今年元旦繼續照慣例搵個長山嚟行吓，想試吓夾埋三段比較少人會一齊行嘅路嚟行。由大美督出發環湖，之後經八仙嶺落鶴藪，再經沙羅洞上九龍坑山落太和。每段路線本身都唔算係難行，不過加起嚟就有一定長度，莫講話要上上落落，就算係行平路都要啲時間嘅。路線記錄全程37公里入面如果唔計頭段水壩2公里，同尾段沙羅洞出大埔4公里，堅行山路段都有32公里。自已覺得算係夠長了。可惜今次唔夠時間要敗走，要留待下一次再戰了。
路線：大美督＞船灣郊遊徑＞新娘潭路＞八仙嶺自然教育徑＞八仙嶺＞鶴藪＞平山仔＞沙羅洞＞丁角路＞大埔中心
全長：37.14km
時間：9小時59分
今日玩長途要倒塔咁早出發，一早起身烏吓烏吓?咁去座火車入大埔。
入到嚟大埔，第一件事就係食個長征必備嘅餐蛋麵??喇。
吔完嘢買埋飽就座車入大美督。
啲人環湖十居其九都鐘意座車入烏蛟騰起步，但我就次次都係由大美督出發，勝在唔洗同人迫。特別係呢啲時候?，越少人就越好啦。
鏡頭一轉已經入到嚟大美篤，先點算一下今日裝備。。。地圖，?古力，3L水，再加２個飽。
好～正式出發～
時間早水壩上面冇乜人，感覺好正。
長到望唔到尾嘅水壩。。。
終於行到嚟壩尾，擰轉頭可以望到陣間要行嘅八仙嶺。喺呢邊望過去一排山峰真係幾鬼靚。
跟住係穿過個閘繼續行程。
閘上面有啲告示一定要睇下先，因為唔知會唔會係入面封路或者係有其他嘢，行到入去先至返出嚟就戇居。好彩睇完發現完全唔關事，可以放心繼續行程。
吖，唔知係之前冇留意，定呢件嘢係新整嘅呢？仲有個制喺到叫你㩒，梗係唔啋佢啦，㩒咗都唔知會唔會有乜事發生?。
依？係咪又係之前冇留意呢？好似多咗個太陽能板喎。
咁早啲釣魚友未出動，碼頭呢到一個人都冇。對面岸就就係馬鞍山。
依？前面有兩位山友喎。
轉頭上到嚟副水壩，行到嚟呢度必定會狂影相。
呢條梯都唔同咗，印象之中係條生晒锈就嚟冧嘅梯，家陣變咗條閃令令嘅不锈鋼梯。
呢座小山幾靚，佢連接住兩條副水壩。呢邊有放水功能，另外一條就係條普通水壩。
嘩～另一邊副水壩啲芒草都好靚喎。又要影吓先。
漏漏氣氣，行到嚟已經係９點半。真正開始行山了，希望夠時間完成目標。
入郊遊徑行一陣就會見到路旁有枝石柱，唔知道實際用途係乜。段估應該唔會係整嚟標示落去老虎笏嘅路呱?，有機會都要試吓行落去睇睇。
老虎笏呢到嘅地形應該係全香港獨一無二，講咗話要去好耐，但一直都只係停留喺口嗡嗡階段未有成事。
見到第一枝標，呢到叫長牌墩，四維都比樹包圍住所以係冇風景睇嘅。
指示牌話距離鹿湖峒仲有５公里路。
呢個伸咗出嚟嘅小山係每次環湖都必影嘅地方。
見到另一個指示牌，今次話仲有 3.75 公里。
又行咗一大餐，嚟到呢個牌話仲有 0.75 公里。
行多段斜路上嚟，嘩～個指示牌爛咗喎，兩塊都跌晒落嚟。
地上面個牌話仲有 500 米就到。
見到呢啲石級即係差唔多到了，上完就到鹿湖峒。
終於到上到嚟，好Ｌ辛苦。係時候休息一下。
氣都未回面前就有兩位出嘴嘅山友經過。
上到嚟鹿湖峒就梗係要企喺招牌位影吓相，今日個天好清，遠處望到之後嘅目標八仙嶺。影飽相就要拿拿臨起行了，今日仲有好長嘅路要行。
另一個角度影個形狀又唔同晒了。
成條郊遊徑唔係乜峰就乜峒，總之就係好似行極都仲有咁。行吓行吓就嚟到觀音峒，又係一個冇風景睇嘅地方。
好多山友都鐘意行到有指示牌嘅地方停低休息，圍埋食嘢吹水。亦因為咁所以冇行埋去影個牌，前面係個係分岔路口嚟，直去會經下苗田去烏蛟騰(未試過行)，轉左就繼續行爛路去馬頭峰。
