每年元旦都會搵啲長途少少嘅山嚟行吓大運，以前會提早計劃路線甚至係分段試行嚟了解路況同時間。今年就好懶冇乜點花時間去諗，頽到爆咁將啲成日行嘅路線串埋一齊就算了。雖然路線上一啲特別都冇，不過喺油塘出發行去大埔都係我想試好耐嘅一件事嚟，今日算係完成多一個目標。
路線：油塘>魔鬼山>五桂山>馬油塘>井欄樹>百花林>飛鵝山>象山>飛鵝山道>沙田坳>獅子山>筆架山>九龍水塘>城門水塘>針山>草山>鉛鑛坳>碗窰>運頭塘>大埔墟站
全長：38.41km
時間：9小時46分
起點係鯉魚門邨，旁邊就係巴士總站。如果座巴士唔啱，搭狗鐵去到油塘站出再穿過大本營行過嚟都好快。
一路沿晨運徑行上山，通常都習慣會影吓喺遠處嘅目標。可惜今日天氣麻麻，望唔到飛鵝山冇得影了。
上到山頂碉堡先知原來有唔少人會上嚟魔鬼山紮營等睇日出，諗落呢度睇日出又確係唔錯，交通方便又唔駛行餐死。不過今年天氣唔好，應該全部人都食晒白果了。其實如果係有囡囡陪，睇唔睇到日出都係其次，完旦第一咀先係重點囉😆。
喺山頂碉堡落嚟之後就繼續行程，轉頭就嚟到澳景路嘅樓梯口。
之前去飛鵝通常都會偷懶唔上五桂山，今日行大運就一於上埋啦。直去上梯，如果想懶經山腰行就去左邊條路。
都好似有一段時間冇行呢條路，記得之前好似冇咁多”善長”支助。其實都幾特別吖，咪當係港式嘅千本鳥居納奉囉🤣﹐忽然間”思鄉病”發作添。如果冇危險性又唔係阻礙通道，晨運友整吓嘢都冇乜所謂啦。唔知政虎遲啲會唔會又應做唔做，好似之前拆公仔咁拆晒佢。
上到嚟五桂山了，頂~ 有個廢佬喺到煲煙😡。即走~
行多陣就嚟到藍球板。
行到落嚟樓梯口遇到一班山友，佢哋似乎冇乜準備唔係好知自己行咗去邊。我估可能係喺茅湖山睇完廢堡行過嚟，話想去藍田。我同佢哋講落完條樓梯可以去馬油塘(當時唔醒起同佢哋講另一邊就係藍田公園), 結果佢哋繼續企喺度篤手機睇，我就冇理佢哋繼續行程。
轉個頭就出到嚟村口，跟手過馬路繼續行程。
冇耐又行到嚟呢個鬼祟嘅路口，繼續直行到尾就會見到個樓梯口。
時間早呢段路冇乜人，感覺良好。
行到出嚟清水灣道，跟住要經隧道過對面。行人隧道一出嚟就會見到今日第一個補給站(良好士多)。
暫時未有需要補給，鏡頭一轉就穿過晒啲村屋同農地，行嚟到衛徑入口。
嘩~ 做乜咁多人，好彩都仲未至於要排隊上山。
行到嚟呢個分岔路口，跟住就要離開衛徑轉上去百花林。
開始進入墓園。
墓園入面冇乜特別嘢好影，亦無謂亂咁影。轉個頭就行到上嚟飛鵝山道嘅出口。
沿飛鵝山道行多一陣就嚟到上山頂嘅小徑入口。
臨近山頂嘅一段兩邊有竹林幾靚喎。
終於上到嚟發射站，影張相打一打咭先。
跟住行埋上去發射站，喺堅固嘅鐵網間隙後面見到枝標，同佢背後嘅塗鴉。
影完相就要繼續行程，經象山過去飛鵝山道。
呢段路行過好多次，一直都冇留意到呢舊豬仔石。好彩今次聽到有山友話要同豬仔影相先至留意到佢，又真係幾似架喎。
轉個頭又嚟到飛鵝山道涼亭。
跟住要向下一個目標獅子山進發喇。
呢段咁舒服嘅平路最啱就係用嚟開餐，雖然扁咗但一樣係咁好味😋。
行咗一大段長命斜終於落到嚟沙田坳，見到今日第二個補給站。
入去士多諗住問佢有冇zero補腳力，結果講嚟講去佢都仲係以為我要減肥coke。最後都係就咁要咗枝水算數。
準備接麥徑第5段上獅子，喺入口見到有救護車，咁即係有人出咗事了。
行到嚟入口開始見到啲救護員落嚟，原來係有個上咗年紀嘅女仕拗柴，救護員幫手扶佢落山。都算好彩唔係有乜大鑊嘢。
