以前去旅行一定會抬住部大機，又呢樣又嗰樣，攪嚟攪去就係為影相。諗落都唔知係部相機去旅行定係自己去旅行。今次就試吓唔帶相機，全程用部電話嚟影相。比自己做返去旅行嘅主角。講番今年嘅嘅紅葉之旅運氣算係麻麻，好多時間唔係陰天就落雨。有啲原先計劃咗嘅地方結果都因為天氣唔好冇去到(或者係去到運吉)。

Day1 一到步放低行李就座車去行山。本來都唔想咁搏嘅，不過如果第一日唔去，第二日開始落雨就冇得去了。由相模湖起步一直行到嚟紅葉台附近開始見到有靚紅葉。

紅葉嚟講，呢啲橙黃溝埋深紅嘅就最靚。

高尾山山頂多人到爆，都係早少少落山喺車站附近個觀景台食隻熱狗睇吓日落仲好。部三叔除咗個廣角好L wide之外，啲味精仲好濃烈，啱晒我口味?

繼續落山嚟到藥王院，咁啱仲有少少陽光比我影到多一張相。

day2 落雨，唔影相走咗去行商場濕平。喺pokemon center到試吓部電話個live focus功能，原來又幾好玩喎，較果唔錯。可以影完張相先至決定個背景要幾矇，連轉色都得。

日落之後停咗雨，行去渋谷睇吓個青の洞窟，呢到係東京人氣燈飾景點嚟架喎。通常啲數碼機影喺呢啲環境影出嚟都會一pat屎咁，部三叔影到咁其實我收貨了。當然實際環境係靚好多，影相冇得比嘅。

day 3 本來打係打算去睇秩父睇大祭嘅，不過睇天氣報告話秩父落雨，咁就費事山長水遠座車去淋雨，留喺東京呢個難得有陽光嘅地方。一早起就去水元公園行吓，可惜最靚嘅時間己經過咗(不過都仲係幾靚嘅)。

行完公園之後座車落原宿，趁好天同佢影張相。當出年銀杏葉再變黃嘅時候佢應該已經比拆咗了?。

近近哋再去代代木公園，繼續影吓銀杏。樹上同地下都滿晒黃葉其實係好靚嘅。

日頭影相，夜晚就去濕平。其實嚟台場目的係為咗睇叮噹嘅，觸角獸只係順路經過影吓。

轉個頭喺另一個商場入面見到啲顏色好靚嘅波波。

day 4 一早座車落鎌倉嘅鶴岡八幡宮，商店街啲鋪頭未開，於是行出去外面嘅參道影吓相。兩旁嘅櫻花樹乜葉都落晒冇嘢睇，所以人影都唔多個。

睇吓人哋啲繪馬寫住啲乜嘢願望。。。

其實落鎌倉嘅目的係為咗行山，係諗住試吓行獅子舞睇銀杏落葉，點知附近啲山徑入面好多樹都比9月嗰時個颱風吹到斷晒冇嘢睇，今次又係老遠走嚟運吉。不過既然嚟咗就行一行天園徑影吓上次漏咗嘅十王岩啦。

沿天園徑行到尾嚟到半僧坊，喺觀景台見到富士山?。如果由呢度落去半僧坊條路會易行好多，下面都有少少紅葉影吓。不過我呢個cheap人為咗唔想比錢入建長寺，要行再行一段山路返去北鎌倉。

最後落到嚟明月院，比咗500円入場?，跟住排咗好耐隊，影咗一張每個人都差唔多嘅相?。

離開鎌倉落返上嚟新宿御苑，時間太晏好多位都已經食唔到光了。不過就算齋睇唔影都仲係幾靚嘅。

吖，行行叮見到寒櫻喎。由於太細粒同疏落，冇人有興趣埋嚟影佢。

如果早一粒鐘嚟就好了。

day 5 轉陣地落去関西，一到步就轉車入去嵐山。今次啲樹轉晒色顏色好靚，可惜就係多雲冇陽光。企喺到食風食到飽，頽晒咁行落山。喺嵐山戇戇居居咁浪費咗一個朝早。

鏡頭一轉又返咗京都，食完晏之後去咗西本願寺影銀杏樹。呢度係少數有嘢睇得嚟又唔需要比錢入場嘅地方。仲可以由京都站行路過嚟，路程只係大約10分鐘。

呢張啲色水同真實情況差唔多。啲銀杏葉係好鮮艷嘅黃色嚟嘅，望埋去好靚。

跟住返京都站座 JR 去丹波口駅，再行大約1公里嚟到 ROHM illumination。係京都人氣景點嚟架。

現場睇係幾靚嘅，最緊要係唔會人迫迫，行起上嚟都舒服啲。

去到ROHM總部附近嘅公園仔，啲樹裝晒燈個感覺好正。可惜夾唔啱日子睇唔到大學生(妹?)嘅唱歌比賽。

day 6 落咗神戶睇好出名嘅神戶ルミナリエ，每年12月都會攪，係為咗記念之前神戶大地震嘅死難者嘅。現場睇係係好靚嘅。

2017年嚟睇過一次，感覺係上一次靚啲。

跟住落神戶港行吓影吓相，食飽風就返酒店瞓?

day 7 又返咗嚟東京，去完朝日電視台就六本木附近影相。呢個招牌行貨位梗係要影吓啦。之後就再行去midtown到食風。

day 8 估唔到最後一日會係早精彩嘅一日，一早起身見天氣好到不得了，拿臨座地鐵落去外苑影吓銀杏。咁啱遇到有跑步活動，比我影到啲同平時唔同嘅相。

之後諗住近近哋去日比谷公園行吓，估唔到呢到啲紅葉會咁靚，有少少意料之外。

喺招牌噴水池入面，出現咗另一隻生招牌。黃葉倒影加對稱，今次都算有啲運喎?

其實就算拎住部大機都未必影到啲咁嘅相，就算影到咁嘅角度，都唔知要用幾多時間嚟執。用部電話乜都唔洗攪，一影就有張咁靚嘅味精相。(本身現場啲紅葉係好靚嘅)

跟住把握時間去濕平(買啲頽手信?) ﹐然後就差唔多要座車去機場。去到成田未入閘都已經日落，影埋最後呢張就返香港了。