次就夠了。
跟住係行過去坪洋村。
呢度塊芒草田好似都出名，見有好多人啲影相打咭。一場嚟到我梗係影埋一分啦。
一路行就行到嚟村口嘅士多，拿臨入去買嘢飲先。
冇 zero 補腳力，唯有整枝冰涼嘅水飲吓。跟住就入村打個轉先。
對上一次嚟張櫈仲未比啲草包住，家陣應該冇人會座落去了。
喺壁畫村行咗個圈，諗住再去埋雲泉仙館行吓影相先至座車走。於是就出村口沿坪輋路行過嚟，差唔多到入口就見到有架巴士埋站。
行到嚟先知瀨咗嘢，原來係五點閂門，真係時間啱好。一嚟到就閂閘。唔怪知得啱啱架巴士停咗喺度一段時間都唔開車，原來佢諗住等埋啲人出嚟上車。今次真係7到冇朋友，尊程行過嚟摸門釘兼送車尾?。
唉，下班車連時間都冇。可以肯定係本年度最戇9嘅一次。
路線記錄
Total climbing: 1408 m
Total time: 06:26:25
發表迴響