習慣咗元旦要去行個大運,踏入2018年以打大圈做個開始~~眼高手低嘅我繼連續兩年敗走之後今年調整路線,終於可以照計劃行完全程。就算今次嘅難度同距離比之前目標低,我都會當自己有進步架喇~今年有個好開始?
其實今次嘅行程除咗長之外可以話係冇乜難度,因為大約有四分之三都係上落唔大嘅平路。我估換轉係玩長跑嘅朋友,跟本唔需要用九粒鐘咁耐嚟完成。路線大致上分為頭段東涌上昂坪,之後落山去石壁,再經分流入大澳,最後沿東澳古道返東涌。
路線:東涌>360救援徑>昂坪市集>心經簡林>石壁郊遊徑>石壁水塘>鳯凰徑8段>分流郊遊徑>分流東灣>分流炮台>分流西灣>分流小學>凰凰徑7段>二澳>大澳>東澳古道>東涌
全長:46.83 km
時間:9小時08分
去玩肯定會勤力過返工,今日一早就起身落街食早餐。而每次長征出發之前都一定要吔個餐蛋麵,食完就有氣有力喇?
入到嚟東涌經過聖安娜廚窗見好吸引,不過今日已經買咗提子飽,唯有欣賞一下就算了
今日天氣唔好,唔荒會有靚風景睇了。影張相就出發
時間早就連條街都冇乜人
轉頭就嚟到360 入口
上到觀景台,天陰陰冇乜睇頭
3號塔附近嘅木樓梯爛咗,如果踩錯腳都會幾危險。不過當我呢個漏氣鬼開始寫post嘅時候,條樓梯已經整番好了
鏡頭一轉上到嚟市集
之後嘅路程其實幾遠,最快要去到分流村至有補給。不過路唔難行天氣又唔熱,1.5L夠我飲了(btw,我習慣唔入村)
繼續行程,去心經簡林
呢個路口行入去
嚟到心經簡林,前面係上凰凰山嘅入口,旁邊就係石壁郊遊徑
呢到好多人,但冇一個係行去石壁郊遊徑嘅。咁都好,包唔會塞人
行咗好耐,終於見到石壁水塘。但明明係落山路段點解好似行嚟行去都係平路咁嘅呢?
沿路遇到好多迎面而來嘅山友,落山嘅就只係得我一個。本來覺得有少少奇怪,行到嚟呢到終於醒覺咁多人由石壁郊遊徑上山,其實並唔係為咗去昂坪嘅。
繼續落山,回望上狗牙嘅山脊有好多人。又一個MK山誕生?不過呢個MK山係唔可以隨隨便便就去行
再行一大段路,嚟到另一個上狗牙嶺嘅入口,應該係中狗牙了
行咗差唔多成粒鐘都好似冇乜點落過山,忽然見到有得落樓梯落真係會好開心
跟住呢段樓梯感覺有啲似係用水渠改建出嚟,唔太好行
終於到了
行出去轉右
望一望地圖,一共有11個箭嘴。呢5.5公里行咗我一粒鐘,都唔算ok啦
依,發現顛?❗食咗唔會發癲,不過小則中毒,重則??。好似話佢係香港常見嘅毒草,但係我都係第一次見到咋喎
穿過閘口行出去嶼南道
水塘邊加裝咗太陽能發電板喎
元旦嚟行山,仲有乜嘢係好得過影到個時間同日期呢?
天陰陰都有12.9Kw,唔知咁算唔算多呢下?
唔睇呢個牌都唔知原來水壩係由法國佬起架喎,今時今日喺香港啲地盤見到都仲可以見到佢哋個logo
跟住行過長長嘅水壩,呢到係鳯徑第9段嚟嘅
終於嚟到鳯徑8嘅入口,比原定時間遲咗。不過呢段路咁長,只要行快少少要追時間都唔會太難
相信大部份人(包括我) 係會座巴士嚟呢個鳯徑8起點,今日係第一次行山過嚟
影下個牌就出發了
沿路行一陣,見到第一個分岔路就靠右上
地下有雞乸咁大隻字寫住,仲有新整嘅指示牌
悶到嘔茄嘅引水道
見到呢啲新整嘅指示牌,好有理由相信去分流炮台嘅路已經重開
為咗慳時間,邊行邊食晏。每次拎個提子飽出嚟都梗有驚喜,今日佢喺背囊入面同枝水搏鬥完,出嚟竟然摺埋咗。變成一隻凶猛嘅怪獸?
轉個角度睇佢又變咗隻善良嘅青蛙,所以話提子飽好神奇(仲有我呢條友真係好低能)
繼續沿鳯徑8行,左邊有山路入口可以上去羌山郊遊徑
狗嶺涌營地入口
全段悶徑唯一比較唔同嘅引水道
終於行完呢段又長又悶嘅引水道,由指示牌旁邊嘅樓梯行落去
又睇下地圖先,要繼續沿鳯徑行,到分流郊遊徑就轉落去分流東灣
指示牌話去分流1.8公里行半粒鐘,去大澳就10.5公里行四粒半鐘。不過呢個係計算上山經萬丈布嘅時間,我經二澳沿岸邊行會快好多嘅
轉個頭就嚟到呢個路口,由呢到轉右上就可以去萬丈布。去分流就繼續直行得喇
呢到仍然有二澳村封路嘅告示牌,叫人改行山路繞過二澳。其實呢段路似乎已經解封咗好耐,好多人都係照行,甚至冇留意呢個封路告示都唔定
行到嚟呢個路口,左邊係落去狗嶺涌營地嘅樓梯。分流要繼續直去,但係我唔知發乜嘢癲跑咗落去。結果行咗一少段冤枉路
遠處望到分流東灣了,除咗見到一大班人之外,之前啲垃圾好似清走咗咁喎
行到嚟呢個鳯徑同郊遊徑交接路口,見一班山友喺到討論應該點行。我當然係會轉左入郊遊徑落東灣,不過佢哋就揀咗直行入分流村。其實咁遠行到過嚟,都唔爭在行多少少落海灘行吓啦
都好,佢哋行開咗方便我影相
行近啲睇,東灣真係乾淨咗好多喎
驟眼望吓海灘中心啲垃圾全部都清走晒,不過再望入少少就發現啲垃圾係推晒埋岸邊草叢?