見咁大堆人企晒喺度就知到咗上獅子山嘅入口。
需然只係500米嘅距離，但行山去都好L辛苦嘅。
終於都上到嚟，見到獅尾個警告牌。
啲人圍住晒個牌排隊等打咭，此地不宜久留，走~
行過嚟獅頭呢邊仲得人驚，開始有少少後悔行咗上嚟。
由山頂行落嚟呢一段全程塞人要慢行，真係仲辛苦過上山。結果行咗成15分鐘先落到嚟(行上都只係用咗10分鐘)。
離開獅子山，下一個景點就係筆架山雷達站消失的波波。
粒死人山竹牛肉除咗吹爛咗哥連臣角個大電視之外，仲吹爛埋筆架山呢個波波。初時以為會整，但等咗咁耐個波都冇出現咁應該唔會再有了。呢個係民航處波波，可能機場搬位之後已經冇用，只係費事拆留喺度。家陣吹爛咗自然係唔會整。
轉頭就行到過嚟另一邊嘅波波，就咁睇佢應該更加食風先啱，唔明點解反而佢乜事都冇。
繼續沿麥徑落山，落到涼亭就離開麥徑轉入去鷹巢山自然教育徑。
跟指示牌入自然教育徑。
仲有1.5公里。
好快就出到嚟，跟住行出去大埔道過馬路落九龍水塘。
過水壩之後就係金山道，好快就到城門。
又係好多人喎，想話除罩吸吓氣都唔得。
一路沿金山道落斜，會先經過衛徑嘅入口。行衛徑過城門感覺上好似辛苦啲，都係落少少行麥徑好啲。
再落多一段斜路就嚟到麥徑嘅入口，跟住傳右上樓梯。
再行多陣就嚟到呢個戰時古蹟，今次見冇乜人就試吓入去參觀吓。
原來入面都幾大架喎，地方仲幾乾淨企理。
依？仲可以通到過去附近啲地道架喎，咪住先，呢個係咪厠格嚟？
今日其實冇諗過會探地道，冇帶電筒。靠部電話又係咁好，都係唔行了。
上地面繼續行程，距離下一個目標針山仲有好遠咁喎。
終於都嚟到城門水塘，又開始人多熱鬧了。呢度係今日第三個補給站嚟。
真係好彩，最後一枝zero補腳力比我買咗，買完就成部機都紅晒。
超級邪惡嘅雪榚車，係咁呼喚我。
行到嚟城門水塘水壩，可以望到啱啱行完嘅獅子山。雖然望落好似好遠，其實行過嚟又唔會太辛苦嘅。
呢個抽水塔係地標之一，無理由唔影吓佢嘅。
好喇，起行上針山。
睇吓前面位山友就知上呢條係幾咁辛苦，不過佢雖然佢好似好攰，但好快就放咗我星了。因為我好廢😅。
頂~ 做乜行極都未到架。
終於都上到嚟，今日所有辛苦嘅路都行晒了，之後嘅路段會輕鬆好多。
上到嚟針山終於有休息時間，就用吔一個包嘅時間嚟大休。
上到嚟針山山頂天色好咗少少，隱約可以見到飛鵝山，老遠嘅出發點魔鬼山就望唔到了。大約5粒鐘前由飛鵝山起行，行咗差唔多2粒鐘上到獅子，之後再用多3粒鐘行到上嚟針山。望落好似行咗好遠咁，都幾有滿足感㗎。
食完嘢休息完就繼續程，向下一站草山進發。
草山離開針山都幾鬼遠，好似行極都未到咁。好彩全程只係斜路好易行，可以回一回氣。
行咗9個字終於行到上嚟草山山頂。
上到嚟草山梗係要行埋過嚟影吓枝標，今日最後一個要上嘅山都完成埋了。
係時候落山，沿麥徑路線落樓梯返落鉛鑛坳。
落到嚟鉛鑛坳，跟住就接去衛徑落去碗窰。
呢段路正，不過家陣未必有力再跑落去了。
出到嚟新屋家小巴總站，只係差少少路冇理由唔行埋出去嘅。
沿碗窰路行到尾落穚底，過橋之後直去就係運頭塘。
落埋隧道行返大埔站就係終點。
終於到逹終點大埔墟站，完成今次元旦行大運。
正當我諗住停錶時佢發出咗一吓最後嘅叫聲，見佢話冇電save梗，之後就自動熄咗。好彩佢都頂到最後一刻先至嚟死，粒電用咗幾年開始老化頂唔到長途。睇嚟今次有藉口換錶了。
路線記錄
Total climbing: 3677 m
Total time: 09:44:19
發表迴響