路線:東涌市中心> 逸東>東澳古道(䃟頭>沙螺灣村>䃟石灣>深石村>深屈)>大澳
全長:13.87 km
時間:3小時6分
東涌到大澳係一條比較易行嘅路線,除咗尾段有少少山路之外,全程同行家樂徑冇分別。終點大澳係行完山後續活動嘅好地方,可以食下野影下相。好適合想行遠少少但又怕山路崎嶇嘅人仕
Total climbing: 549 m
Total time: 03:05:11
由東涌地鐵站出發行去逸東邨
經過東涌消防局,一直行到呢到上天橋
落橋之後繼續直行,跟住又會見到另一條天橋,今次唔唔上繼續直去
再行前少少,由天橋旁邊呢到轉落去
之後沿鐵絲網直行
行到呢個路口轉右向沙螺灣方向行。石門甲係可以連接地塘仔郊遊徑上昂坪,但如果要上昂坪我會揀行棧道囉
公園仔前面轉左,如果未去過候王廟可以直行出去打個轉先至繼續
喺候王廟對出草地望下大東山同鳯凰山,今日又係比雲包住咗
繼續沿路行,過咗球場同康樂營之後就嚟到海邊濕地。今日水退,梗係要出去睇睇
水退時出嚟濕地係可以一直沿岸行,去到一條樓梯先至再返去東澳古道。唔好諗住咁行法係唔路程短少少會慳咗時間,結果係相反嘅。所以如果唔係特別鐘意行出海邊最好都係沿古道行。如果諗住要行棧道就更加唔好行出來,因行出嚟會繞過咗棧道入口,要再行返轉頭就戇居了
無論水退得幾低,橫過呢到都一定要涉一涉水(濕腳)
查實如果唔熟路最好都唔好走落濕地,因為出口嘅樓梯遠望時唔太明顯,喺泥地行來行去搵出口唔多過癮嘅
行濕地嘅代價係”泥足深陷”
離開泥灘,又返來東澳古道了
沿古道行,一路都會見到有呢啲七姐果
前面就係䃟頭
可能因為太多人行錯了,呢個路口整咗個指示牌
沿路行,士多轉左
一條路,應該唔會行錯
繼續沿路行
轉個灣之後會經過一排屋,以前好殘破似荒廢咗,家陣靚咗咁多又似係有人搬咗入去住咁喎
行到呢到轉右,之後會再出到海邊
離開䃟頭之後係好易行嘅石屎路,其實成條古道只有尾段(大約五份一)係山路
再行一段路會去到一個觀景台,呢到可以睇到飛機起飛
古道全程有兩段大斜路,兩段都係上完斜又即時再落。
第一段斜路頂有個大水缸,唔知整來做乜嘅呢
跟住落斜路,去到呢到轉左繼續。轉右可以行出去沙螺灣碼頭,來回大澳嘅船係會經過,如果行到呢到想船走佬,可以出去碰下運氣
影飛機有一片農田做前景,唔多似係喺香港
沙螺灣新村
再行多一陣就到䃟石灣新村
照指示直行
䃟石灣有間三山國王廟,估唔到咁山旮旯地方嘅一間廟又打理得幾企理喎
近年行古道多樣野睇,就係興建中嘅港珠澳大橋。有多躉船,呢啲期間限定嘅相要影多啲先
好多蕉
離開䃟石灣再行一陣就要上第二段大斜路,比起第一段長。上到頂有個涼亭,仲有一塊睇唔到佢寫乜嘅石碑。第一行大字寫住”大嶼山深石村水圳碑記”。照地圖指示,呢到有小路可以行上去彌勒山轉向站
繼續行程,落斜之後就會見到呢條車路。代表到咗深屈了,呢到有士多可以吔野
今日水退,成個碼頭都露晒出來喎
呢到係深屈碼頭,有少少後悔以前冇橋躉嘅時候冇影多啲相
水退之後成個泥灘都係蟹仔,好正
除咗蟹仔,仲有好多魚仔
見到咁多魚仔就忍唔住要放一張喺 4 年前影嘅相,當時喺深屈碼頭同一個位置(水漲)見到一群”刀片”魚,開心到飛起。唔知以後仲會唔會有機會喺呢到再見到呢?
離開深屈碼頭,沿深屈道行,去到呢到就照指示牌方向轉右。如果繼續沿馬路上斜可以去到昂坪,不過由呢到行上去就比較戇居囉
繼續沿路行
然後靠左上
之後有一段樓梯要行,唔洗行好耐
石屎路鋪到呢到就完了,開始有山路行下
成日行過呢到都會影一影呢個海灣,今次認真對一對地圖,原來呢到叫新洲
唔知點解呢段路好似成日都有山火,睇嚟最近又燒過了
大澳在望,大約行多十分鐘就到大澳
見到呢個樓梯口唔洗理佢,直去
嘩,行行下喺路中心見到成隻手指尾咁長嘅毛蟲:o????
前面出去就到大澳了
對面呢間係楊候古廟,要行到老遠新基橋先可以過到去
拿拿林行出市集先
今日大潮退,平時觀光船行嘅航道乾到見晒底
六點先至入到嚟仲發夢想有船座,當然係冇啦
大熱天時行完,飲枝紫貝天葵山楂,爽到震?
今日帶咗頭兩部機出嚟玩,一部已經年過五十,另一部就係百年老妖。雖然兩部都算係古董,不過呢類柯達相機冇乜改裝價值(鏡頭唔靚)所以唔值錢。啱晒我呢啲窮人玩
夏天入大澳影日落有少少嘥氣,都係早少少座車走人好過
05/03/2017 at 3:15 下午
你每次刀自己一個行?
06/03/2017 at 11:18 下午
又唔係每次都自己一個行,十次有九次咁上下~
15/03/2017 at 10:46 下午
謝謝分享,很詳盡!
29/04/2017 at 5:49 下午
所以請問其實係米去到最後噶段路,佢話前方爛路唔可以行,其實可以忽略佢直接行唔上山的?
29/04/2017 at 9:19 下午
係的。嗰條路係比較窄,而且另一邊有一段係懸崖,係有少少危險性。條路兩旁都已經有好多草,可能好多行過咗都冇留意原來有一邊懸崖。其實只要小心啲行同互相禮讓就唔會有問題。眼見大部份人都唔會理個牌直行,當然係風險自付。