2019年繼續喺元旦日行個大運。今次試吓離開我最鐘意嘅大嶼山，轉戰新界三條熱門山徑。由元朗出發，經風景一流嘅雞公嶺去得個行字嘅大刀屻，最後上埋全港最高嘅大帽山打霧。唔算得係乜嘢高難路線，只係加埋一次過行需要多少少體力同時間咁解。
路線：逄吉鄉>雞公嶺>橋頭(粉錦公路)>北大刀屻>大刀屻>嘉道理農場入口(林錦公路)>梧桐寨>麥8>大帽山>麥8>鉛鑛坳>衛7>新屋家>大埔墟站
全長：30.93 km
時間：7小時49分
路線概覽(按圖放大)
今日預咗玩長途，理應一早出發。但係我又敵唔過張床瞓晏咗，入到嚟元朗已經係11點幾。要拿拿臨行去小巴站。
今次比上一次好好多了，冇行錯路順利嚟到總站。
之不過依然係要送車尾?。
半粒鐘之後就嚟到逄吉鄉。原來遲出發都唔止我一個嘅，小巴上面有一半人係嚟行山嘅(同我一齊落車)。不過應該得我一個諗住行去大埔。
正當我仲企喺到影相嘅時候，其他山友已經行到冇咗影。今次算係破咗玩長途最遲出發嘅紀錄，得六粒鐘日照時間，肯定要行夜山了(預咗)。
轉個頭就上到嚟警告牌，先前座同一架小巴嘅山友喺大後方消失晒。。。。
行咗40分鐘，終於見到第一枝標距柱。好似行到好高，其實只係得374M。
望返轉頭睇風景，雞公嶺嘅山脈真係好靚。
再望吓另一邊，見到短程同長程兩個目標。好似好遠咁喎，縮沙得唔得呢??
嚟到雞公嶺第二枝標距柱，呢到高572米，未算係雞公嶺最高點。一定要行埋前面呢個山峰仔，唔好偷懶呀。
行多40分鐘嚟到另一邊嘅警告牌，就嚟到出口了。
應該係多咗人行嘅關係，尾段嘅小徑已經變得好清晰。無驚無險就行到出嚟。
噢~肯定又係粒山竹牛肉做嘅好事。
行完第一段雞公嶺嚟到粉錦公路，再行前少少就係第二段起點。
呢到係橋頭村村口，亦係77k巴士站嘅所在地。有乜嘢唔對路可以喺呢到座巴士走人架喎?。
行咗一陣又再見到呢兩個大字，上色已經變咗甩色了。
繼續沿村路入山。
嚟到呢到又再聽到前面傳嚟嘅狗吠聲，真係會有少少心理壓力嘅。其實呢條算係多人行嘅山徑，好多人會由北大刀屻行落嚟，所以實際上係安全嘅。上次有狗追出嚟應該只係咁啱啲人冇鎖好門。(應該係，除非唔係)
順利嚟到入口，真係冇比狗追。不過都仲係聽到凶狠嘅吠聲，行快兩步走人好啲。
每次行呢段上北大刀屻都覺得勁辛苦，又熱又冇風。出汗出到成個人濕晒，消耗咗我唔少水同體力，好L辛苦咁行咗45分鐘上嚟。
雖然未肚餓，不過嚟梗呢段路係最適合開餐嘅一段，要食定啲嘢陣間先至有力上大帽。
行餐飽又嚟到大刀屻。
再望過對面，距離大帽仲係好鬼遠喎。都係唔好諗咁多，繼續行好過。
又行多半粒鐘，就快到出口了。
個巴士站真係好吸引，但都已經行咗兩個山，冇乜理由唔繼續行埋第三個嘅。
出到嚟林錦公路，好醒咁過定馬路，原來呢邊係冇行人路嘅。
由嘉道理落去梧桐寨入口大約有800米距離，又長又直，最好就係跑落去。
到了，過馬路。
嚟到今日唯一嘅補給站萬德苑，原來已經閂咗門?。好彩我仲有一枝750未開，如果唔係就要行番轉頭座車走了。
開始上山。
行咗一陣遇到幾位山友，佢地研究完地圖之後就向瀑布進發。查實佢哋呢個鐘數先至去睇瀑布係晏咗少少。
我嘅目標係山頂，梗係唔會經瀑布上。行樓梯就啱晒。
指示牌話要行粒半鐘。
又再好L辛苦咁行咗35分鐘，上到嚟瀑布頂呢個路口位。
指示牌話仲要行多45分鐘。
上到嚟麥徑了。
目標在望了，仲有一段大斜路要行。
又係適當時候食埋淨低嗰半個提子飽(energy?) 。
大約五粒鐘之前喺雞公嶺望過嚟，家陣我又由另一邊望番過去。其實我幾鐘意呢種山頭對望嘅感覺。
終於都上到嚟，影完個波波就安樂了。可以走人返大埔。
山頂又大風又凍，想話留多陣影吓相都唔得。
起程返大埔。
沿麥徑落鉛礦坳，跟住轉衛徑返大埔。嘩~呢到話去鉛鑛坳要兩粒半鐘。行上就可能要，行落去應該會快好多。
一早有準備要行夜山，帶定燈嚟。
日落之後一段時間仲有光，加上市區嘅光污染，就算唔開燈都睇到路。不過為咗安全冇乜點跑。
行咗大約45分鐘嚟到出口。
第一次黑媽媽嚟呢到。
跟住就係最後一段衛徑7。
條路好黑，平時覺得呢段落山最好跑，但夜晚黑就唔同玩法了。加埋有啲微微雨，一唔小心好容易會pk
終於都行完晒今日嘅山路，回到文明了。
沿馬路行出去新屋家。
有小巴出去大埔火車站喎，不過我唔會座囉。
其實由新屋家返大埔唔遠，行完條碗窰道前少少就已經係運頭塘邨。再穿埋商場出去就係新達廣場。
今日嘅終點大埔火車站。
路線記錄
Total climbing: 2525 m
Total time: 07:49:09
今日行程大致上分為四段，每段大約兩粒鐘。第一段由逄吉鄉去橋頭村好輕鬆，因為體力充足同全段路都好涼爽。第二段上北大刀屻去嘉道理嘅山路亦唔算難行，但係意料之外嘅高溫消耗咗我大量嘅體力。到第三段上大帽體力下降，差不多長期 zone5 唔敢快了。跟住上到麥徑又嚟個氣溫急降，真係爽死。到最後第四段落山就最輕鬆，不過仍然用咗差唔多兩粒鐘。
Update @ 20180118 – 加貼路線模擬影片
發表迴響