繼續行開始見到一袋二袋已經處嘅垃圾,咁睇嚟應該只係暫時推埋一二邊再等處理。即時開心番晒?
海灘盡頭嘅郊遊徑入口重見天日了
景點之一,好似叫做僧人石
繼續沿郊遊徑行多陣就到另一個景點分流炮台
離開炮台之後仲有景點,就係一個古代嘅石圓環。不過之前去過覺得一啲特別都冇,今次唔落去了
跟住就嚟到分流西灣
由分流西灣直接可以直接cut入去分流小學,事隔大約一年半,成個操場長滿野草。如果從未嚟過可能未必會發現佢,就算見到都未必會行入去。
小學入面啲相有啲唔見咗,有啲就跌咗落地,淨低仲掛係墻上面嘅都已經好殘
呢張比較完整
睇下個黑板,似乎呢年幾以來有唔少人嚟過,留低咗好多訊息。感覺上之前乜都冇嘅黑板好好多
離開小學,可以繼續沿分流村村路行去二澳
不過我比較鐘意剷番落海灘行
認住呢個燒垃圾嘅爐,喺佢後面條斜路上去
出發去大澳
行冇幾遠就會經過煎魚灣營地
跟住只要沿住條路行就會嚟到二澳
有唔多起眼嘅指示牌
跟住喺呢到靠左直去
再繼續沿路行就會出到去海邊
之後又嚟一段長長嘅平路
出大澳途中經過一間海神古廟,跟住喺明報網站搵到一編好有趣嘅報道。從來冇諗過”城市剝削鄉郊”係會咁樣發生,又從來冇諗過原來自已唔太鐘意嘅二澳曾經有過興盛嘅日子。就算冇打算嚟行山都不妨睇下
繼續沿路行,經過另一個營地-牙鷹角
跟住係上萬丈布嘅樓梯口
大澳在望了
行咗三粒鐘,終於嚟到大澳
又嚟到碼頭,雖然冇諗過今日要座船走,但習慣上都係會睇下有冇船飛賣
仲有飛賣喎~ 好,咁我就一於行路出去?
入到嚟市集,飲番枝紫貝天葵補充一下體力先
出發返出東涌,近來古道旺咗好多經常塞人。雖然4 點未夠,都係要急急腳行穩陣啲
真係火都嚟,樓梯旁邊嘅共棄單車又多咗?
到深屈了
難得深屈碼頭冇人,落去影張相先
索氣大斜路
到䃟石灣
跟住係沙螺灣
陰陰天行咗成日山,到日落時比我見一見個太陽。今日都算係咁了
繼續出東涌
又嚟到大彿頭水池,時間都仲係好早喎
到咗涼亭,又係時候影下相
哎呀,見唔到日落
今朝一早由呢到開始上山,大約 8 粒半鐘之後再返到嚟。嚴格嚟講打圈之旅喺呢到完成,之後就係重疊路線返東涌
鏡頭一轉就返到嚟東涌。Yeah~打圈完成
返到嚟東涌個天都仲未黑齊,走長途都算係少有囉
路線記錄(可隨便download)
Total climbing: 2135 m
Total time: 09:07:26
行程計劃方法參考
如果有興趣試下咁玩,可以先用自己嘅腳程嚟預計時間,減低因為不切實際嘅估算而要中途放棄嘅機會。今次以入黑之前離開山區為原則,將完成時間定喺18:00。之後根據每段預計時間向前扣減就可以知道出發時間,當中亦可以再扣休息時間同體力下降嘅因素。
四段路之中只有昂坪落石壁一段未行過,要以郊遊地圖估算時間。但係如果有多過一段路係未行過就最好先分段試行喇,因為路程越長時間誤差就會越大。
第一段東涌至昂坪~2:00
第二段昂坪落石壁~1:00
第三段鳯徑8,7去大澳~4:00
第四段大澳返東涌~2:30
唔計大約半粒鐘嘅逸東至東涌市區路段,咁預計用9粒鐘就可以行完離開山區。即係朝早09:00要由東涌出發,最後再加番分段時間就可以成為每段(趕)check point嘅目標。
今次最值得開心唔係因為完成咗一段低難度行程,而係自已評估能力同時間,再制定路線,最後成功執行。行為可能比較另類,但呢啲就係我嘅行山樂趣。
14/08/2020 at 9:35 下午
hello, 我睇緊由逸東去昂平到石壁, 揾到你的blog. 好利害, 可以行到咁長的山路.
想請教一下你平時會用咩app 去plan 行程? 我用trailwatch 覺得唔係咁易用(或者我唔太識時). 如果我的路線, 大概要有幾多公里? 感謝.