承接上星期打橫行港島，今個星期玩吓嘢打直行，由鰂魚涌出發行去赤柱。類似嘅行法之前都試過好幾次，中間路線變化可以好多。一樣係可難可易任君選擇。比較直接係港島徑5接衛徑1，之後再跳崖落引水道行去赤柱，沿路經過嘅山都全部上晒，特別適合攞嚟做折磨朋友路線?。不過今日自己帶住口罩又想避開人潮，就揀條易行得嚟又相對少人嘅路線嚟行吓?。由鰂魚涌出發，上到大風坳之後基本上唔係落斜就係平路，輕鬆到好似冇行過咁。
路線：鰂魚涌>柏架山道>大風坳>野豬徑>大風坳>柏架山上引水道>港島徑第6段>大潭上水塘>大潭篤水道>赤柱東引水道>赤柱峽道>赤柱村道>赤柱灘道>赤柱正灘>黃麻角道>軍人墳場>黃麻角道徑>聖士提反泳灘>黃麻角道>赤柱大街>美利樓
全長：18.97 km
時間：3小時58分
路線概覽
由鰂魚涌狗鐵站出嚟轉右沿英皇道行。
行到街尾見到柏架山自然徑個牌就轉右。
跟住沿橋底向前行，好快就會見到入口。
嘩，真係多人過旺角，咁嘅環境點可以除口罩?。唯有慢慢行上去。
影呢個牌其實係因為上面朵木綿花。
今日有啲霧都幾靚。
行咗好耐，終於上到嚟大風坳。仍然係多人到爆。
跟住喺厠所對出嘅路口住轉入去野豬徑。
一轉入嚟之後即時有番平時行山嘅寧靜感覺，呢段路一般嚟郊遊趁熱閙嘅都唔會行。其實成段都係微微落斜嘅平路好易行，可以除一除口罩吸吓新鮮空氣。
行到嚟野豬徑盡頭係熟口熟面嘅路口，通常都係反向行入嚟再轉小徑上柏架山。今次要由呢到行出去再轉右去水塘。
一行出嚟就見到有指示牌，一路直跟住條路去就得，包唔會有錯。
行多陣就變成石屎路。
大霧入面嘅大潭中水塘都幾靚，陣間行吓行吓就會行到落去。
呢段路行得輕鬆又少人，點解會咁著數❓因為正常人要由大風坳落大潭都會揀港島徑，唔會揀條行得遠咗又冇乜特別嘢睇嘅路嚟行。但係喺特別情況之下，呢邊又似乎係唔錯嘅選擇。
繼續行多一段喺遠處見到上水塘個副壩，望埋去好似就快到，其實都仲有一段路要行嘅。
行完呢段出到嚟就會連接番前面嘅港島徑，又係時候要帶返個口罩。
啱啱行完呢段叫做柏架山上引水道。
跟住沿路落斜。
行多陣就嚟到上水塘嘅主水壩。
過水壩之後轉右或者轉左都得，不過右邊會行遠少少。
咁我梗係轉左，沿住水務文物徑行出去。
好快就嚟到先前喺引水道望到嘅副水壩。
之前有段時見啲錦鯉冇晒，今日行又出現番???
呢碌石柱其實都好有歷史價值，係群帶路嘅里程碑。可能係因為唔關水務嘅事，所以咁大碌嘢係路邊都冇任何介紹。
除咗 VICTORIA 個字之外，已經睇唔到其他寫乜?。好似話有中文字寫住群帶路。
跟住又嘢睇，轉左行入去幾步路就到。
係一間封到實晒嘅紅磚屋，好快就可以行完走人。
入口有資料介紹，原來間屋以前係工人宿舍嚟嘅。
睇完磚屋繼續沿路落，
又到咗另一個先前喺引水道見到嘅地方，大潭中水塘。
中水塘呢個壩嘅形狀好特別。
其實如果要認真咁行晒同睇埋文物徑入面每一個景點可能都要大半日，不過我暫時都未有呢個打算。
呢啲木雕塑唔知整咗喺到幾耐呢？對我嚟講算係新嘢，第一次見。
又幾攪鬼喎。
又嚟到招牌景點，梗係要影吓相先啦。
最後出到嚟人山人海嘅大潭峽，呢到有個靚厠可以洗個面，仲有水汽水機可以補給。
好吸引好想飲包奶，不過今日行嘅路飲包咁嘢真係行完全程都消唔到啲糖。都係算繼續飲水算了。
繼續行程，跟住係一段差唔多有4公里長嘅引水道。入口要行返轉頭少少喺呢個唔多起眼嘅樓梯口行上去。
入口有個牌寫住赤柱東引水道。
一開始就要上一段樓梯，之後全段都係平路。
行上嚟之後平時行山嘅感覺返晒嚟，清清靜靜一個人都冇。可以除低個口罩吸吓新鮮空氣了。
到底要有錢成點先可以住到呢啲豪宅呢？
見到赤柱了，仍然仲有一段距離要行。
似乎有山友開多咗條新路落山喎，不過都差唔多到平時行慣嘅出口，唔試新路了。
就快到了。
記得第一次行呢段條樓梯嗰時啲雜草好多，同依家咁企理乾淨相差好遠。
上完條短樓梯再行前少少就會見到鐵絲網，旁邊條樓梯就係出口。
喺呢到轉左行落去就得。
繼續行落去。
攪掂，落到嚟赤柱峽道。過對面再行前少少就有行人路。
繼續沿住行人路直去。
再喺前面迴旋處轉右落去。
嚟到赤柱正灘，落去海邊行吓先。
跟住沿赤柱村道轉出去黃麻角道。
下一站係軍人墳場。
沿黃麻角道一直行就得。
大十字架下面有一張地圖，標示咗啲死蘿蔔頭入侵港島嘅路線。
參觀完軍人墳場，唔差在落埋去聖士提反泳灘行吓。
行到出嚟海邊見到有一架直升機喺舂坎山附近打圈飛咗好耐，似係有山人出咗意外。位置似乎係春坎角山附近。
今次唔知算唔算係第一次隻錶個 storm alert 有效，佢震完之後冇耐啲毛毛雨就越落越大。
落住雨都去唔到乜嘢地方，冇癮地行返去市集。
影個雞乸咁大隻字寫住赤柱嘅牌証明自己嚟咗赤柱先?。
依？有中女貓喎。
好，照舊用美利樓做終點，今日行完。
行程記錄
Total climbing: 942 m
Total time: 03:58:07
18/01/2021 at 11:17 上午
期待你下次再分享由鰂魚涌出發的路線，
大風坳行到好悶XDXD