今日係 boxing day 撞啱日偏蝕嘅日子,機會難逢一定要睇吓。天文台話只要望住西面個天空就可以見到,不過我想去行山又想睇日蝕,於是諗咗條屎橋上西高山,貪佢夠晒”西”吖嘛?。上西高山最方便就係經龍虎山健身徑去克頓道,而上龍虎山最方便就係座狗鐵去港大,由大學道後山行上去。今日發現原來呢個方法已經行唔通了,門口食蕉叔叔仲好醒咁問”係咪去行山呀?唔行得喇,冇証唔比入”。睇嚟今日應該都唔止我一個咁樣嚟撞板。
既然衰咗,唯有落返嚟薄扶林道。其實沿路再行前啲都有入口上山嘅,但係我未試過囉。
繼續沿薄扶林道行,行到見到過路燈就過對面馬路。
過馬路之後望返過去港大宿舍
繼續行多一陣嚟到油站,喺左邊呢個樓梯口行上去。油站隔離就係蒲飛路巴士總站,其實如果唔座狗鐵,座巴士嚟都好方便。
今次係第一次試由呢邊上山,相比起大學道呢邊似乎人氣旺啲。
一開波就有段長樓要上,好在係既細級又均稱嘅樓梯,行起上嚟都唔算辛苦。
行完段長樓梯就見番條熟悉嘅路,轉右繼續上去。
上完段樓梯,仲要繼續再上。
路邊有指示牌,先上松林廢堡,再上克頓道。
再上一大段斜路之後嚟到呢個路口就轉右。
轉右之後就繼續喺右邊條樓梯上去,如果唔想行樓梯可以直去行斜路都一樣嘅。因為呢條己經係克頓道,可以一直行到上去山頂。
我貪快就梗係會行樓梯啦。
轉個頭就上到嚟松林廢堡。
啲人好鬼無聊,喺地下到畫咗個大圓圈,又幾鬼圓喎。?
行前少少嚟到燒烤場,今日冇乜人,嗦唔到燒雞翼嘅味。
喺燒烤場旁邊條樓梯繼續上山。
行完樓梯,又接番嚟克頓道。
到了,沿樓梯上去穿過公園仔就可以上去西高山。
依?有新嘢,上山樓梯口整咗個牌喎。
吖~得意喎,原來係牌係用嚟話比你知上咗幾多架喎。
其實呢個係鼓勵你繼續行埋上去,定係提醒嗰啲想放棄嘅人及早回頭呢?
話咁快就行咗3/4了。
到頂了,上次嚟好似未有呢個牌架喎。
正喎,有埋日期比啲人喺到影打咭相。日期仲可以做假添。。。都就嚟要換個年牌喇喎。
有啲奇怪,山頂竟然冇乜人。
今日天氣好大煙霞灰矇矇,都費事嘥氣影風景了。
好,到今日嘅正場睇日蝕。其實已經冇用呢啲嘢好耐,今朝淨係掘佢哋出嚟再抺乾淨都用咗我粒幾鐘時間。第一塊隔UV,第二塊係ND8,第三塊係ND400,再加多塊gel。
其實最有效係呢塊IR cut,作用唔係要嚟cut走啲IR,返而係IR以外嘅波長全部cut晒。用嚟當減光filter就一流,絕版嘢家陣買唔到架喇~
砌好晒就可以睇日蝕,效果唔錯喎。睇睇吓山頂越嚟越多人,不過佢哋全部都只係嚟行山,冇人會好似我咁戇居行上山頂睇日蝕嘅?。
用眼睇完梗係想影埋佢,試吓用部手機嚟影。原來都唔係想像之中咁容易,因為個太陽係一細粒勁強嘅光點,跟本對唔到焦,就算對到都爆晒光。想話試吓貼實個鏡頭用M-mode嚟影又唔得(三叔個M-mode其實好廢)。後來試到用塊gel嘅反光嚟影射喺手機背上面嘅太陽光點,雖然係要放大放到起晒格,但都叫睇到個形狀。收貨~?
上山嘅時候冇留意原來加多咗個指示牌喺到,咁就算係第一次嚟嘅山友都唔會搵唔到路上山。
跟住過嚟盧吉道再上山頂公園。
轉個頭就由對面嘅西高山行咗過嚟,隱約見到山頂仲係有好多人。
嚟到山頂公園,梗係要補吓奶力先啦?
落山經過古蹟更亭影一影?
冇耐就行到落嚟人頭湧湧嘅凌霄閣。
跟住係照舊由喺芬梨徑落山。
落山前影多張頽相先。
好快行咗嚟白加道站,可以近距睇吓纜車同條纜(tele影嘅,唔好行落路軌啊)。
嚟過呢度好多次,今次係第一次見到架纜車停站上客。
睇完纜車,今次想試吓由舊山頂道落山。
落到嚟城界碑又影一影。
繼續沿舊山頂道行落去。
經過啲豪宅。
行到見到前面呢條梅道,靠左手邊行有樓梯落去。
行落去就係香雪道,可以轉左直去。再穿過公園行小徑就有長樓梯可以落去干德道。
不過今次想確定一吓自己上次有冇戇居咗行錯路,所以跟住指示牌方向繼續沿舊山頂道落去。
左邊嘅行人路行行吓冇咗,要過對面。落到嚟路口四維望都唔覺有指示牌,於是就繼續直行過咗馬路再算。
過完馬路轉左繼續行睇吓點。
再行前發現唔多對路,見前面有條樓梯就落去睇睇。
頂佢個肺,落咗嚟再行就見到指示牌了。
喺條行車天橋下面再起一條行人天橋,又幾特別喎。
終於嚟到干德道,繼續沿路行上去。
又再經過李園,即時想爆粗???。比佢老L點行埋晒啲冤枉路,如果照之前咁行香雪道一早就可以由旁邊條樓梯落到嚟。
好,返到嚟到登山電梯出口,安樂了。
唔記得咗登山電梯係有上冇落嘅,始終都係要自己行樓梯落山?。
又再經過呢度,門口放咗個易拉架話openday﹐即時好有興趣想入去睇吓。諗住照佢印住個網址開嚟睇吓有冇開放時間,點知個網係流架喎?。結果冇入去就走咗,後來再查資料先知原來呢度係香港第一間清真寺嚟,已經有過百年歷史。下次再經過要入去影張相先。
繼續落到去沿路都有嘢影。
最後忽然想扮吓文青行咗去PMQ,結束今日嘅行程。
路線記錄
Total climbing: 959 m
Total time: 03:49:25