今日試吓一頭一尾咁行晒港島兩個比較高嘅山，由鰂魚涌出發行去香港大學。先上東區最高嘅柏架山，再經比較直接嘅路(唔係座車?) 行去西區嘅西高山。其實喺香港島除咗港島徑之外，係冇乜山徑可以橫向打通東西兩邊嘅。但係港島徑對我嚟講實在係長咗啲，悶咗啲同辛苦咗啲。所以一直都想出茅招搵替代路線嚟 KO 個香港島，經過幾次探路之後搵到可行嘅走線，沿途會經過好多市區入面嘅行人路同馬路，就當當自己行梗衛徑啦。好處係市區路段多，即係有大量中途放棄嘅機會。對部分人嚟講可能係賣點。
路線：鰂魚涌>大風坳>柏架山雷逹站>大風坳>畢拿山>渣甸山>陽日山莊>布力徑>灣仔峽>荷蘭徑>馬己仙峽配水庫>馬己仙峽道>梅道>中區自然徑>白加道>山頂廣場>夏力道>西高山>克頓道>龍虎山健身徑>香港大學
全長：23.86 km
時間：6小時20分
路線概覽 （按圖放大）
由鰂魚涌站出嚟，向太古方向行到嚟怪獸大廈前面嘅呢個街口轉右。
之後沿住條馬路一直得上去。
行咗成40分鐘，終於上到嚟到大風坳。之後當然係繼續上去柏架山啦。
行餐懵又上到嚟雷達站，如果身處油塘或者係觀塘海邊，一定會望到呢座山，同埋山上面兩個雷達波波。
好天嘅時候，風景一流。
好，影埋個細波就落山返去大風坳。
喺大風坳涼亭後面經天梯上畢拿山。
又上到嚟了，好L熱?。
一場上到嚟，點都要影吓個水塘嘅。
望番轉頭，好似離開個波波好遠。
繼續沿港島徑行，經過石礦場。
之後上到嚟渣甸山。
喺老遠望到今日嘅目標。。。個朋友，扯旗山。因為方向問題，由呢邊望過去西高山係會比扯旗山遮住嘅。
繼續港島徑第5段，經過呢個抗日英雄紀念碑。
再行多一陣就到出口，陽明山莊。跟住轉右沿行人路落去黃泥涌水塘。亦即係港島徑第4段嘅路線。
以前呢到有小食亭，係最理想嘅中途補給站。多得政虎，家陣呢到乜都冇。
鳴~~ 之前都仲有汽水機，家陣都冇理?。如果冇水飲就要座車走了。
好彩忽然醒起行落少少有個油站，應該有水賣喎。
好貴啊，一枝水要廿蚊??。
有水飲又充滿力量，繼續跟港島徑路線去布力徑。
行咗一陣就見到海洋公園同南朗山。
繼續好輕鬆咁沿布力徑行，嚟到呢到唔跟港島徑路線，繼續沿布力徑直行。
依？又有風景睇吓喎。
行晒成條布力徑去到尾，嚟到灣仔峽。其實比較多人會喺呢到沿甘道行上去山頂道，跟住就可以直接由白加道行去山頂。不過如果咁行就真係變咗全程行市區，好似冇乜意思。所以由灣仔峽落一落去，行多少少山徑先至再上山。
過去對面灣仔峽道。
由大斜路落去。
落一陣好快就會見到左手邊呢個路口，係荷蘭徑入口。
呢段荷蘭徑除咗入口呢個風車之外，全程都冇嘢睇。
一直行到見到呢個樓梯口，代表差唔多行完了。繼續直去。
好，嚟到馬己仙峽配水庫遊樂場。
呢到有啲好古老嘅水務設施。
配水庫呢到望出去個風景都唔錯架喎。
離開遊樂場，出口就係馬己仙峽道。
跟住沿住行人路向下行。
行到去前面個 U-turn 位就過對面馬路，呢到冇過路設施，要小心睇車。其實直行就係梅道，再行前多一少段就已經係梅道站。不過呢一少段係冇行人路，而且路窄多車，唔好諗住喺呢到行過去。
跟住落樓梯。
下面呢條都係馬己仙峽道。落去之後就沿行人路落。
之後經過纜車軌，咁啱有車經過。
繼續沿行人路行，嚟到前面呢個路口位就轉左行上去。
呢條係蒲魯賢徑，沿路行山去行到盡頭。
之後就嚟個 U-turn
轉上嚟高化利徑。
高化利徑盡頭就係梅道。
過馬路就係梅道站，幾特別架，如果未嚟過就要喺到等吓纜車經過同影相喇。
梅道站行前少少電話亭旁邊就係繼續上山嘅路。
上一大段斜路之後嚟到最後係一條樓梯，上去之後就係白加道了。
上到嚟白加道就沿路邊向前行，冇行人路嘅。
行一陣就有靚景睇。
行到街尾就係纜車嘅白加道站。
呢個站又係好特別，一定要入嚟睇吓影番張相。
轉上去芬梨徑
山頂廣場裝修完又幾靚喎。
雖然仲有貨可以上晒扯旗同西高，但係時間就唔多夠。二選一情況之下上西高山比較合理，因為行完可以經龍虎山落山，比較順路。決定之後就由轉入夏力道出發去西高山。
行咗大約10分鐘嚟到涼亭。
開始上西高山。
到山頂了～
唔睇日落了，趕快喺天黑前落山。
呢到真係幾靚，又涼涼哋，有少少唔想走。
沿克頓道落山。
轉落去龍虎山郊遊徑。
燒烤場冇人，平時好鬼旺架。不過呢個時間冇人都好正常。
松林廢堡炮台。
落完一段長樓梯，之後轉左。
行多兩步繼續再轉左。
然後又轉番右。
跟住又落樓梯。
跟住過對面條樓梯繼續落。
有指示牌，沿小徑行落去就得。
繼續直去。
到了，落去就係百週年校舍後面嘅大學道。
港大地標，國殤之柱。完成今日行程。
今日完成只係個開始。之後會再進一步實行橫行港島計劃?。
行程記錄
Total climbing: 2091 m
Total time: 06:19:25
發表迴響