習慣每年元旦都會去行個大運，一般都會盡量行遠少少。之不過今次終點位置同到達時間都有限制，今年一於行個短山，趁機會試吓一段未行過嘅路。由鰂魚涌起步經柏架山道上雷達站，再回頭落大風坳接港島徑上畢拿山。跟住經馳馬徑去紅香爐，然後穿芽菜坑村遺址落全港獨有(形狀)嘅勵德邨。最後行去天后站入維園。除咗芽菜坑村一段要穿林之外，全部都係正常易行嘅路。如果平時比較少行郊遊徑以外嘅路就唔好試入芽菜坑村，由紅香爐峰落去寶馬山道會好啲。
路線：鰂魚涌站>柏架山道自然徑>大風坳>柏架山雷逹站>大風坳>畢拿山(港5)>小馬山(衛2)>金督馳馬徑>紅香爐峰>芽菜坑邨>勵德邨>蓮花宮>天后站
全長：12.17 km
時間：3小時14分
路線概覽
喺鰂魚涌站A出口轉左，沿英皇道一直行。
行一陣就有嘢睇，係一座幾特別嘅唐樓。
繼續行到街口見到指示牌就轉左。
跟住沿住條路直去就得。
由入口一直行到上柏架山山頂都係斜路，一級樓梯都唔駛上嘅。中途有小徑可以直接cut上去衛徑，不過咁樣就會更加快行完，不如直接座車落維園啦。
上到嚟大風坳，轉左上山頂波波，轉右係港島徑上畢拿山。更係要先上一上山頂啦。
鏡頭一轉就上到嚟山頂。呢個波波係民航處嘅，由呢度望落去係可以見晒成日啓德機場。不過機場搬咗之後都唔知仲有冇用囉。
琴日落完雨，今日天氣都仲係麻麻地，上到嚟白矇矇都冇乜嘢睇。
休息咗一陣就落番去大風坳繼續行程。
轉個頭又落到嚟。
跟住就係行港島徑，喺涼亭後面條長樓梯上去畢拿山。
條樓梯都幾長嘅，不過就唔算太辛苦。
又上到嚟了，今日勁多人喎。
費事同人迫繼續行程，冇耐就嚟到港島徑同衛徑嘅滙合位置。
行完一小段港島徑，跟住就轉去行另外一小段衛徑。
呢段衛徑喺好耐之前行過一次，已經冇晒印象，今日行感覺好似完全未嚟過咁。
跟住係咁落樓梯。
再行多陣開始見到電台啲天線。
下面有條橋，有個石碑寫住小馬山橋。
過橋之後係一個十字路口，旁邊有個瞓低咗嘅指示牌。
打算經地圖上啲橙色小徑轉去金督馳馬徑，所以繼續直行入去。
發現附近有好多呢啲咁嘅石屎勾，唔知係咪係以前用嚟拉住啲天線杆架呢?
喺啲小徑入面行咗一陣發現唔多對路，支路好多，加上時間有限。都係行遠少少出番去大路過馳馬徑穩陣啲，遲啲有機會再嚟嘅話先至再喺到玩耐啲。
呢度真係有啲奇，有幾條交錯嘅小水道。呢到都咁近山頂，咁啲水點嚟架呢？
繼續沿住條石屎小徑直去。
出到嚟好似有啲嘢咁喎。
哦～原來又係電台嘅地方。
印像之中第一次行衛徑2嗰時行錯路係見過”內有惡犬”嘅牌，不過附近環境好似唔係咁，可能上一次係見到另外一塊警告牌都唔定。唔好理咁多，上埋啲樓梯就知有冇惡犬?
出到嚟就見到呢個電台重地了。
跟住沿車路行出去。
行到見左手邊呢個路口就轉入去。
有指示牌嘅，包冇錯啦。
呢段金督馳馬徑好平好易行，沿路都遇到好多人，有啲仲係一家大細。
行到接近紅香爐峰開始有靚風景位。
行到見到分岔路口，再直去就係香爐。
繼續直去就係上山峰頂嘅路。
一行入嚟就見到左邊仲有條路，不過正常嘅一望就會知左邊呢條唔對路，所以應該唔會行錯。
轉個頭又上到嚟，望到無敵靚景。呢到望到維園之餘，仲可以聽到下面集會傳上嚟嘅聲。
離開峰頂開始落山，原路落去之前個路口，再轉入去左邊條小徑。
嘩，一起步就有嘢招呼我。好彩行得慢，如果唔一定花晒。
其實之後嘅小徑都算清楚，仲有山隊留低咗密集嘅絲帶，只要慢慢睇清楚條路唔太難跟。
行行吓應該入到廢村範圍。
嘩，不得了，呢度啲樹幹全部都係同一棵樹嚟嘅。好有獨木成林feel。
生到連條路都比佢霸晒咁濟，穿過啲樹根路感覺好特別。
可惜四維都係濕淋淋又天陰，遲啲要再嚟多一次慢慢影吓相。
呢到以前係芽菜坑邨，住咗好多人架。不過啲人搬走咗幾十年，可能好多嘢都己經比啲樹木蓋住晒了。四維望都唔多覺有啲乜嘢明顯嘅”遺跡”。後來比我見到呢個，唔知係乜嘢嚟呢？
之前跟住行嘅山徑喺入村之後就消失咗，村入面啲路唔係爛咗就比啲樹葉同雜草蓋住晒，臨近尾段搵路開始有啲困難。最後都搵到條似樣嘅路繼續落山。
到了，見到馬路。
成功由紅香爐峰落到嚟怡景道。
其實呢到都仲算係喺山上面，要再行多條樓梯落去。入口就喺巴士站旁邊。
夠晒特色嘅勵德邨，好似個雙筒望遠鏡咁。呢個都係今日要睇嘅景點之一。
跟住再落晒條樓梯。。。
落到嚟最後一個景點蓮花宮，佢係法定古蹟嚟架。
再行出嚟就到咗今日嘅目的地，準備開始今日嘅part2行程。嘩，乜咁鬼多人架，唔知幾時先至迫到入去?
路線記錄
Total climbing: 953 m
Total time: 03:13:45
發表迴響