今日係全球針孔日，本來應該走去影下相。不過因為有一個好特別嘅 pinhole workshop，係用laser cut 開件來組合成木頭相機，所以我決定要拎五舊幾水出嚟去偷師兼學野。
去到會場已經見到枱面放得靚靚嘅材料同工具，奇怪嘅係，８個學員入面有６位係女性。
開始制作嘅第一部係要將相機內部部件油黑。今次真係學到野，從來整相機都係靠噴黑油，冇諗過原來用 marker 筆油黑效果都唔錯。不過都要睇木板本身嘅質地，佢呢種夾板吸水性好高，好適合用 marker 來做。
接住落嚟又有一個另我佩服嘅地方，設計平面組件嘅人巧妙咁預留咗夾縫，組合之後成為螺絲窿。當螺絲入去之後會自然將夾縫向外迫開，夾實套住組件嘅外框。情況就好似入完 tenon 之後打 wedge 咁，似乎呢位設計者有木工底子
呢個係過菲林嘅組件，真係一邊組合一邊讚
相機頂部嘅安裝差唔多完成了
主辦單位標榜呢個改良咗嘅防止菲林回彈設計，當然係好正。不過我想講係佢細微嘅地方都兼顧咗，呢粒細細嘅木牙螺絲係用不锈綱做嘅。因為木容易受潮，一搬鐵螺絲好容易會生锈，雖然未至於會影響運作，但係生咗锈望落就唔開胃啦。咁點解我又知佢係不锈鋼？因為粒螺絲唔受磁，上螺絲時唔可以黐住喺枝鈚上面。雖然上起來比較麻煩，但呢兩粒螺絲我係笑住嚟上嘅
完成了，裝筒菲林落去試下位
呢部係我第一部唔係由自己整出嚟嘅針孔相機，我真係好鬼like佢。用五舊幾水嚟買部針孔機貴唔貴就見仁見智，我就覺得物有所值。不過要影針孔又真係冇乜必要靠佢，當收藏品算了
如果對呢部相機有興趣嘅朋友就自己 google 一下 dimension plus 啦
發表迴響