唔經馬頭峰又點算環湖呢，梗係行呢邊啦。
再行多一段又嚟到另一個喺橫嶺坳分岔路口，同之前嗰個一樣，都係要㨂左邊條路嚟行。
從來都未試過行呢邊，睇個指示牌寫距離同時間都同經馬頭峰一樣。咁到底呢邊路況係咪一樣難行呢?？
其實我相信無論自己再環湖幾多次，都一樣係會經馬頭峰去烏蛟騰。
越嚟越近八仙嶺了。
有枝標喎，影張相順便休息吓先。
上完一個又有另一個，好似上極都唔完咁。
最後呢個馬頭峰，上埋就可以開始落山了。
好L辛苦終於都上到嚟
尾段落山係樹根路，如果行到腳軟軟仲要落啲咁嘅路真係爽死。
好，終於都環完個湖嚟到出口了。
望吓張地圖，行咗紅色嘅路段再加多條水壩。跟住就要行出去新娘潭路。
呢條石仔路幾靚喎。。。
照指示牌轉右去新浪潭。
咁多人圍住個地圖，咁都係唔同人迫好啲。反正都冇呢個需要。
跟住就過石橋。
有指示牌指示去新娘潭路嘅方向。
仲有一段斜路要上，好Ｌ攰。。。
行到咁上吓見到呢條分岔路就要轉出去。
行出嚟之後會見到新娘潭橋。
之後再上幾級樓梯就到新娘潭路。
上到嚟新娘潭路過對面馬路之後再轉左再行前少少就係上八仙嶺嘅山徑入口。如果需要補給，可以沿行人路落多少少係巴士站有氣水機。
今日抬咗３Ｌ水出嚟，所以唔洗補給，直接上。
跟住係沿八仙嶺自然教育徑行一段，行到一半就轉上去仙姑峰。
繼續直去。
行到呢個路口就轉左，呢到開始係衛徑第９段。
行咗成朝開始肚餓，加上好Ｌ攰想休息吓。不如就食個飽先啦。。。拎個飽出嚟。。。嘩～你唔洗咁嘅樣下化，呢鑊真係麵飽代表我的心喇。
行到幾時先至知到要轉上八仙嶺呢？除咗路口有指示牌之外，通常都會有人喺呢度聚集。
好，起動上去搵仙姑～
好Ｌ辛苦咁又行到上嚟山頂，見到枝標。
一場嚟到點都要影吓個牌先。
行山最滿足嘅時候就係上到山頂高高在上咁望番下面嘅風景，如果加埋望到埋自己啱啱行過嘅路就更加滿足喇。好似行咗好Ｌ遠咁喎。
又係休息時間，座低食埋另外個飽先。吖，呢個個樣咁鬼正常，乜都幻想唔到添。
吔完飽又休息完，係時候繼續行程。
今日都幾多人行八仙嶺，行到曹舅峰嗰時見到有架直升機喺到。
由於唔行得住，唯有企定定喺到八掛吓啦，似係有位山友抝柴行唔到call?。都好，唔係啲有人受傷嘅意外。本來都已經唔係好夠時間，家陣再塞一塞車，肯定上唔到九龍坑囉?。
離開八仙嶺再上到嚟到黃嶺。唔爭在行多幾步上埋去望吓啦。
黃嶺呢個望落去風景都唔錯架～
再經過一段都幾攞命嘅樓梯，終於落到嚟鶴藪。睇吓錶天黑前仲夠時間可以出埋沙羅洞，即時轉左向平山仔方向進發。
呢段路相對少啲人行(呢個鐘數就更加係冇人)，可以舒舒服服除咗個口罩吸吓新鮮空氣。
有個指示去鳯園嘅牌，要去鳯園就會先經沙羅洞，啱路～
又幾靚喎～
轉個頭就嚟到沙羅洞。
離遠望到九龍坑山，可惜今日唔夠時間上埋去。
沙羅洞呢到都幾靚架～
前面轉右，轉左就有?招呼。
呢個位每次行過都會影一影。
嚟到呢個樓梯口，原本今日係諗住上埋去。不過家陣呢個時間就算上到山頂未黑，落山時都要摸黑，都係直接落山算了。
日落紅霞襯埋芒草都幾靚吖。
行完晒出到嚟丁角路，唔差太遠就行埋返出去大埔啦。
最後行到嚟大埔中心，完成今日元旦行大運之旅。
總結以1月嘅日照時間要完成環湖八仙嶺再加埋九龍坑山，以自已嘅腳程嚟計實在係趕。如果今日停嘅時間少啲係會夠時上埋去九龍坑山，到落山尾段先開電筒。唯有等遲少少日照時間長啲，加埋早啲出發再挑戰呢個目標。
路線記錄
Total climbing: 2068 m
Total time: 09:59:09
發表迴響