話說第一次行衛徑到終(起)點時，明明已經好近，但係就冇路可以行去赤柱(行馬路又會被車車死)。之後一直想搵方法可以用行山(路)嘅方式嚟入赤柱，後來搵到可以由赤柱西引水道行過去，不過要無無謂謂兜太圈唔順路。今日又再挑起條筋試吓搵路連接西同東兩條引水道，結果發現呢一小段山徑比預期困難得多。根本就唔係行山，所以唔好作為路線參考，睇吓就算了。乖乖地行到衛徑就落去座巴士入赤柱。
路線：鰂魚涌>柏架山道>大風坳>柏架山>大風坳>大潭上水塘>大潭西引水道>淺水灣坳>赤柱西引水道>赤柱東引水道(老虎山引水道)>赤柱峽道>赤柱村道>赤柱灘道>黃麻角道>軍人墳場>黃麻角道>赤柱大街>美利樓
全長：21.67 km
時間：4小時43分
路線慨覽(按圖放大)
座狗鐵由鰂魚涌站A出口轉右沿英皇道行，好易搵一定唔會錯。
行一陣去到怪獸大廈前面個街口再轉右，有鬼咁大個指示牌應該唔會睇唔到。
由街市旁邊條斜路就係上山嘅入口，超多人由呢到上大風坳行山。
行咗大約半粒鐘上到嚟大風坳了，繼續上埋山頂波波先。
粒山竹牛肉吹爛咗好多嘢，包括畢架山雷逹波波。不過柏架山呢個冇爛不特止，仲好似少咗啲千年老泥漬，白淨咗好多喎。
今日天氣唔錯，能見度好高可以清水楚望晒香港島兩隻腳。
行去另一邊嘅細波波，風景一樣正。
影多張波波就走。
轉頭就返到落嚟大風坳。
繼續行程，沿港島徑行落去大霸水塘。
今次全程冇跑，慢慢行落嚟水塘。
過埋條古跡橋就進入大潭西引水道。
鬼咁長嘅引水道，沿路冇嘢睇。當行到見到大潭中水塘即係代表就嚟行完了。
盡頭連接衛徑，跟住轉左就可以落去淺水灣坳。如果直去就係紫羅蘭山徑，可以返去黃泥涌水塘。
沿樓梯落淺水灣坳，直望可以見到超多樓梯嘅孖崗山。
到淺水灣坳了，跟住就轉右沿引水道行。
直去呢條叫赤柱西引水道，都係又長又悶架喇，不過呢條路都有少少風景睇下嘅。
呢段引水道相比啱啱行完嘅大潭西引水道䦚好多，感覺舒服啲。
有風景睇，淺水灣全景。
見到赤柱即係就嚟行完(呢段)喇。
前面就係連接衛徑嘅十字交界，一般情況之下嚟到呢到唔係向上上孖崗就係向落座巴士走。直去係一段極短嘅疑似引道，但行幾步就會見到盡頭冇路了。
我估應該有好多人同我一樣會因為好奇或者係嘗試搵路落赤柱走入嚟呢條路，跟住又因為見到冇路行而返轉頭 。今次係我第三次行入嚟，決定要試一試繼續行。
引水道盡頭係有一條小徑，以泥漬同雜草位置應該好容易辨認到。不過記憶之中對上一次搵路時入口係冇咁明顯嘅。
行上去之後小徑變得更加明顯，不過唔好諗住之後啲路會係咁好行。
之後嘅小徑開始模糊同狹窄，一邊係斜坡，真係可以碌落山嘅，望落下面赤柱峽道仲好鬼高。如果有啲啲淆底嘅感覺，應該即時原路折返唔好再去，因為之後嘅路會越嚟越淆。緊記安全第一。
沿小徑繼續爬升，之後係一段半爆林嘅路。見到有好殘舊嘅絲帶，代表之前應該有行山隊行過呢到。不過千其唔好諗住靠啲絲帶嚟帶路(呢個係常識吧？)
呢段路夠晒刺激，好地地喺引水道高度過唔到，要向上爆一段，諗住到落嗰時會好番少少。發現終於都唔洗再爆林，不過要跳崖唧。
用跳崖嚟形容可能係誇張咗啲，不過粗略估計斜坡應該最少都有60至70度。起初還好，只係大石同泥路，好容易搵到落腳同借力位。落到尾段接住一條石澗，斜度upgrade咗(可能有80度) ，兩旁嘅矮樹又消失晒。好彩石澗己經乾水唔跣，如果唔係喺乜都冇嘅情況之下都幾難可以安全落到去。可能係我太屎，但以我自己嘅標準嚟計，實在係唔建議試行呢段路。
龜速爬咗好耐，終於都落完條石澗嚟到引水道。第一時間見到兩樣嘢，一個係水閘，另一個係山墳。呢到係老虎山引水道嘅盡頭，沿引水道行前少少就有樓梯可以落去赤柱峽道。
好快就見到一條樓梯可以行落去馬路，不過呢到落去係有機會比車車死嘅。
再繼續沿引水道行多一陣，見到前面呢個鐵絲龬即係到出口了。
留意鐵絲網䀆頭轉右落去就係出口。
跟住沿樓梯落去。
攪掂，落到嚟赤柱峽道。行過去對面沿行人路就可以去到赤柱。如果以行山計今日已經係行完了。
出口位置寫住呢樹係赤柱崗配水庫。如果諗住逆走上衛徑可以認住呢個入口。其實郊遊地圖係有標示跳崖石澗嗰一段路嘅(反而爆林段就冇) ，同埋向上行難度都會減少。 之不過逆走確係有啲無謂，所以仍然唔建議行。
轉個頭就行到嚟赤柱正灘。
今日嘅目標唔係赤柱，繼續前進。
目標：軍人墳場。。。
沿黃麻角道繼續行。
好彩嚟到都仲有少少陽光，拿拿林入去打個轉先。
入口有資料介紹，呢到由英聯邦戰爭公墓管理委員會負責保養。官方網站有詳細介紹，不過只得英文版，要睇中文版資料可以自己親身嚟慢慢睇。
二次大戰死得人多，死日本仔侵華係事實，好多人因為呢場戰爭而死亦係事實。雖然今時今日應該冇乜人會因為侵華而仇恨日本人，但應該大部分人會同我一樣對呢班因為抗戰而死嘅人有點點敬意。
感覺好寧靜。
離開墳場原本想試吓盡量向南行，不過再行前少少就己經再冇行人路。仲有幾頻密嘅巴士經過，都係走頭算了。
有路可以直接落大街喎，咁梗係唔行黃角道啦。
今日就以美利樓嚟做終點啦。
早餐之後都冇食過嘢，家陣食番杯雪榚都唔算過份啦。試吓新嘢，奶茶麥旋風。。。。味道好奇怪囉(浪費咗個quota添)
路線記錄
Total climbing: 1173 m
Total time: 04:43:50
發表迴響